《香港唔係追夢既地方》: Episode 08

Episode 8

「喂！Chris！」我衝出去拉住 Chris，Chris 勁大力甩開我隻手，佢真係好鬼大力。

「又點呀！」

「係我呀，唔係 Aaron，唔使咁嬲。」我笑笑口，睇到 Chris 陣火都無咁勁，開始冷靜落來。

「係咪發生左咩事？你未試過咁。」我好好耐性咁問佢，Chris 終於都肯靜靜咁聽我講。





我同 Chris 走到去公園長凳，決定坐低靜靜傾下。

「我同 Sophie 可能……可能要分手。」Chris 好冷靜咁講。

「下？點解？到底咩事？你唔係好中意佢架咩？」我真係好出奇，因為 Chris 明明好錫 Sophie，真係當佢係老婆咁錫……點解無喇喇會分手？

「係，我係好中意佢，好愛佢，甚至連我既夢想，都係有佢。」

「但我發覺，夢想好多時都係基於金錢，無錢既話，你咩都唔使諗。」Chris 好頹咁講。





「前個排你問我有咩夢想，我自己都諗左好耐，到底有咩係我會想做？我發覺我自己真係好中意打籃球，我好想做籃球員，我好想做第二個林書豪，第二個 Kobe Bryant。」

「但係……我真係好無用，我而家日練波夜練波，有咩用？我連買波鞋既錢，都要借 Sophie 既用住先……我真係好憎我自己。」Chris 用手遮住自己塊臉，我知佢唔係喊，佢只係面對唔到自己。

「我知 Sophie 唔介意，佢同我講，遲D 還咪得囉，我知佢唔介意……但我介意，我唔想靠佢，如果我要靠佢，我仲點養佢？我真係一個好失敗既男人。」

「男人最痛既，係係最無經濟能力既時候，遇到真係愛既女人。而家，我就係呢個最痛既男人。」Chris 苦笑咁講。

「所以你聽到 Aaron 講結婚你就咁嬲……」我終於明白 Chris 既感受。





「做運動員，可能連自己都養唔掂，我仲點養佢？Sophie 食好住好，唔通我要佢受苦？唔通要我靠佢外家？我真係做唔到，我寧願乞食，起碼我乞食都係靠我自己對手去乞！」

「就係咁，我同 Sophie 嘈左一大輪，佢到而家都無彩返我，我諗……就算幾唔想都好，都要完結喇。」

「唔使咁灰既……或者……」我想安慰佢，但我根本講唔出任何野安慰 Chris。

「或者咩？或者香港呢個政府會大力推動下運動？令人可以睇到希望？係香港有幾多人係中意運動但係唔敢去做運動員？」Chris 冷笑左一下。

「要追夢，都要睇到前路，先令人敢去追既。」Chris 無奈咁講。

我無野好講，因為現實就係咁殘酷。錢，錢，錢。

錢，真係唔係萬能，但係香港無錢，真係萬萬不能。無錢，隨時連你心愛既物、事、人，都守護唔到。

望住 Chris 呢個巨人比現實呢個更巨大既怪物打倒，我感歎自己原來咩都做唔到。





-

「小伙子，體會了，在歲月沉澱堅持，最後也寫上，脆弱的詩。」

「感觸懸浮在那日桑田，緊閉著眼睛，承認過去錯過的事。」

「現實裡裝英勇難避免，成為了不懂哭也不想笑的一個漢子。」

「活像木偶誰會在意？在幻變領略了，最重要……」

呢首小伙子，我今日練習左好多次。我一路唱，一路諗起 Chris、Sophie 同 Aaron。故事真係好無奈，可惜我地都無能力去改寫，咁荒謬既劇情。

-





「香港，真係唔係追夢既地方……係香港，講夢想，會畀人話，傻的嗎？」Renee 係台上練習緊佢既台詞，呢D對白真係攞命，咁入肉既，真係想問，邊個係編劇？

「Tony。」

係咪有人叫緊我？我唔係編劇喎……

「Tony。」

個故事咁似 Chris 既？係咪照佢經歷寫架？

「喂！我叫你呀！醒未呀！」Renee 兜野拍落我個頭到，總算叫返醒我。

「Sor 9，岩岩發緊夢。」

「睇得出，唔通唱緊歌咩，到你唱你都唔郁，做咩呀？好多煩惱呀？」Renee 坐左係我隔離問。





「哦，無……只係覺得個故事，好似我個朋友。」

「其實呢個故事，一樣都係好多香港人既故事，因為根本好多香港人就係咁慘，連生活都好似好奢侈咁。」

「好似我咁丫，想做演員，可以點丫？唔通真係去報TXB既藝員訓練班咩。」Renee 講，雖然佢平時惡死能登，但佢原來都有為生活感歎既時候。

「你咁勁，編到個咁好既劇，做編劇仲好喇。」我講。

「呢個劇唔係我編，係另一間學校既同學幫手一齊編，咪我地劇社主席個女朋友，佢今日都有來。」Renee 放眼望去台下，似乎搵緊個個女編劇。

「呢！咪長長地頭髮、卷髮果個囉。」Renee 指住遠方既一個女仔。

我望真D，個個女仔咁熟面口……





佢咪係……

Sherry？！

未完待續