唔係掛！原來真係有鬼！－現代捉鬼故事: 第二章－爸爸－9

「點呀？我公司ok嘛？」老豆見到我ｄ冷汗係咁標，佢都冇為難我，
順便轉轉話題。 「ok丫~幾大幾闊落。不過點解你有錢裝修到公司咁靚，唔執下我地屋企呢？」

諗起我由細到大住既400幾呎單位，唔係寒酸既，
不過比起佢個office 就真係好似差D。

「我都唔識裝修，我都係搵人整架咋嘛。」

「！」裝修佬唔識裝修，同海底奇兵冇兵、
低清老翻王唔低清、戰狼三百冇戰狼有乜分別？





咪住，佢有手足架嘛，叫佢Ｄ同事搞咪得囉。

「咁你叫你Ｄ同事幫手嘛。」

「哈哈哈哈。」老豆突然好似比人點左笑穴咁狂笑。

「你唔係覺得出面班友有任何一個擔得抬得掛！哈哈！」

「咁我想問你公司係做乜既呢，阿大老板。」我終於比我老豆引導左問呢個問題。





「環境衛生囉。」

「咪Ｑ學689 啦老豆！兩父子仲搞埋Ｄ語言藝術！」比人玩到上心口，真係有Ｄ燥燥地。

「頭先你咪睇左Ｄ相既？佢地有乜共通點？」

林正英、錢小豪、 鄭則士、萬二蚊....
有兩個就轉左行賣咸鴨蛋啦，
咁唔通係打得？唔係丫，我又冇見過 董標起飛腳，




唔通係全部都係良心電視？
錢小豪又好似唔係wor。

唯一一樣就係全部都係演員囉。


「估唔到呀？開估架喇？」老豆一副睇死我想放棄既樣同我講。

咪住！
林正英同錢小豪就係僵屍先生而紅透半邊天丫，
小玲姐姐就佢條腿，唔係，係佢個驅魔龍族馬家掌門丫，
對上一個星期日唔想出街，睇良心電視台又睇左套 鄭則士ｏ個套捉鬼大師，
我仲笑佢套野d 特技屎！

「鬼！」呢個字我差ｄ衝口而出。





「環境衛生」呢個咪同小玲姐姐個「清潔公司」同一個玩法！
如果係咁既話，所有野開始講得通：

點解無啦啦屋企會放把桃木劍、
點解老豆會識煲加料湯、
同埋點解佢會知阿媽返過黎同我傾計！