唔係掛！原來真係有鬼！－現代捉鬼故事: 第八章 - 石澳之旅 -6

我同Smoky 急急腳咁行番士多，老實講，
我係人就話怕o者，我都唔明Smoky 點解睇落仲驚過我。
行返士多嘅途中，我都時不時向後偷望，確保阿水鬼哥哥冇跟住黎。

學陳水春咁講，真係用眼尾望下好喇。
不過如果比水鬼哥哥跟住黎，下場可能唔係比肥屍爆幾個可樂樽咁簡單。

幾經辛苦，我地終於都返到士多。
Yan見到我地兩個行到上氣唔接下氣，
忍唔住問：「做咩呀你兩個？見到賊呀？」





我同Smoky 對望一笑，如果比你知道我地頭先見到乜，
我諗你可能冇乜心情再留喺呢度，更唔好話坐喺度有專人切西瓜比你食。

「唔好講呢D住，係咪食西瓜，要本大爺幫手先？」
我作狀磨拳擦掌，我記得以前剛畢業出黎做野，
做乜都做得唔好，身邊嘅人都對我愈黎愈無信心。
好好彩有個同事教左我一樣，我記得佢咁話：

「好多野我都唔識架，




但係上頭又叫你做，咁點算？扮野囉！唔識都要扮到好識咁。
好多人都係咁架咋，唔識做唔緊要，唔好比人知你唔識做！正所謂"唔打得都睇得。"」

呢句說話真係畢生受用。

「唉～～～～」Hidy 突然好大聲咁嘆氣，
與其話佢係嘆氣，不如話佢係比緊說話其他人聽。

我同Smoky 坐左喺最出面，背對沙灘嘅椅上。





「咩事呀？你個樣咁衰嘅？」我問Hidy。

「個西瓜...我諗沖左出大海喇...」Phoebe 吞吞吐吐地說。
老實講，你唔講我地都知，因為頭先我同Smoky 已經見到你個西瓜以等價交換黎換番黎嘅朋友仔。

Hidy 同 Yan 兩個用唔多友善嘅目光望住Phoebe。
Phoebe 亦覺得唔好意思，一味低頭。

「算啦，又唔係佢食曬，咪咁啦你地。
不過放生西瓜我都係第一次聽，下次我地可以試下放生其他生果。」
我未講完，Smoky 已經一踭批落黎。
Hidy 見到,不禁偷笑。

「我都係搞下氣氛咋嘛，拿你睇下！幾成功！」
Smoky 睇黎已經開始習慣我嘅無聊爛gag。




一個人搞爛gag 無非都係想睇下大家嘅表情，我亦一樣。
但係我環顧大家，我第一次感受到咩叫面如土色。

Hidy,Phoebe,Yan 同 Bella不約而同望向我身後。

「唔係咁老土呀....又?!」我心諗。
不過今時唔同往日，我又點會怕呢D咁既魚毛蝦仔先得架！
再者，要隻鬼現形容乜易，拎粒Smoky香口膠一野塞落去！再一野轟落去！
「轟呀！」 佢就係咁先。

當我一轉身，我竟然見到一個令我心入面帶來不安嘅身影。