《香港唔係追夢既地方》: Episode 07
Episode 7
「終於交埋份 Project，可以抖下。」我伸左個懶腰，同身邊既 Jack 講。
「係，搵班 friend子食下飯先。」Jack 講完之後就開開心心禁住電話彈住咁跳走左。
好，我又搵下班老友仔先。
【Sorry 呀！我要陪 Sophie 呀今日。】好，Chris 放左飛機，唔緊要，我仲有兩個！
【下次，今日有野做。】咁冷傲既 Lok 都放左我飛機……唔緊要，我仲有最嘴賤既 Aaron！
【喂 Sor 9呀，上緊保險堂，下次先，鍚返呀。】屌，錫你老母呀！
唔緊要，我仲有個乖乖女朋友仔！
【你唔記得我今日養左我班小學同學咩？你無野做咁一齊來傾下八婆野囉。】得，咪搞我。
結果我都係要返屋企，玩下我二奶，即係我支結他，佢係永遠唔會離棄我既好寶貝。
行行下，經過學校個大hall，見到好似有人排緊戲，令我忽然諗起上年玩OCAMP 做組爸既時候識既一個組老婆，Renee。
講起呢個 Renee 就好笑，佢個樣真係唔差，仲幾靚女，不過佢性格一絕，所以我同佢唔單止無一齊無曖昧，連 Jamie 都無妒忌，因為我同佢實在太好朋友。
Renee，係一個心地亦正亦邪，做野好爆既女仔。佢呢，本質上都係一個好人，但係好多道德界線上既野，佢係唔理既。即係佢會主動叫我食組女，但佢明知我有女朋友。
仲有，佢係好爛口。
不過我認為，每個人既人生裡面，都應該要有個呢種咁既仆街朋友，總唔可以淨係得天使，無惡魔襯托下架？
「喂！仆你個街，係到做咩呀，好耐無見喎！」Renee 兜野拍落我背脊到，屌，好撚痛。
「其實你唔出聲都係一個靚女來，但你一開口成件事就錯曬，你有無考慮下扮下啞妹一日？」對住佢，把口可以唔收，都幾舒服其實。
「而家係唔係我講野個陣，我D五官會自己走位呀？」屌，駁你唔到喎又真係……
「排戲呀？」即刻轉移話題先，同佢串落去無著數。
「係呀，你呢？」
「返去練下結他咁囉，無咩做今日。」
「哦……咁爽……好喇，我返去排戲喇，遲下再傾。」Renee 揮揮手，準備走。
點知我轉身行左兩步，佢忽然叫住左我。
「喂！Tony！咪行住！」Renee 勁大聲咁叫，唔講仲以為我偷左佢野，咁鬼惡……
「你有無興趣同我一齊搞AP？」Renee 忽然問。
「AP？」
「屌，Annual Performance 呀！」
「下？你想我做咩？我都唔識做戲。」
「但你識彈結他同唱歌丫嘛，我地想搞音樂劇，有無興趣？」Renee 興致勃勃咁問。
音樂劇？似乎幾有意思。或者，呢個都係一個機會，畀其他人認識我。
無錯，唔應該放棄任何一個機會。
「咁就要傾傾佢喇。」我同 Renee 講。
-
「小伙子，長大了，在世事難料的森林……」我彈住結他，唱住呢首 Supper Moment 既小伙子，份外有感受。
根據 Renee 所講，套音樂劇既主題係講一個男仔長大既變化，由男仔轉變成男人既過程。唱住呢一首歌，好似感受到，自己都有種回不了過去既感受。
時間唔會返轉頭，過左去就係過左去，長大左就係長大左。細個有好多問題都可以唔理，畀大人去處理，有好多野都覺得可以將來先算，將來大把時間諗。
到左二字頭，先至發現，青春真係一去無回頭，原來自己已經無咩青春可以揮霍。
聽住坤哥既COVER，覺得坤哥好遙遠，可能到我去到坤哥而家既位置，我已經係阿叔、或者已經變左個佬。
原來老，比起好多野都可怕。
-
【喂，我地幾兄弟少見左好多呀，幾時可以齊人食個飯呀！】我忍唔住係Whatsapp Group 咁同佢地講。
【一星期後，我得閒！】Aaron 終於覆機。
【下星期我得呀，Sophie 批准！】Chris 都得喇。
【大家都得，咁我都一定得喇。】連 Lok 都得，齊人！
-
我一早已經到左大排檔，等佢地來。首先來到既係 Chris。佢無咩點變，但原來距離上次見佢，已經係個幾兩個月前，佢好似蒼桑左……
「哇，兩個月無見姐，你老左咁多既？同 Sophie 好激呀？」我開玩笑咁講。
「唉，我都想，可惜唔係。」Chris 歎左口氣。呢個時候，Lok 都到左。
Lok 望落反而後生左，精神左，個人都感覺開朗左。
「春風滿臉咁既你？」
「係咩？可能個人訓好左掛。」Lok 依然冷傲，但佢有種講唔出既開心感覺，同蒼桑既 Chris 好大對比，明明 Chris 先係有拖拍個個，點解會倒返轉？
「以前明明不嬲都係 Aaron 最早架嘛，佢今日咁遲既？」Lok 問，係喎，唔講都唔覺。
「佢到喇……咦，我有無認錯人？」Chris 捽捽眼，指住前面，我地一齊望過去，發現一個立曬 all back 頭，著住西裝既男人走過來……
無左副眼鏡、無左陣毒味……佢係 Aaron？
「喂 Sorry，來遲左。」Aaron 好有禮貌咁坐低左。
「咁有禮貌，你轉左性？」Chris 問。
「做呢行要對人好D既，轉個形象，都幾好丫。」Aaron 把聲都無以前咁嘈。
「做咩好做唔做，做保險佬？」Lok 問，Aaron 即時截住佢。
「拿拿拿，我唔准你咁講，我就係唔係保險佬，我係財務策劃主任，Financial Planning Officer。」Aaron 一本正經咁講。
「下？」我地三個一齊下左聲。
「我係有賣保險，但我就唔剩係賣保險既，我仲可以幫你地整合強積金喇、整儲蓄計劃喇……」
「咪住先，今日出來食飯，你唔係諗住出來 Sell 我地下話？」Chris 有少少燥底咁講。
「唔係話 Sell，但我做左呢行先發現，意外既野，其實真係意料之外，其實都係買個保障……」
「屌，收嗲喇你！」Chris 真係好燥底，今日大家都好唔同……
「冷靜D先 Chris！喂 Aaron，食飯唔講公事，Okay？」我嘗試冷靜大家，我只係想同班兄弟聚下舊姐。
「啤啤佢喇好嘛？喂唔該一打藍妹！」我即刻向個伙計落單。
「得，唔講公事，無問題。」Aaron 笑笑口咁講。
「又話想夾 Band，做咩無喇喇走左去做……」我正想講保險佬，不過都係收返。
「財務策劃。」我苦笑左下。
「係朋友介紹我既，唉講真我讀書又唔叻，唔通我真係組樂隊咩，夾BAND出SHOW都無人睇喇，香港邊有人中意睇BAND，你話係咪？」Aaron 講，但佢似乎無唔開心。
「後來我朋友就介紹我考保險牌，考完又有錢收，咪試下囉，點知上上下佢既堂，又覺得間公司講得幾有道理，講真丫，人生真係話唔埋架嘛，好似你個中學朋友 Jayden 咁丫，咪一樣……」Aaron 提起 Jayden，令我即刻疾左疾。
Aaron 都知自己講錯野，所以即刻轉一轉。
「我覺得呢份工，又幫到人，又幫到自己，何樂而不為呢？就好似你地咁丫，唔買保險，無問題，我都仲有個儲蓄計劃，你地都諗住結婚架？結婚都要一大筆錢喇，你地忽然嘔出來咩？就係靠儲錢喇……」
「屌！你講撚夠未呀！」Chris 一野拍落張台到，嚇親隔離台。
「喂，唔好咁喇。」Lok 拉一拉 Chris。
「屌，你同我食埋佢呢餐，未食都飽撚曬，你慢慢9 UP 喇保險佬！」Chris 臨走仲對 Aaron 舉左隻中指。
「喂！Lok，你畀住先！我去睇睇佢！」我同 Lok 拿拿聲講低聲，就衝出去搵返嬲爆爆既 Chris喇。
唉，好地地一餐飯，做乜會搞成咁架？我知道，佢地三個，都發生左D野，尤其係 Chris。
未完待續