我的爛Gag女友: 一段古怪的關係-二
在接受了阿寶要請的當晚, 我很迷惘. 我覺得自己明明愛的是嘉嘉, 但卻拿阿寶作代替品, 對嘉嘉不公平. 我有想過, 要不要跟她說清楚, 停止她這個要求呢?
在床上想著想著, 思緒很亂, 總是睡不過去. 我去上網, 正打算開ICQ亂找些人去問問意見. 凌晨時份, online的人仍然很多, 我在用搜尋功能找些不相識的人去問. 在此時, 敏兒發了一個message給我.
敏: 聽日要交果份功課你做好未呀? 可唔可以借泥參考下呀
我: 參考?? 抄定參考呀?
敏: 抄呀, 快手啦, 聽日deadline, 交唔出真係死架
我: 妳求下我啦
敏: 我求下你啦月哥, send份功課俾小妹抄啦, 你唔念在我地既友情, 都念在我當日幫你除過底褲丫
我: 仆街, 妳仲好講, 周圍唱呢單野, 等陣啦
File sent
我:: send左啦, 醒d呀, 唔好抄到足攬炒呀
敏: 你同我定啦, 抄功課呢家野我好有經驗
我: 咁得啦
隔一陣, 我諗起, 其實我可以問敏兒阿寶件事, 因為之前都有同佢提過下.
我: 我有d 野想問下妳意見呀
現在的回覆速度明顯地慢了很多, 應該在努力把我的功課改頭換面.
敏: 咩呀, 講啦
我: 記唔記得之前同妳提過ELC 有個女同學阿寶好似嘉嘉?
5分鐘後……
敏: 記得
我: 佢今日同我提出叫我做佢男朋友, 只限交心,唔可以有身體接觸果隻, 以一個sem為限. 我果陣白白痴痴當左佢係嘉嘉, 接受左=.=” 而家個心好唔舒服, 覺得好似玩緊人咁, 點算?
10分鐘後……
敏: 呢個問題……好複雜, 你俾多10分鐘我, 我同你慢慢傾.
再10分鐘後……
敏: 仲係度嗎?
我: 係度
敏: 其實你果個嘉嘉當年中七都派左卡俾你啦, 你扮乜鬼野情場浪子等人一世啫, 而家有女自己走埋泥, 你咪試下同人行囉.
我: 妳之前唔係咁講架, 妳叫我諗清楚唔好當人水泡個喎.
敏: 女人係善變架啦, 唔得咩? 最重要係, 你覺得人點先?
我: Um…其實佢個樣都ok 既, 個感覺淨係覺得似嘉嘉囉, 份人就真係時間太短, 未清楚呀
敏: 咁你自己對人有無feel呀?
我: 老實講, 其實我真係當佢係嘉嘉咋, 我唔係鐘意佢, 所以而家好內疚, 覺得好似呃左人咁
敏: 你呢d 毒男就係咁, 船頭驚鬼船尾驚賊. 人地女仔都主動開聲想試下拍拖, 就算最後要蝕底都係佢蝕啫, 你會蝕d 乜? 而且, 話唔定你了解佢多左會真係鐘意佢呢, feel呢d 野話唔埋架麻
我: 但係咁呃人法真係過唔到自己果關喎
敏: 妖, 你真係麻q煩, 叫你試一個sem啫, 幾個月, 仔都生唔出啦, 唔好再煩啦, 我做完功課, 要訓先啦
我: 抄完講幾句就訓, 屌妳
敏: 唔俾咩, 88
到第二日, 放學時候, 我和阿王, 阿禮, 阿K一起, 準備去旺角新之城機鋪玩頭文字D, 在離開課室時, 阿寶打電話給我.
寶: 喂喂
我: 喂, 阿寶
寶: 係呀, 我呀, 我地今日要去拍拖喎, 你有無諗好要帶我去邊呀?
我: 今日? 但係我約左朋友去打機喎而家
寶: 唔緊要呀, 你俾我一齊去, 我睇你地打丫
我: 悶死妳喎
寶: 唔緊要呀, 我未去過機鋪, 想去見識下
我: 咁呀, 好啦, 我而家係4樓Green Zone電梯位
寶: 好呀, 咁我而家即刻過泥啦.
阿王, 阿禮, 阿K同一時間望著我問: 仲有人join?
我: 係呀, 仲有個ELC 個同學一齊去
過了一會, 阿寶來到. 大家的表情是矇起眼, 羡慕又帶點妒忌的看著我.
阿禮: 你條友真係邪惡, 又有新女
我: 唔係呀, 唉, 總之, 一言難盡啦
阿寶行到我們面前.
寶: 大家好呀, 你地係阿月朋友呀, 我叫阿寶呀
我: 呢個係阿王, 呢個係阿禮, 呢個係阿K, 咁, 我地人齊, 行得架啦喎
阿王故作戲弄的語氣: 好, 人齊啦, 咁呀, 快d 行啦要
阿禮, 阿K: 行, 緊係啦
我知他們在揶揄我, 但也沒法作任何辦解, 只好照樣出發.
到了機鋪, 我們都拿著各自的車卡, 在玩頭文字D, 我見阿寶站在一旁, 好像很悶, 於是我問她要不要玩.
我: 妳係咪好悶呀? 我俾妳玩下丫
阿寶笑笑回應: 唔使啦, 你玩啦, 我睇下得架啦.
我: 咁好啦
我繼續玩, 玩了大約半小時, 見阿寶仍然站在旁邊, 我怕她會悶, 於是向阿王他們提出我要走先. 他們亦知情悉趣, 繼續打機沒有再次揶揄.
離開新之城, 我問阿寶: 妳肚唔肚餓呀? 要唔要去食飯?
寶: 好呀, 食咩呀咁?
我: 不如食pizza hut啦
寶: pizza呀, 都好丫
於是我們去到百老匯戲院斜對面, 地庫的那間pizza hut吃晚餐.
我: 妳想食咩呀?
寶: 不如我地點呢個2人餐share丫, 我見d 情侶都係點呢個架
我: 乜呢度有情侶餐架咩?
寶: 咁拍拖緊係要點d 二人餐架麻
我: o我, 咁好啦.
點完餐, 吃完飯後, 阿寶提議要去散步.
寶: 不如去尖東海旁散下步丫我地
我: o下, 夜啦喎, 八點幾九點啦喎, 妳咁夜返屋企有無問題架
寶: 唔緊要啦, 我同左屋企人講今晚做project 夜d返
我: 咁, 好啦.
我們在信和門口坐巴士, 到了天星巴士總站, 行過去海傍, 沿途有很多情侶拖著手漫步, 我和阿寶是分開, 各有各在行. 阿寶見到其他人都拖著手, 於是, 行到大約新世紀酒店附近.
寶: 阿月呀, 呢度人人都拖住手行, 不如我地都拖住行啦.
我: 乜唔係唔可以有身體接觸架咩?
寶: 咁要睇場合架麻, 呢度氣氛好好, 拖住行幾浪漫呀.
見阿寶越是開心的去拍拖, 我便越內疚. 我們一邊拖著手, 一邊行, 行到大約帝國中心對出, 我停下, 叫阿寶一起坐在欄杆上. 我想和阿寶說清楚, 不想做欺騙她感情的賤男.
我: 阿寶呀, 其實呢, 我同妳講過, 我試過戀愛, 但無拍過拖, 妳記唔記得呀?
寶: o我, 記得, 不過我唔係好明你講乜
我: 其實係咁架, 我中四時候鍾意左個女仔叫做嘉嘉……...
我把我和嘉嘉的事說給阿寶聽.
我: 我仲等緊佢, 所以, 其實我唔可以同妳拍拖架.
阿寶聽過後, 眉頭緊鄒, 雙眼有點水汪汪, 氣氛亦變得十分沉重.
我: 其實我而家咁同妳拍拖, 雖然我地係以一個sem為限, 但係我都覺得咁對妳係好唔公平, 因為我當左妳係嘉嘉既替身, 我對妳真係無感覺架, 我唔想玩妳呀.
阿寶聽完後, 擦擦眼上還未掉下的淚水.
寶: 其實, 我都好明白, 我地前後識左只係三星期左右, 要真正咁當對方係男女朋友其實好難. 而我亦都好明白, 要妳對住唔係咁熟既我, 好似女朋友咁關心亦都係無可能.
其實我唔介意你鐘意既係嘉嘉定係真正既我, 我只係覺得, 你係個好人, 唔會佔我便宜, 我信得過你, 所以想搵你幫我試下拍拖既感覺.
而家都十月, 呢個sem到十二月尾就完結, 不如我地繼續落去啦.
到十二月廿五日聖誕節, 我地約出泥交換禮物, 如果到時, 我地可以接受到對方, 想繼續落去既話, 我地就送隻熊啤啤公仔俾對方, 若果, 到時都係接受唔到既, 我地就送盒朱古力俾對方, 然後坐番係呢個位, 一齊食, 留番個甜蜜既回憶俾大家好無?
見阿寶越說越激動, 淚流滿面, 因為我最怕見到女人哭, 所以……我又應承左.
阿寶說完後, 我和她拖著手, 沿著海傍, 向海港城方向回去, 行至地鐵站, 送阿寶入閘, 我便離去.
此刻, 其實我真的仍未能接受到阿寶, 但既然己經向她說了我的感受她也不介意, 而且大家有了聖誕節的約定, 於是, 我決定在聖誕節前的這段期間, 努力去扮演這個男朋友的角色, 算是為一個欣賞我的女仔留點美好回憶吧.
之後一天, 星期三, 我知阿寶下午才上課, 我主動打電話給她, 約她到又一城food court 吃飯.
我: 阿寶, 妳返到泥未呀? 我想同妳一齊食飯呀
寶: 我坐緊地鐵, 就到架啦
我: 我係又一城food court 買定餐, 霸定位先, 妳想食咩呀? 我幫妳買左先丫.
寶: um…有咩揀呀?
我: 嗱, 有士多forever, 肯德基, 大家樂, M記啦……
寶: 我要份士多forever茄汁雞扒飯, 飲熱檸茶丫
我: 好呀, 咁妳差幾耐倒到呀?
寶: 大約二十分鍾左右啦
我: 好, 咁我係度等妳啦.
為免阿寶來到時食物凍晒, 所以, 我在大約十五分鐘後才去買餐.
不久, 阿寶亦到來, 抖著大氣地說: 唔好意思, 遲左小小, 我趕住過泥架啦.
我: 唔緊要, 男朋友等女朋友應該架麻, 食啦快d, 妳趕住上堂架
寶: 點解你四個字前買, 到而家仲熱既?
我: 我用火遁燒番熱佢囉
寶: 火咩話??
我: 妳無睇火影咩?
寶: 我唔睇漫畫架
我: o我, 唔怪得啦, 快d 食先啦妳, 遲到架啦
於是阿寶很快吃完飯, 然後伸手摸摸我的頭, 乖乖呀, 幫我買飯.
我: 洗乜講.
寶: 你跟住使唔使上堂呀仲?
我: 今日唔使啦, 等陣約左阿王佢地去睇戲
寶: 睇咩戲呀?
我: 呢個問題呢……Um……總之係大導演, 大明星, 大製作啦
阿寶見我欲言又止, 立即用她女性的本能去尋根問底.
寶: 邊個大導演咁巴閉呀
我: ………..總之係好片啦
寶: 最近聽聞上左套色戒喎, 你有無聽過呀
我扮天真樣子
我: 吓?? 係咩??
寶: 哦, 你死呀你, 我去上堂, 你就同朋友去睇咸片
我: 唔係咸片, 我地係從藝術角度去欣賞李導演既製作既
寶: 即係認啦, 去睇色戒啦
我: 唔係色戒, 睇魔戒啫,
寶: 魔咩戒呀? 而家有上新一集咩?
我: ……….Um……我唔識講啦
寶: 哈哈, 玩吓你咋, 咁大個人, 鍾意睇咩咪睇囉, 一班朋友去睇咸片都幾開心丫
附近的人聽到我去看色戒, 開始看過來望我, 我有點尷尬, 低著頭喝可樂.
我: 喂, 死婆, 唔好再講啦, 冚世界都知我等陣去睇咸片啦
阿寶聽到我說這句, 笑得打口中的飯噴到我臉上. 原來阿寶的笑點也是頗低的.
我怒視了阿寶一眼, 她忍著笑, 低下頭繼續吃飯, 而我則用紙巾清理阿寶噴在我身上的飯粒.
送了阿寶回校後, 我去了奧海城會合阿王他們.
王: 月, 我地買左飛啦, 但係無晒位, 得番頭果行咋喎
我: 無所謂啦, 頭果行睇得仲大仲清楚啦
禮: 成幾個鍾, 顎到頸都緊埋呀實.
K: 無計啦, 太搶手啦, 張就下啦.
王: 點呀月, 頭先去同邊條女食飯呀?
我: 咪阿寶囉都係
禮: 你條友仔, 第一次見你仲係失戀, 唱K唱到喊, 而家就咁多女
我: 唔係你地諗咁架, 唉, 你唔明架啦
王: 仆街, 我都想同你換呀
我們到百佳買了很多薯片汽水, 偷運入場, 我相信沒有人會買薯片汽水去看咸片, 我們都算是另類.
看見海報的女主角湯唯的漂亮面孔, 我相信看完此片後回家必定忍不住打十八回合的J才能罷手.
抱著很大期望, 很大色心的我入到場後, 抬著頭看. 一聽對白, 心想: Lai 野, 乜普通話泥既?? 但, 算, 我的目的不是聽對白, 或許之後的內容是很精彩.
然後, 看了大約半小時, 仍然是愛國青年的刺殺策劃.
過一會, 終於到了女主角和其中一名男角的床戲. 我們四個麻甩仔終於停止吃薯片, 注意力放回畫面. 可惜, 全個過程, 除了看到湯唯的表情外, 所有事都是收在被子裏進行.
此刻, 我們對此片的性趣己經被消弭了一半了. 然後, 又再等大半小時, 到了偉哥和湯唯的床戲. 雖然這次的床戲終於是一絲不掛, 肉帛相見, 但因為我們坐的是第一行, 加上女角是天使身材, 所以, 看到最大的, 只有偉哥的”羅漢果”.
我們終於對這齣戲死心, 大家都在食剩餘的薯片, 好不容易才捱過這沉悶的二個半小時.
我們一離開戲院, 第一個反應是.
王: 屌, 差d訓著呀我, 好悶
我: 係呀, 估唔到我第一次入戲院睇咸片會係咁架.
禮: 仆街, 早知去好景買四仔睇好過啦
K: 施主, 空即是色, 色即是空呀
我: 咁你地去唔去好景呀?
王: 梗係去啦, 我要去買番兩套日本愛情動作片平衡下心理呀.
此時, 我的電話響起.
寶: 點呀, 咸濕仔, 好唔好睇呀
我: 唉, 唔好提, 差d訓著.
寶: 咁你而家去邊呀?
我: 無呀, 番屋企架啦.
寶: 好啦, 我打泥睇下你點姐, 我都番屋企架啦, 咁我地今晚ICQ傾丫, 88啦咸濕仔
我無話可說, 說了句拜拜. 回家和阿寶在ICQ 說我們看色戒的感想後, 她忍不住打電話來說我低b, 然後笑個不停.
我心想, 其實有她做女朋友也算不錯, 至少樣子有保證, 她笑點又低, 引她笑又容易, 問題是我最後能否放下嘉嘉呢?