校園愛情治療師: 鎖匙

係上次拗柴嘅嗰個女仔，有別於喺學校嘅馬尾辮，
佢將嗰頭勉強附合校規嘅微啡頭髮放咗落黎。
昏黃嘅街燈配合夜色嘅陰影，
令佢嘅輪廓變得立體，而海風亦都適時嘅停低，
似乎成個世界都因為我呢一眼而停頓。

當然，世界會因為一個人而停止係冇可能嘅事，
但係我的確因為佢而失神咗半秒。

我終於反應過黎。「又有咩事幫到你?」



佢笑得更燦爛，「我過黎跑步嫁。」

「我未見過有人帶籃球黎跑步。」

「順便遮。」佢又笑咗吓，向住球場嘅方向走。
「我見你嗰日喺球場度，仲以為你鍾意籃球添。」

講完之後停低腳步，擰轉身望住我。



我慢慢企起身，「其實我唔識打籃球……」

佢聽到之後都忍唔住呆咗一吓，你眼望我眼咗一陣，
我忍唔住講，「上體育堂都學過吓射波咁。」

「咁我地射key好唔好?」
「即係企係白色格上面射籃，入一球就去下一格，
最快行完一圈嘅人贏。」
佢見到我疑惑嘅表情，用手指一指地下。




「好，你先。」

佢微微瞇埋眼，露出一個值得玩味嘅笑容。
「真係讓我先?」「我驚你玩都唔洗玩。」
佢一邊講一邊將頭髮紥成馬尾。


「……洗唔洗咁認真先。」

「我鍾意嬴嘅感覺。」

「原來佢係啲咁好勝嘅人黎。」我心諗。






我拍咗幾下波，熟悉一下手感，
試圖搵番體育堂射波嘅感覺。
但係個波以一個高拋物線係籃框旁邊經過。
係經過，因為乜野都掂唔到。

「啊！唔記得同你講如果air嘅話要返黎最開始嗰度。」

「睇黎我個air都唔係太冇用……」我心諗。


「你又真係唔識射波嫁喎。」
「算啦，你睇我射一次，然後學吓點射波啦。」



我諗佢覺得頭先紥頭髮係完全多餘。

「你睇住。」

佢一句打斷咗我嘅諗法。


「由腿到腰再到手發力，前臂記得要90度。」

佢呢一球好自然，好流暢，
亦都係冇掂到任何野咁入籃。