雖然係好急住番士多,但係話曬都係見番班咁耐冇見嘅同學,
同時又係第一次見女朋友嘅朋友,出場點都唔可以太失禮。
臨到士多嘅時候,我特意放慢腳步,最起碼都要抖番順條氣先。

「喂!好耐冇見喇!阿俊!」
阿Yan 企喺爐後面,一面拎住把rilakkuma嘅膠扇一面撥涼。
阿Yan隔離嘅,當然仲有佢兩個跟班朋友,Hidy 同Phoebe 。
除左占卜三小花之外,我以為唔少得嘅當然係平時出雙入對嘅肥榮同Bella。

「喂!點呀Yan姐,好耐冇見!」





「咩姐姐聲呀!叫老曬!」阿Yan雖然笑笑口,
但明顯死佢內心恨不得立即用手上嘅燒烤叉飛插落我個頭度。
我知道如果我依家唔補下鑊的話,我將唔會見到今晚嘅月光。

「玩下啫,你索左就真!」

「真係架!呵呵呵!」女人有時明知人地只係吹下水,呃氹下佢,
但係只要聽到佢地想聽嘅說話,有時佢地都唔介意比人呃下。
Yan 行埋我身邊,一手搭落我搏頭,之後輕輕向下一壓,將我嘅耳仔拉埋佢嘅唇邊。





「叻仔喎,Smoky 都比你搞得掂!」
Yan 一而奸笑住咁講。

「哈哈,咁兩個人夾咁一齊囉...」
原來比人問有關自己感情生活事,有時都幾尷尬,
我開始明白點解成日報紙雜誌嘅歌手明星都成鬼日都話同邊個邊個只係普通朋友。

「Smoky 咁cool 都比你搞得掂,係唔係有d咩獨門心法呀?快d講!」
Yan 突然好似審犯咁將我拉住,同時半瞇雙眼,成個樣就好似同我講"你今日唔講唔駛旨意走"。





「呀!今日燒野食架嘛!不如吉野食丫!」
我將身體向下一蹲,甩開左阿Yan嘅頸鎖。
阿Yan 見我刻意迴避,亦無強人所難。

我走到爐後面放滿食物嘅檯。
Bella企喺檯邊,好努力咁將雞翼套上燒烤叉上面。
可惜雞翼似乎唔似肥榮咁聽Bella 話,
即使Bella 更用力、更花心機都好,
都係叉極都叉唔住隻雞翼。

「點呀?掂唔掂呀?」
我走到Bella 後面,觀察左陣之後先開聲問。

Bella回頭望望我,扭扭頭。





「少見喎,要你自己落手嘅?榮哥仔呢?」

「上次去完探險,之後無幾耐就話要同佢阿爸出國喇。
之後佢都冇乜點搵我。」

好一句冇乜點搵我。

「哦,我以為佢會跟埋黎添,你都知你地形影不離架啦!」

「果隻肥野,如果佢瘦返我都會考慮嘅...」

「話唔定佢去左韓國抽脂呢!」

「哈哈哈~你好似變左好多咁!我印象中嘅你係個毒男黎架。」





「我依家都係丫!拿,叉好喇。」
我將叉好嘅雞翼交番比Bella。
當Bella伸手準備拎番支叉嘅時候,我突然將叉收番埋我身邊,
Bella 伸手摸了個空。

「幫你叉無所謂,我唔會幫你燒架。」

Bella 笑笑,「得喇,你幫你女朋友燒啦!」
我將叉交比Bella。

「係呀!一陣仲有野要你幫手!」
我以一個極到震驚嘅表情望住Bella。

「你可唔可以唔好咁誇張呢?」




Bella 見到我嘅表情,認唔住笑起上黎。

「咩事先,我未必會幫你架。」
有時世事,真係戴番個頭盔比較好。

「我地買左個西瓜,但係士多老板話個雪櫃唔會借比客,
阿Yan 就話將個西瓜掉落海好似冰鎮咁拎水浸住。
呢度得你一個男仔,一陣要幫手切呀!」

「呀址!無問題啦!」
我拎番起我已經叉好食物嘅兩支燒烤叉,行埋Smoky 旁邊嘅坐位。