校園愛情治療師: 論物種繁衍與牙籤

「銘仔，你碗豆花得啦。」

「唔該世伯。」



我食完碗豆腐花之後就起身幫佢地落單，
送甜品，份豆腐花就當係人工。

如是這，去到差唔多十一點，


鋪頭入面已經冇咩人，
終於可以坐低休息吓。


「搵我有咩事?」


「有單野想聽吓你意見。」




我同佢講咗關於James嘅事同我收集番黎嘅資訊。


「Come on James ?」佢笑一笑 。


「……?」佢莫名其妙嘅咁講咗一句。

「冇事，諗起首歌遮。」




「又男女身份唔對等，有冇諗起啲咩?」

「你知唔知你個樣好摟打？」

「不過啊James今次個情況調轉，
係女方高攀男方，同某人唔同。」
佢再次面帶嘲諷咁望住我。

「不過唔算太難搞，
雖然我都係覺得感情問題都係一律分手最好。」

我強忍心中嘅火氣，
「點解會簡單啲？」



當佢嘴角一鉤，輕輕fing一fing頭髮嘅時候，
我就知道佢又準備講佢嘅歪理，
我眼角掃一掃傳黎
「啊，好靚仔呀」嘅尖叫聲嘅周圍。

「全部都係為咗你而黎？」
「當然，間鋪冇咗我唔得架。」

「……你都係繼續啦。」

「係物種繁殖嘅角度嘅睇，
女方會選擇較為能力優秀嘅對象，
而男性並唔會太過著重喺能力，而係選擇年輕，
樣貌身材好嘅對象。你知唔知點解？」



佢見我冇反應就繼續講。

「對雄性黎講因為年輕同身材代表更好嘅生育能力，
所以生出健康 嘅下一代有更大嘅可能性 。
而對雌性黎講，喺生育嘅過程入面，
能力優秀嘅對象可以確保安全嘅生育環境同充足嘅資源，
同樣生出健康嘅下一代嘅可能性就會更大。」

「咁你講咁大段野係想講咩？」

「唉。」佢嘆咗口氣。
「簡單黎講，男會搵後生，女會搵有錢，
得唔得？」

「關咩事啊？」



「……總之代入宜家嘅事況就係James哥等於高學歷，
有車，有樓，而你等於一枝牙籤，
所以佢想修補關係好簡單，
但係你就可以返去收一收皮先。」

「喂！無啦啦關我咩事遮。」

「……因為你同佢地唔同。」

雖然啊輝佢講呢句話嘅時候表情同平時差唔多，
但係佢略帶憂慮嘅眼神同語氣令我覺得氣氛有啲沉重。
似乎佢都覺得怪怪地，直接推咗我出門口。

「今日就咁啦，有咩遲啲再講。」




「……咁即係點，到底接唔接？」

「接啦，之後再搞。」講完佢就走番入去，
淨番我一個係出面，
一陣涼風吹過，我打咗個冷震。


「……乞……痴……」