或者係我生平第一次參加全女班嘅聚會,
又可能係我自己小毒撚性格,對住面前嘅女仕們喋喋不休嘅說話,
我都唔知應該話佢地煩好,定係話佢定話題多好。

無見幾個月,由自己感情生活、
講到返工放工、甚至連自己最近用嘅化妝品、邊間鋪最近有discount,
所有野都可以成為佢地嘅話題。
突然間,我有少少明白點解星爺套西遊記入面,孫悟空想做瓜唐三藏,
因為呢一刻,我都有想做瓜曬佢地嘅衝動。





我嘗試將我嘅注意力放番喺我D牛扒豬扒雞翼度,
最起碼當我望住個火嘅時候,我可以分散下注意力,
唔駛下下都聽住佢地講咩Victoria Secrect呀,Peach John 咁。
可能你會問:成班女人喺你面前講內衣褲,仲唔即刻拎小俊出黎打個丁?
我同你講,當你係現場唯一一個男仔,個尷尬程度真係非同小可。

隨住太陽慢慢落山,沙灘上嘅泳客亦慢慢減少。
當我再次望出沙灘,只剩低零零星星幾個遊客,
慢慢喺月光底下,同身邊伴侶漫步沙灘。





我離開果張坐左幾個鐘嘅膠椅,伸左一個懶腰。
Smoky 望一望我,偷偷笑左一下。

「好悶呀?」Smoky 對住我做口形,無出聲咁問。

我伸出食指同大姆指,做出一個「少少」嘅手勢。

「陪我出去行陣丫~」Smoky 走埋我身邊,一手拖左我行出士多步出沙灘。
Yan 見狀,立即將正在咀嚼嘅食物吞嚥,企起左身。





「又走去邊呀!我想食西瓜呀!」Yan 大叫。

「我地行一陣,你地去拎番個西瓜入黎先,我一陣返黎切啦。」
我一路講,一路比Smoky 拖走,希望佢地聽到我講乜啦。

入黑後嘅沙灘唔似平時嘅街道,街燈互相之間嘅距離比市區遠得多。
不過天上嘅月亮比平時見到嘅更大更光,要靠月光黎睇到眼前嘅路,其實唔難。
夜晚為身邊所有事物都鋪上一層薄砂,令我覺得我同Smoky 呢一刻嘅相處更唔真實。

「辛苦你喇!要做Duck仔陪我~」Smoky說。

「唔會啦,陪女身份應酬下都應該嘅。」我笑一笑。
雖然比成班女人圍住真係好悶,但係起碼拍左拖之後,我開始接觸番其他人,
開始有番正常社交,過番一種我一直想過嘅生活。





「你識唔識游水架?」

「唔係好識,做乜咁問?」

「仲諗住問你:我同你阿媽一齊跌左落海,你會救邊個添!」Smoky 講完之後,
嘟起咀,睇落好似好不滿咁。

「大姐呀,你同我老媽子都...咁樣!就算係都應該問,我跌落海,你地邊個會救我啦!」


「哈哈~玩下咋~」Smoky 伸手扭住我耳仔。

「喂喂~對唔住女王!」

「算你啦!下次睇你仲敢唔敢頂撞我!」Smoky 手叉腰,




一副女王嘅樣式。

我都無佢咁好氣,繼續向前行,享受下呢個無幾十把女聲圍住我轉嘅寧靜環境。

「咁夜仲有人游水嘅?」我望望一個由海入面行番上岸嘅男仔,
對Smoky 講。

「係囉,咁夜無救生員架喎!」

「條友條真係未死過。」

「乜【死過】好失禮你咩?」
我感覺到Smoky 已經用比頭先更兇狠嘅目光望住我,
睇黎我唔講番d好說話嘅話,一陣又要比女王用刑。





「咁又唔係...」

我同Smoky 一直橫越沙灘咁行,
而剛剛上水嘅男人就好似特登控制住步速咁,等待同我地相遇。
男人唔似平時嘅泳客,將行李放喺沙灘上面,反而只係著住條波褲,拖鞋都無著,慢慢向我地行埋黎。

「先生...」男泳客首先開聲。

「嗨!咩事?」如果喺街上面見到個咁嘅男人,仲要怪聲怪氣,
我可能未必會應佢,不過依家又喺沙灘,佢又剩係得條泳褲,斷估佢都唔會對我做d乜。
如果佢泳褲入面收到把刀,依家行埋黎打劫我的話,咁就真係值得比曬d錢佢啦。
單靠佢一招用丁丁黎收刀,我已經覺得值回票價。

「我想返屋企...」男泳客繼續講。
男泳客同我只有幾步距離,滿身水珠。




身體嘅皮膚亦好似浸左好耐咁,手腳亦有少少「巢皮」。

「下,果邊有車站,可以出番筲箕灣架。」我指指車站方向。
但男人並無任何反應,只係繼續低頭,目無表情。

「哦?係唔係你d野沖曬落海呀,拿,呢度廿蚊,夠搭車架喇,byebye!」
我將褲袋入面嘅廿蚊一野比掉左比男泳客。

因為白痴都知,呢條友一定有古怪。
以前我聽過有人話,只要將西瓜掉落海,就可以招番大海入面嘅孤魂上黎。
我身上面乜架生都無,就連最基本嘅現形水都無支。
不過呢家野都係閒事莫理,一於返士多!食西瓜!