唔係掛！原來真係有鬼！－現代捉鬼故事: 第四章－達德行－24

「係唔係你！男同學！」女鬼老師以異常凶狠既樣子同語氣對我大鬧。
如果以中學記冇交功課會比人鬧咁計，女鬼miss 呢一個語氣我一定係比人記緊大過，又或者係要趕我出校。

「你屋企人冇教你，人地同你講野你要望住人咩！」
女鬼一步步移近我。

女鬼miss 集合左我人生三樣我最唔識應對既對像：
第一，佢係老師；第二佢係女人...well 應該係女鬼；
第三係咩？咪鬼囉老細！你仲問！





我深深吸一啖氣，死就死啦。
「係我...」

「係我帶既！」Smoky o係我講完我句野之前，
以更大聲既語氣同聲浪蓋過我把聲。

「你做乜呀！」我拉住Smoky，細細聲咁講。

「放心啦，我冇事架。」





「做錯事仲掛住傾計！」女鬼伸出右手，
攤大手掌，掌心對準Smoky。

「過黎！」五指成爪，Smoky 突然成個被扯起數吋，
整個人直飛埋女鬼老師面前。

「叫左你唔好出聲呀！」女鬼用手爪住Smoky 既頸部。

「呀...」Smoky 一邊用手捉住女鬼既右手，一面掙扎，
佢袋入面既電話，香煙亦隨之掉到一地都係。





「放開佢呀！」我左右拉弓，
以右拳對準女鬼頭部。

「食屎啦你！」我一拳對住女鬼既面打埋去。

我最期待既畫面....點解冇出現架！
我既拳頭，前手臂，以至全個人，穿過左女鬼既身體。

「冇理由架！」我企起身再試，
結果亦一樣。

Smoky 見我被女鬼愚弄到好似一個傻佬咁。
佢用盡全身力氣，指指地下既一包煙。