我慢慢將頭轉到可以望到身後人的位置。
企喺我身後面嘅,唔係我心目中嘅身影。
坐喺度嘅我,另轉面只係見到一個著住黑色長褸嘅身影。
男人雙手放於身後,你根本唔知佢手上面拎住乜。

正如我之前所講,呢種人,唔應該存在喺沙灘。

「你朋友呀?」阿Yan 問我,
希望可以由我嘅回答入面拎到一絲安全感。



我搖搖頭,望住眼前呢個男人。
近睇之下,男人更比人一種不敢冒犯嘅感覺。

唔係因為佢面上面果塊同佢本身膚色格格不入嘅古怪皮膚、
唔係因為佢一頭好似游完水上黎,仲滴緊水嘅長曲髮、
唔係因為佢果套好似旺角仔先會著出街嘅古怪衣著。
而係呢個男人,只需要企咪你面前,一呼,一吸都散發住一種古怪氣勢。
與其話呢種係不安,倒不如話呢種係你細細個見到訓導主任嘅那種嚴肅感覺。

「先生,請問咩事?」諗深一層,


經過師傅咁耐嘅訓練同日常練習,我慢慢都會感覺到有人行埋我身邊,
又或者感覺到附近四周圍大家嘅氣息。
但係呢個男人由出現,到企喺我後面,我完全感覺唔到。

不過到佢開聲之後,我終於知原因。
因為呢個人唔係泛泛之輩,亦了解到佢出現喺沙灘嘅目的。


男人拎出手提電話,喺手機上輕輕幾掃。



「有冇見過呢個男仔?」

男人將一張學生班相展露於我眼前。
相入面男女學生都擺出古怪嘅動作,我諗一諗,我當年都有影過呢類相。

「呢度成村人喎師傅!」我望到張相後,
口快快講左出黎。

身邊眾人見到我對眼前呢個高我成個頭嘅男人以咁嘅態度講野,
大家都嚇左一嚇,老實講,我自己都打左個突。

「呀...SORRY,呢張先係。」更古怪嘅係,
眼前呢個麻甩佬竟然好似真係自己做錯事咁對我地道歉。
不過點都好,整個氣氛即時變得緩和。



男人再次用手機比另一張相我睇。
相中男仔雖然又做鬼臉,又擺曬港女147咁影相,
但係以老子咁出色嘅認人能力,點會唔認得佢。

因為我頭先仲比左廿蚊佢搭車。


「嘩!條友個樣CHOK到咁,我點認呀,你有冇第2張相呀?」
都係果句,閒事莫理,特別係D咁嘅事。

「無喇,得呢張。」男人收起手機,
輕輕整理自己長褸嘅衣領。

「咁我都幫你唔到喇。」我對男人講,
期待可以打發佢走。



「咁就麻煩喇,因為...我今晚點都要帶D野走,如果唔係我好難同阿頭交代。」

突然一陣寒氣由男人背後湧出,男人身上慢慢浸出白色微光。
沙灘上一陣風由沙灘湧入士多帳篷位置,燒烤爐嘅火被吹得幾乎熄滅。

男人雙眼緊緊盯住Smoky。
Smoky亦知道男人對佢不懷好意,立即退到我身後,緊緊捉住我嘅手臂。

男人用食指輕輕敲敲自己手機嘅機面。
「佢...或者佢。」男人說完之後,用食指指住Smoky。
「比你揀,我冇幾可咁易話為。」
男人講完之後,將手機放番入褸袋,靜待我嘅反應。

「um...都咁夜喇...可能佢去左坐車返屋企呢。」



喺無方法之下,我只能為眼前呢個男人提供情報,
因為以頭先佢輕輕Showoff,我已經知道依家嘅我,
就算用盡100%能力甚至係出埋"拿咋招"唔會係佢對手,
更唔好話乜裝備都冇喺身。更重要嘅係,我唔可以拎Smoky 黎為左一個唔識嘅人去搏。

「唔該曬你後生仔。」男人笑笑,轉身就離開士多嘅帳篷,
向沙灘旁邊嘅車站行過去。

「唔送喇!」而對剛剛恐嚇完我嘅呢個人,
對唔住,我真係無辦法心平氣和咁同佢講野。

「放心啦,我地一定會再見。」男人雙手插袋,一步一步離我地而去。

男人長褸背後,有一個以荊棘扭成嘅圖案,


老實講,我真係覺得同個MK佬真係夾到絕。
圖案中間有住簡單嘅幾個字母。

呢幾個字母如果係以前,
對英文Fail嘅我黎講當然唔明佢有乜意思;
但對早排睇完Pacific Rim 嘅我黎講,我就絕對記得佢嘅意義。


" J ä g e r "


即係英文嘅Hunter。