我們中，出了個叛徒: Line 22

　　「我地可以一齊死係到。」我冷冷的說。「咁都幾好。」令人不寒而慄。
　　Hugo和阿凱坐在地上，在旁阿晴和阿儀分別替他們治理傷口。Hugo本來就是運動健將般的頗為健碩的身型，以前是籃球隊的他，顯然只是在阿凱反抗之際有點瘀痕，不太礙事；倒是阿凱受了往臉上的一拳，唇邊流了點血，再加上之後幾下突如其來的攻擊，臉和手臂明顯多了些瘀傷。幸好他也不再是以前中學時的「感冒超人」，工作再忙也能在自家公司的指定健身房做點運動，體能恐怕比我還要好，所以也沒大緊要。
　　剛把他們隔開的阿朗說：「阿晨講得啱，我地再咁樣分裂落去只會輸！」
　　Hugo二人相互對望，看眼神仍不太願意合作，但阿凱望了望我，說：「咁你覺得可以點？」
　　阿朗說：「我地使唔使揾返玲姐先？佢應該唔會行到好遠。」
　　我說：「唔使，佢之後自然會同返我地會合，況且佢而家一定隱緊形，我地根本揾佢唔到。」事情弄成這樣，大家也只得點頭同意。
　　「大家得兩個選擇，好簡單，一係跟我嘅方法，一係死。」我又冷冷的說道。
　　阿花突然舉了舉手，問：「晨……阿晨……我想問。」說畢她便走前來，問：「你覺得我使唔使感應所有人，咁樣會唔會安全啲？」
　　我斬釘截鐵地說：「唔使，呢個時候應該相信所有人。如果連在場嘅人都唔信，我地重點行落去？剩係卓仔個邊已經難應付。」我故意提高聲浪，使在場的人都有意無意聽到我說的話。
　　阿花總是認同我的說法，這次也不例外，她說：「好啦。」她的臉一臉猶豫，但依舊相信了我，可能是怪自己的「用處」不大吧。




　　「我講過，呢邊唔守得。因為卓仔佢地都知道位置，好可能會引警察之類蒞捉我地。所以我地一定要走。蒞緊我想同大家一樣嘢，好希望你地在場一個，唔係泄露出去。」我說。
　　就算大家都默不作聲，我也管不了這麼多。我說：「我想講嘅嘢，係我同芷君揾到嘅線索。」
　　看到他們半信半疑的面孔，我又再一次感到我們所有人都不能像從前親密。但我無暇理會他們的反應，接住說：「我肯同大家分享，係因為我信在場每一位，我覺得大家都係隊友，團結先會嬴。我唔介意你地點睇，到而家信邊個唔信邊個。有玩過狼人嘅，都可能知而家呢一秒係朋友嘅，下一秒可能已經唔係。但係，我冇所謂。就算去到最後我輸、我死，只要出到去，都唔係問題。相信我，我一定會帶大家走返出去，我唔會畀大家死係到。」
　　「好，廢話講完。我同芷君揾到一樣好重要嘅嘢，我想畀大家睇咗先。」我從背包裡拿出一堆紙張，放在地上。好奇心促使他們暫時放下成見，圍觀那堆凌亂的紙張。
　　「咩蒞架，一條條線咁。」Hugo撥了一撥那堆紙。
　　「咁樣睇，又真係睇唔出係啲咩。」阿凱拿起靠近的兩三張，仔細查閱。
　　接下來的自然也是他們在說我的線索很複雜、看不懂之類的，唯有阿朗忽然問：「阿晨，你呢啲嘢係邊到揾返蒞？」
　　我猶豫了幾秒，說：「你都去過？我同芷君蕩失路，竟然誤打誤撞揾到呢堆嘢。」
　　阿朗聽後，眼眉動了一動，神色有異地說：「唔係呀，我好似之前係邊到見過？」他在思考，聲音也因而漸小。我猜他一時三刻也想不到什麼，便又看看其他人的反應。
　　隔了一會，眾人還摸不著頭腦。而眾人當中，阿儀不算投入，趁大家稍微靜下來，便問：「阿晨，你係咪有咩打算？」




　　「我都諗過好多可能，但係一時三刻都未必解到呢個謎，所以大家估唔到諗唔到，我都預咗架啦。我地要……」話未說畢，外面忽然傳來一些怪聲。
　　眾人都呆了一呆，然後望了一望阿凱。阿凱點了點頭，說：「我聽聽。」在場所有人的神情凝重，大概是猜到了危險即將「降臨」；話雖如此，一眾的臉色都只是比之前稍為認真一點，特別是晴晴和阿花，已不再像以往那般顯露驚恐和緊張，想必是漸漸習慣這種感覺了吧。
　　「我聽到，好似係好重嘅腳步聲。」阿凱詫異地說，又按了按耳朵的耳機。
　　「聽唔聽到有幾多人？」阿儀問。
　　「聽唔清，唔少啦，我重未可以好仔細咁聽。」阿凱答得焦急，顯然他在埋怨自己未能夠掌握能力。
　　「叫你做少少嘢都做唔好嘅，呀金融大少。都係等我自己蒞啦。」Hugo說，說畢便立刻站了起來，快步往大門走去，轉身跳往出口的通道。
　　「唔好行住！Hugo！」我大叫，喊得有點急躁。
　　Hugo此時已在出口前，聽到我大聲叫喊，數秒之間那運動鞋發出的腳步聲，從出口那邊傳到大門，回來時還打了一個空翻，笑住說：「點呀晨哥，你唔係驚我唔掂下嘛？」他頓了一頓，跳了兩跳，又說：「我好Fit架。」
　　阿朗說：「係，Hugo唔會有事，再唔係我同佢去。」阿朗是怕我不太信任Hugo嗎？
　　我笑住說：「我信Hugo嘅能力，但係大家更加要信我。經驗話我知，如果出面係怪人，佢地會一次比一次強，一次一次咁掌握我地嘅能力。唔知你地有冇睇過兩年前有套日本動漫，佢地就好似個堆識進化嘅小強咁，越蒞越勁。」如果阿謙在這裡，應該最能明白我在說些什麼，畢竟他較為熟悉動漫。




　　「咁即係點？」阿花說。
　　「即係我驚出面已經有埋伏。」我說，終於省略了十萬八千字。
　　「OK，我信你。」Hugo望了望左邊，回答道。
　　「咁我地而家點做？」阿儀說。
　　「我地要走，但係走之前用你地個部手機影低我嘅線索先，咁就算分開咗都可以用到，拍得幾多得幾多。」我說。
　　眾人點了點頭，開始逐一拍下那堆「線索」。阿花邊記錄邊說：「阿晨，你真係好好人。連呢個咁重要嘅線索都畀埋我地。」
　　「好似重要唧，可能唔係呢。唔緊要啦，講好要嬴。阿凱你繼續留意住出面嘅舉動，我地隨時閃人。」我邊收拾細軟，邊說。
　　「好。」阿凱說「左面又有另一班人，啲聲咁怪……我估係怪人蒞，頭先個批都係，但係…….啲腳步唔係好同……」
　　「總之有好多怪人？咁我地要快啲走。」晴晴拍了好幾張照，收拾自己的物品說。
　　「行。」阿朗說，一眾人也準備就緒。
　　「我地行啦。」我說。「阿凱，行啦。」我拍了拍阿凱的肩膀，怕他戴上半邊耳機沒聽到我們的對話。
　　我帶一眾走出大門，往右走去。
　　「出口唔係係左面咩？阿晨？」晴晴說。
　　「係，但唔止得一個出口，我知道有一個係係呢邊，應該可以避開啲埋伏。」我邊走邊答道。
　　我們大約走了數十步，此時又有兩個路口，我停住說：「Hugo殿後，阿凱拍住我，做我地嘅聲音雷達；晴晴、阿花、阿儀係中間嘅位置，條路越蒞越窄，你地係中間係最安全。阿朗你係阿凱同晴晴中間，護住佢地。」




　　眾人點了點頭，我就開始轉入左面的通道。通道收窄，由我們剛開始走的那個橫向能容納兩三人完全站立，到現在只能一個一個彎腰走。
　　「都係我唔好，如果我頭先有一直聽緊，就唔會啲怪人都唔知。」阿凱說。
　　「唔使講呢啲啦，總之而家走到就可以。」我對阿凱說，然後又對其他人說：「等陣我想大家分隊行，始終咁係最有效。」
　　「好，我同Hugo一隊。」晴晴說。
　　「我就係想趁今次好好修補下大家嘅關係，所以大家唔好同之前一隊過嘅人一齊行。晴晴我想你同阿凱一隊，佢可以早啲知道有危險，你又有能力係危急時處理，只要你冷靜啲就冇問題。」
　　阿凱伸手給我打了一個「OK」的手勢，晴晴沒再說話，看來也不反對我的提議。
　　此時阿儀說：「阿晨，我今次同你一隊。」她頓了一頓，說：「我唔會畀你有事，我可以控制到個時間，可以幫你。」
　　我點了點頭，相信她沒有惡意，說：「好，咁麻煩你啦。既然係咁，Hugo你同阿花一隊，麻煩你保護下佢。佢一個唔容易應付一大班怪人，如果有你係到，就算唔夠打都可以走。」
　　「阿晨我……」我打斷阿花的緊張，說：「阿花，OK架，照做啦。」
　　Hugo自信地說：「放心，我會睇實。」
　　我說：「好，阿朗，我只係想你做一樣嘢。等陣出到去，幫我地引開啲怪人，之後留意下佢地分隊同服飾之類。我諗我地要好好分析下班怪人，順便睇下會唔會揾到玲姐。」
　　阿朗點了點頭，說：「哦。使唔使揾埋卓狗佢地？」
　　我說：「唔好花太多時間去揾佢地，佢地嘅打起上蒞比我地著數，所以唔會出咩大事。」
　　阿朗說了聲好，我又說：「大家今次一定要善用手機，每兩個鐘請大家去附近嘅發射站或者街市，打一打卡確保安全。去到個啲地方部手機就會自然有嘢唔同，大家到時就會知點樣可以打到卡。」
　　我又說：「今次嘅目的好簡單，就係要解到個出口。大家唔使鬥快，我地要齊齊整整去到個到集合，只要有人確認到個出口。我估個到附近亦都會有啲類似發射站嘅地方，到時請你地係個到打卡，我地會盡快趕到。」




　　話剛說畢，就走到這出口，我用手向前扭了一扭，再推開前方那圓形的蓋。門打開，我們直接就從這裡跳下去……