唔係掛！原來真係有鬼！－現代捉鬼故事: 第三章－不平凡的開始－16

空氣中既熱鬧亦破唔到我地之間既冰層。
又或者，呢個就係毒男既命運。
高登有個識風水既巴打話過，改變小毒拎命運係佢既責任。
如果唔係比人搶左6000蚊，我一定會去搵佢救命。

不過我諗快極都要下個月。

「喂喂。」Smoky 再次講聲。
「你o個部iphone 5s 黎架？借黎睇下丫。」我比左部電話Smoky。
「唔好整壞呀，未供完架。」我比完部電話佢之後補番一句。




因為我真係唔想又要用錢，黎緊呢幾個月我已經好多錢用架喇。

雖然毒男聖誕自己一個過更開心。

「嘩！你張相咪阿璃？仲要收埋做wallpaper！好毒呀你！」

「你識乜丫！」我即時搶番部電話。咪住，iphone5s 唔係有指紋鎖既咩？
點解....

「喂你點...」




「不如你教我玩lol 丫！」我未問完Smoky 搶先一步發言。

「都得既...」我細細聲回答。或者我除左玩lol之外都真係一無事處。

「其實你點解約我食飯既呢講真？」我鼓起左最大既勇氣，
終於問左呢個屈左成餐飯既問題。

「頭先咪答左你囉～見你陰公豬嘛～hehe～」

「咪玩啦，我講真架。」





「同你一樣，想識一個朋友。就係咁簡單～」

「你冇朋友既咩？」我感覺得佢串我自己一個人孤伶伶，
我真係要忍唔住問問佢。

「你個相好唔同嘛，傻傻更更，呢ｄ人先可信～而且最重要既係，
你同頭先班人唔同，你同我一樣，同一般人有少少分別。」

「．．．因為我特別毒？」

「哈哈～我都廢事睬你～」
我比佢搞到一頭霧水。

「哦！！！你都睇到『o個d野』 ？」我彷然大悟，果然我真係超級聰明，如果世界上面真係有金田一既，一定係我。





Smoky 見到我咁大反應，佢笑一笑，輕輕點點頭。 「我細個同唔同人講過，我見到一d 古怪既野，
爸爸媽媽唔信，身邊朋友都話我講大話。冇人肯相信你既生活，真係好難過呀可？」
 我緊係明啦！
我細細個既時候，見過好多次人地見唔到既事，
而由一個小朋友講比媽媽聽，當然比媽媽打到飛天啦。
細細個既時間，我返學時候成日都見到一個白色既人影，
我返學會跟住我，放學又會，就算有次去旅行佢都有跟住我。
我同阿媽講，我就緊係比人打到仆街啦。 不過自從我戴左眼鏡，同埋返左耶教小學之後，
個白色影就好似唔係好覺佢出現。 「嗯.....」我將最後一件麥樂雞放左落口，大大力吸左一啖可樂。

「好啦！我認我頭先態度唔好，對唔住。」
我拎起紙巾，抹一抹手上面既油。

「重新自我介紹，我係阿俊，以後請你多多指教。」





「你做乜呀？」Smoky呆左咁望住我。

「下...自我介紹囉，我睇ｄ戲多數男女主角都係咁....」我有少少支吾以對。

「唉...」Smoky 極不願意咁伸左隻手出黎輕輕搖左我隻手兩下。

「滿意未呀？走喇！」

下！！！咁快走？我仲未ff完喎。