我的爛Gag女友: 一段古怪的關係
自認識三位新朋友後, 很快便開學. 由於我們所讀的學院在第一年是讀Common Core, 所以, 不同學系的學生也一同上課. 我和阿王, 阿禮, 阿K在相約一同到Canteen 吃早餐, 然後就到LT-1上課, 很方便.
一進LT-1, 我是有點驚訝, 因為事先不知Lecture 和 Tutor的分別, 不知Lecture原來是二百多人一起上課的, 真是有點大鄉里.
我們四人在大約中間的位置坐下, 我坐在最外邊路旁的位置. 因為怕待會上課內容會跟不上, 所以我聚精會神, 低著頭在看筆記. 在我看的時候, 突然, 後腦好像有股力量將我的頭壓下, 我的頭直撞在桌上放著的筆記.
砰!!!
很大聲, 大家都看了過來, 阿王, 阿禮和阿K也呆了看著我這個方向, 但看的不是我, 而是在後面打我的人.
我回過頭來, 想大叫: “DLLM” 但還沒叫出的時候……
攻擊我的人站在旁邊大笑.
敏: 喂, 早晨呀虧佬, 見你晨早留留係度中眼訓, 整野俾你醒下神呀.
我有點火氣地回應.
我: 我頂妳個肺丫, 睇睇下一野拍埋泥, 你痴Q 線架.
然後, 阿王, 阿禮和阿K, 三人見到敏兒可愛的臉孔後便一同幫她說話.
王: 拿阿月, 人地同你玩下姐, 你咁樣嚇親d女仔, 唔係咁好個喎. 呢位小姐, 妳無嚇親丫麻
敏兒立即交足戲, 用手蓋著自己嘴巴, 裝作可憐, 想哭的樣子.
敏: um……小小啦, 我而家都有小小驚呀我
阿禮: 嗱嗱嗱, 阿月, 呢下你真係要同人道歉先得啦, 做friend既都唔爭你呀.
阿K: 係呀, 呢劑你真係唔岩呀, 我呢d咁公正既都唔幫你呀, 快d 道歉先啦.
敏兒又再裝作可憐的說: 鳴……算啦, 係我過份既, 唔好迫佢啦, 係我錯
我無話可說, 用風褸蓋著自己的頭大叫: 呀!!!你班仆街痴線架!!!
阿王, 阿禮和阿K三隻厹沒有理會我, 立即走上前和敏兒自我介紹, 然後站在LT-1右邊樓梯傾計.
阿王: 係呢, 妳同阿月點識架?
敏兒: o我, 我地係O camp果陣一齊訓覺, 又幫佢除過底褲咪熟左囉.
阿王: 哎呀, 點解我唔係報大O架? 點解我要去個仆街細O呀???
阿禮: 月哥, 你真識食.
阿K沒說話, 只是淫淫的笑再拍一拍我的頭.
我: 頂妳條粉皮, 咪係度9 up呀下
敏兒又再扮出一副委屈的表情, 鄒著眉頭.
敏兒: 你想唔負責任?
我: 呀!!!!!!!你班友痴線架!!!!!!!
然後, Lecturer 到來, 大家各自回到自已位置. 我看到敏兒, 原來她也是和一大班朋友一起坐, 我心想, 其實也很合理, 以她的性格, 必定是有很易結識朋友.
到了落堂, 敏兒和她的一班朋友走了, 而我們四人也準備食下午飯.
我: 係喎, 聽人講過南山村有間樹記唔錯個喎, 不如去試下囉.
K: 食過啦我地之前, 你想食呀?
我: 係呀, 我未試過, 聽人吹到話係又一城大學另一個飯堂咁, 想試下.
禮: 好, 去試下囉, 無所謂呀.
王: 好呀, 食完順手行去深水埗睇Game.
到了樹記, 原來是個排檔形式的餐廳, 價錢便宜, 味道也不錯. 吃過飯後, 時間只是1:30pm.
王: 你地下劃有無堂呀?
禮 和 K: 無啦, 陪你行埋黃金閃架啦
我: 我5:30pm有英文堂呀, 仲要返去, 呢幾個鐘陪你地hea下
王: 有幾個鐘呀, 咁不如等陣行完睇下有無時間, 一齊番去打波丫.
我: 打咩波呀? 我好多年無運動過啦喎, 唔太識呀
王: 羽毛球丫
我: 都得既.
K: 羽毛球我唔啦, 好攰架
王: 咁呀, 乒乓波丫
K: 都ok 既
我: 我唔識打喎但係
禮: 得啦, 打完咪識囉.
我: 我無拍喎但係.
王: Sport complex 有得借架
於是, 我地就去打了兩個小時的乒乓波.
王: 阿月, 你拎拍既手勢好特別, 好似d忍者渣手裏劍咁
我: 係呀, 我第一次打咋, 唔識丫麻
禮: 你塊拍要好似我咁拎, 你初學, 用呢個直板手勢會易打d.
我: 好, 我試下啦.
隔一會……
K: 你地打住先, 我要抖下.
我: 打左陣咋喎
王: 你條仆街球球都打飛d 波, 我地企你對面係咁執梗係快攰啦.
我: 屌, 初學丫麻, 睇開d 啦.
打完波後, 大家各自散水, 而我亦起行去ELC Centre 上英文堂.
我是最早一個到, 進去後便隨便找個位置坐下, 慢慢將筆記, 文具拿出來. 等了一會, 有另一個同學進來, 是一位女同學, 她也隨便找了個位置慢慢坐下, 徐徐的拿出文具.
我看看她, 頭髮長至膞頭, 穿著T shirt, 短裙, 皮膚很白, 不算太高. 看上去, 令我覺得很有嘉嘉的影子.
再過一會, 同學到齊了, Tutor 最後才到. 這個Tutor 是個外國男人, 很高, 很肥, 頭髮像獅子一樣, 看上去感覺很像哈利波特的海格.
海格: Good afternoon everyone, Welcome to our ELC course, I am your tutor (忘記左個名, 叫佢海格). In this semester, you are going to have a good English time………And now, please stand up and find a partner, you will have a presentation and project with your partner in the coming lesson.
我不知不覺地被有嘉嘉感覺的女同學吸引過去.
我: 妳好呀, 我係阿月, 不如我地一組丫.
寶: 好呀, 我係阿寶呀.
我: 妳讀咩科架?
寶: 我呀, um……我係xxx department 架, 你呢?
我: o我, 我係xxx department 架.
阿寶給我的感覺很溫文, 談吐也很像嘉嘉, 慢慢, 她令我產生她就是嘉嘉的錯覺.
英文班第一堂在同學各自介紹及海格講述課程後, 很快便完, 在完結前海格說.
海格: So, you will have your presentation on the forth lesson, there is no topic, you can choose any topic as long as you like. I recommend you to start work as soon as possible. So, that’s it, dismiss!!
我: 阿寶, 我地交換電話同icq丫, 之後, 方便之後傾project丫.
寶: 好呀. 我電話係xxxxxx, icq係xxxxxx.
我: 好, 呢個係我電話xxxxxx, 同icq xxxxxx.
寶: 咁我地再約時間傾啦.
我: 好呀, 拜拜.
放左學, 番到屋企, 我開部電腦打機, 突然ICQ 有個唔識既人add我.
??: hihi
我: 你係邊個?
??: 今朝同你玩下咋, 咁大力拍你個頭唔好意思呀
我: 原來係妳呀, 算啦, 下次唔好咁玩啦, 我眼鏡都差d 撞爆呀
敏兒: Sorry!!
我: 有乜攪作呀妳?
敏兒: Nth. 你呢?
我: 等緊人打AOC
敏兒: 咩泥架?
我: 電腦game
敏兒: o我
我: 係喎, 上次O camp 班人出泥唱K 做乜唔去呀妳? 無人搵到妳喎
敏兒: O camp 果兩個男仔成日煩住晒, 我咪廢時出囉, 我連電話, icq都無留俾人, 廢時佢兩個又廢我
我: 你話杜拉格B 同杜拉格C? 佢地做左d咩呀
敏兒: 佢地痴線架, 第一日就走埋泥問我覺得佢地點, 所以為左避開佢地我咪係個O camp成日都痴住你囉
我: 唉, 唔好扮野啦, 妳貪我靚仔先痴住我姐
敏兒: 喂, 咁, 梗係啦
我: 今日我係ELC 有個女同學, 佢俾我個感覺好似嘉嘉
敏兒: 係? 咁好呀, 不過你攪清楚自己係鐘意人定當人替身呀, 如果人地做左你水泡好慘架
我: 我又無話要溝, 似啫, 係喎, 咁妳而家可唔可以俾妳電話我呀, 得閒可以約埋妳一齊出泥玩丫麻
敏兒: 好, xxxxxxxx
我: 好, 打機先, 下次有活動call埋妳.
然後, 過了幾天大學生活, 每日都是和阿王, 阿禮, 阿K一起, 有時候去打乒乓波, 有時候去唱K, 生活很充實. 但很多時候, 在和大家玩樂過後, 一個人回到家靜下來的時候, 總會打從心底有種空虛感覺, 覺得有點什麼不足, 然後, 心裏又會在想念嘉嘉.
過了一星期, 又是ELC 堂的時間, 同樣最早是我來到班房, 而阿寶同樣是第二位到來. 我向阿寶揮手, 打了個招呼, 因為同組, 為方便討論, 她坐我旁邊.
我: hi, 咁早呀妳今日都.
寶: 係呀, 岩岩去玩完劍道落堂咪過泥囉.
我: 劍道? 日本, 劍心果隻?
寶: 唔係日本, 我係玩西洋劍架
我: o我
然後, 我拎朱古力出來吃, 打算請阿寶吃一顆.
寶: 唔洗啦, 我唔食甜野架
我: o下, 係呀, 我見妳個樣以為妳鐘意食添
寶: 有樣睇架咩?
我: 哈, 無架, 估下架咋.
之後, 海格和其他同學也進場, 大家也開始上課. 阿寶遇到什麼問題都會主動的去問海格, 很認真的抄筆記, 少有和我討論. 不久, 到了落堂的時候.
我: 係喎, 我地後堂都要開始做個present, 然後要交埋個project啦喎, 不如我地今個星期出來傾下丫
寶: 好呀, 星期四, 五下晝我都得.
我: 好, 咁就星期四, 五下晝兩日都傾啦
寶: 好呀.
到了星期四下午, 我們就present的內容, 一同到圖書館找了很多書, 然後就找個課室來開始工作.
我: 呢個present要十五分鐘, 我地將佢分四part, 大約係2分半鐘Introduction, 2分半鐘Conclusion, 然後每人講5分鐘內容ok?
寶: 其實咁都ok, 咁個內容我地應該要諗下點樣分成兩part, 按point去分定係點
我: 按point form啦, 因為…………………
傾完後,
我: 咦, 都夜啦喎, 成7點幾, 妳食唔食埋飯呀?
寶: 好呀, 去邊食呀?
我: 旺角丫, 食炳記牛牛丫
寶: 好呀
我們一同去到旺角炳記牛牛, 找個位置坐下.
我: 我食焗飯, 妳要咩呀?
寶: 我要呢個焗意啦.
然後, 伙記來到, 點好餐後, 我們開始閒談起來.
我: 係呢, 妳讀果科學d咩架?
寶: Um…類似d physics 野啦, 力學果類, 即係如果你將力加係塊鐵上面, 要幾大磅力先可以令到塊鐵爛果類啦,
我: o我, 咁妳平時淨係玩劍擊呀? 有無玩其他野架.
寶: 都有既, 聽下歌囉.
我: 咦係呀, 我都有喎, 我仲成日同d friend去唱K 架.
寶: 唱K, 都可以試下喎, 我未去過.
我: 咁不如聽日我地出泥練完present 去唱丫.
寶: 好呀.
我: 其實呢, 想問妳一個問題呀, 不過妳可以唔答架.
寶: 咩問題呀?
我: 點解呢? 妳成日都好似好嚴肅咁既
聽到呢句之後, 阿寶故意裝出一點點的寛容, 笑一笑.
寶: 係咩? 唔係呀.
我: 其實妳乜都咁緊張咁, 唔會好辛苦咩? 都放左學, 出泥食飯啦, 放鬆下啦
然後阿寶鬆一鬆, 將她架起的膞頭微微降下.
寶: 唉, 其實我都唔想架, 屋企人睇得我好緊, 乜都要我做到最好, 所以我咪有成日都有d 神經緊張囉
我: 咁妳平時係咪無得出街行架?
寶: Um……到中七時都係呀, 日日困係屋企囉, 不過到而家入左大學就好d, 可以趁放學周圍去.
我: 咁真係要多d 約妳夜晚傾project 等妳自由下啦.
阿寶此時才真正放鬆下來, 展露她的真正歡顏.
寶: 哈哈, 好呀好呀, 咁全靠妳啦. 係呢, 你有無興趣玩劍擊呀? 我地學會招緊人喎.
我: 劍擊呀, 篤下篤下有乜好玩呀, 我同班friend去唱K 好過啦.
寶: 你同你班朋友成日出泥玩架?
我: 都係呀, 我地一天地堂, 唔係去打波就去唱K睇戲囉.
寶: 你地就好啦, 成班朋友咁開心.
我: 妳都得架, 咪去識多d 朋友囉
寶: 唉, 個個見到我好似怕左我咁, 無乜人同我做朋友
我: 梗係啦, 妳成日都起晒”鋼”咁, 邊有人敢埋妳身呀. 你試下放鬆d, 咁就好架啦.
阿寶聽了我的說話後便眼仔碌碌的想了一想, 點一點頭.
我們吃完這餐飯後我就送阿寶到地鐵站, 之後便回家.
我開始有點害怕, 因為我常把她當成是嘉嘉, 將對嘉嘉的感覺投射到她的身上. 我怕自己控制不了自己, 傷害了這個女仔.
到了第二天, 我們相約好一起練習present, 今天見到的阿寶好像有一點改變, 比之前沒有了那種攻擊性. 她見到我在課室準備Powerpoint後, 便報以一個發自內心的微笑, 然後打招呼.
我: 等我一陣, 差唔多攪掂啦
寶: o我
然後阿寶就找個位置坐下呆呆的看著我, 令我很不自然.
我: 做咩呀?
寶: 無野呀
我們開始present, 先是夾內容, 之後練習, 再找需要改進的地方, 一邊再計時. 練了大約5次左右, 大約七時就完.
寶: 我地係咪去唱K呀?
我: 係呀, 唱K有埋野食架.
我們在去Neway City唱K的路上一直談present的事情, 一直到K房, 阿寶完全不懂如何點唱, 我便去慢慢教她用.
她點了很多我不懂的英文歌, 起初有點害羞, 不敢唱, 然後, 他聽到我唱陳奕迅的歌唱到走晒音也照唱, 所以她也開始放膽去唱.
結果, 她全晚唱了很多首我不太懂的英文歌, 比起我, 還要唱得多.
到走的時候, 我同樣送阿寶由Neway City行去銀行中心的地鐵站入口.
到了麥花臣球場時, 阿寶停下來, 吞吞吐吐的, 好像有話要說.
寶: 阿月呀, 你有無試過拍拖呀?
我: Um…戀愛就試過, 拍拖就無啦
寶:,即係點呀?
我: 即係收好人卡囉
寶:, o我, 我想你幫我一d野呀
我: 咩事呀? 突然咁認真既?
阿寶抖一抖大氣, 定一定神, 然後向我說.
寶: 我想搵你幫手開始一段關係. 好似情侶咁, 但係就唔會做情侶做既野既.
我: 即係咩呀? 唔做情侶做既野即係咩呀? 拖手? 錫? 定係…咩呀?
阿寶有點尷尬, 雖然燈光很暗, 但感覺她應該是十分之害羞.
寶: 即係呢, 好似男朋友咁, 關心個女朋友, 但係呢, Um…我地唔會有身體接觸既
我口賤的去問她.
我: 嘩, 咁我好唔So個喎, 掉轉得唔得呀, 做情侶做既野, 但係唔使關心啦不如.
寶: 唔係呀, 我講真架, 你幫下我啦, 我未拍過拖, 好想試下呢種感覺呀, 用一個sem為限丫.
老實說, 呢一刻, 我其實是把對嘉嘉的感覺, 放錯了在阿寶身上, 我竟然答應了她的要求.
我: Um…咁呀, 唉, 是但啦, 一個sem咋
寶: 好yeah!!!
阿寶開心得繞著我手肩在行上走, 我稍微感到阿寶身體的起伏. 然後, 我戲弄她說.
我: 又話唔可以身體接觸, 妳犯規喎.
寶: 見你咁乖, 獎你架今次, 下次無架啦.
就是這樣, 我開始了一段不知道是對是錯的古怪關係. 古怪是因為我深知我愛的是嘉嘉不是阿寶, 但面前我卻將阿寶當成嘉嘉. 我們既不是情侶, 但又要裝作情侶的關心, 確實是很古怪的關係.