校園愛情治療師: 藍色多瑙河

「到你啦」佢拋咗個波俾我，行多一格。

我望住個波「唔係話示範咩。」

佢當聽唔到，我唯有自己繼續講落去。

「話時話你隻腳點?」我照住佢教嘅姿勢射波，
“碰”，中框。
佢等到我射完波先答我，「好咗好多。」



我搞唔清楚佢講緊嘅係佢隻腳定我嘅射波，
不過佢即刻做咗個跳射嘅動作，
我諗應該都好得差唔多。


突然響起電話鈴聲，好熟，係雪糕車嘅音樂。
佢睇咗電話一眼，就將電話放入袋，擺係一邊。
去到宜家我先醒起我仲未知點叫佢。
我一直都你你你咁叫佢，而佢都係咁叫我。



空洞嘅球場環繞住雪糕車嘅音樂，
我見到球場周圍嘅人望咗過黎，
睇黎個個都以為有雪糕車黎咗。
而佢就當鈴聲無到咁繼續自己射波，
好彩呢種尷尬嘅氣氛冇持續好耐。
鈴聲終於都完。

佢俾咗個歉意嘅眼神俾我，
我抬一抬手示意佢傳個波過黎，
啱啱就當冇野發生。佢又行多兩格都係。





結果當然係佢贏到最後，我又air咗幾次，
不斷原地踏步，不過我終於記起我家姐叫我做咩，
要搵佢個朋友個妹，我諗到都有啲頭痛，
可能因為咁所以潛意識一直想逃避，
先一直記唔起。

佢用一隻手托住個籃球，係個波旁邊望過黎。
「打籃球係咪好開心呢？」

「你係因為贏咗先咁開心遮。」





「好啦，見我贏咗咁開心，我請你食糖水好冇?」

「……」

佢見我好似唔係好想去咗就話，
「好近呢度架，唔洗十分鐘就行到。」


「……」

我諗十分鐘路程嘅糖水舖好似就係得嗰間。
「……不如我地去食雪糕?」








過咗一陣，我就同佢企咗係生記甜品嘅招牌前面。