《香港唔係追夢既地方》: Episode 09
Episode 9
我離遠望住觀眾席上睇排戲既 Sherry，成個世界好似靜止左咁，一幕一幕回憶湧上心頭。
有時我成日都幻想自己會見返佢，然後我會好型咁問佢：「你最近幾好嗎？我幾好。」
直至今日真係見返佢，我先知自己根本無可能咁灑脫、咁有型。
到底，Sherry，你仲記唔記得我？你仲記唔記得我地一齊既時光？
我記得，我永遠都記得。
記得初戀既我係一個點樣既傻小子，只係識得好單純直接咁去愛你。初戀之所以令人刻骨銘心，係因為大家都係最懵懂既年紀遇到對方，然後單純咁去愛過，拋棄現實去愛。
個陣時，我地仲係會傾通宵電話既時候；
個陣時，我地仲係密密SMS但驚比屋企人見到既時候；
個陣時，我地仲係中學互相暗中留意但唔想比對方知道既時候。
個陣時，我地仲係最單純既時候。
你，仲記唔記得我？
唔知係唔係眼神交流總係會令人有所感覺，Sherry 感覺到我望住佢，然後佢望住我。
佢點點頭，微微笑左一下。
好清脆、好大方既一下微笑，已經勝過千言萬語，或者呢下微笑已經表達左佢想講既野：「我而家生活好好。」
我都微微笑左下，然後繼續同 Renee 討論套劇。我明白，我根本唔應該再有咩幻想，我既生活已經好完美，有 Jamie 呢個咁好既女朋友，我應該要知足。
係，知足。
-
自從個次 Chris 同 Aaron 鬧翻之後，我地四兄弟都無再一齊食過飯中，感覺生疏左好多。
原來，人生真係無咩係可以保持一世不變，再好既朋友，終有一日都會離開你。無論你幾唔捨得都好，你都要捨。
Aaron 做左保險經紀之後，搵親我都離唔開保險之類既話題，當佢發現我唔太理佢既時候，佢都識做，唔再講落去，不過慢慢我地就再無咩話題好講。
兩個人生活既圈子越來越遠。
至於 Lok 就仍然都係神神祕祕，我感覺到佢係拍緊拖，但到底係邊個女仔？係咪我識得架呢？點解唔同我地講呢？
而 Chris 就一日殘過一日，可能佢真係好掛住 Sophie。
我就基本上成日同 Renee 去左排戲，準備即將上演既音樂劇。同時亦都準備畢業之後搵工既事。
係喎，計落日子，新一輪DSE都準備開考，唔知 Jimmy 同 Sandy 又點呢？
-
今日我約左 Jimmy 同 Sandy 出來食飯，距離上次見面原來已經係雨傘運動既時候。
希望今次呢餐飯唔好好似上次個餐咁，不歡而散喇。
Jimmy 終於出現，佢戴左副眼鏡，精神比起之前明顯差左好多，仲消瘦左唔少。睇來DSE真係畀左好大壓力佢。
「Jimmy，點呀你，緊唔緊張？」我問佢。
「唔緊張就假，唉，陣間快快手食完要繼續返圖書館溫書。」Jimmy 個神情仲係好憂慮，完全半點開心都睇唔到。
其實，讀書唔係應該開心架咩？以前人人都會話，你呀要好好珍惜讀書呢段時間，到你返工就會知道有幾辛苦架喇。
但我覺得，而家係香港讀書，先係真正既辛苦。
一試定生死，人人都為左考好DSE而使盡渾身解數，讀書就變左好似為左考試咁。一考唔好、唔想考，就變左社會既異類，係錯、係罪人。
屋企人既期望、同輩既競爭、社會無形既壓力，好似慢慢扭曲緊呢班學生既內心。我地有好多課堂可以教佢地考好個試，但偏偏無一個課堂教佢地可以活得開心、活得無悔。
睇住 Jimmy 我覺得好唏噓，一方面好感恩自己早幾年出世，仲有幸上過已經取消左既家政堂同木工堂。但一方面都好替佢地痛心，點解佢地最美好既時光，會畀DSE摧毀。
應該色彩繽紛既，但就變到好灰暗。
正當我唔知講咩好既時候，Sandy 就來左。佢望落好精神，而且無左 Jimmy 個種⋯⋯好沉重既壓力感覺，佢成個人望落都好輕鬆。
好大既對比。
「喂，咁開心既你？」我問佢，連 Jimmy 都忍唔住望住佢。
「係囉，你唔使溫書咩？」Jimmy 問佢。
「唔使呀。」Sandy 好輕盈咁講。
「點解？」Jimmy 好出奇咁問。
「我決定唔考喇。」
「唔考？可以唔考架咩？咁你做咩？」Jimmy 好緊張咁問。
「係囉，你諗清楚未架？」我都打左個突。
「諗清諗楚，我決定左去做廚師學徒。」Sandy 一臉無所謂咁講，但我感覺到佢個種堅定。
「下？你想做廚房妹？」Jimmy 問。
「係呀。」Sandy 好爽朗咁答，不自覺令我有少少佩服佢。
「好辛苦架喎，又雜⋯⋯」Jimmy 好擔心咁講。
「有咩工係唔辛苦架，辛苦就預左架喇，但如果辛苦係我覺得值得既，咁有咩所謂？我覺得，做人就最緊要開心。」Sandy 非常豁達，估唔到佢人仔細細已經咁識諗。
「我預左無人會支持我，包括我屋企人，但終有一日，我會證明畀你地所有人睇，我今日行呢條路係無錯。」
「阿爸阿媽講既野好多時都係岩既，我唔否定。但人生係我自己既，我應該要為自己作出選擇。」Sandy 好堅定咁講。
「Think for others, but live for yourself⋯⋯」我默念左呢句英文出來。
「下？」Jimmy 同 Sandy 都聽唔清楚。
「哦，無⋯⋯你講得好岩。為別人設想，但為自己而生活。」我照譯返做中文同佢地講，佢地點曬頭，覺得我講得有道理。
其實呢句說話，係 Sherry 仲同我拍拖既時候教我既。佢成日都同我講，愛人先要愛自己，一定要為自己而活，先對得住自己既生命。
佢講得好岩。
-
「如果想我哭，新歡請你給我一一的預告，愛我你沒愛都一句沒有難度，誰都不曾留住你，別太清高⋯⋯」咦，幾好聽喎首歌，邊個唱架？
「咦，幾好聽喎，首歌邊個唱架？」係CD鋪門外就有個女仔問佢男朋友，正係我想問既。
「呢個？我都唔識喎，但好熟⋯⋯」個男仔都唔識答。
「呢個咪方皓玟囉！」職員忽然搭左句嗲。
「方皓玟？好似聽過下⋯⋯」個女仔講。
「聽鬼聽馬咩，你淨係識陽光點的歌架咋嘛，I say one two three four~」個男仔笑佢女朋友。
方皓玟，我唔知點解開始對呢個女歌手好有興趣。
-
過多幾日，原來已經差唔多係音樂劇 on show 既大日子，我仲叫 Jamie 同佢既朋友一齊捧下我場。
話曬今次都算係我人生第一次上台而唔係比賽，而只係純粹表演。感覺就好似歌手去登台咁⋯⋯唔知登台係咩感覺架呢？
我如果係台上面，要多謝身邊既人，我一定會多謝我老母喇，Jamie 喇，仲有⋯⋯我班兄弟，雖然唔知道仲可唔可以四個齊人。仲有 Jayden，仲有⋯⋯Sherry。
如果無佢，我可能唔會有今日。如果唔係佢當日話中意男仔彈結他同唱歌，可能我都唔會愛上呢樣興趣⋯⋯
-
終於到左 on show呢一日，我緊係悉心裝扮，準備我既處女秀喇！
我就係舞台上既一角準備，睇住班演員落力既演出，我覺得好熱血，好興奮，原來一班人去努力做一件事個感覺，係咁正咁爽！
Renee 演技真係一流，將來有機會畀佢做電視劇，我一定會捧佢場。
好喇，準備喇。只要燈光一下，然後照住我，然後我就會係全世界既焦點，大家都只會細心聽到我既歌聲。唔知道黑媽媽既觀眾席上面，有咩人會係到聽緊我唱歌呢？
忽然間，全場燈光一滅，然後有射燈照住我，我就知道，係我既 show time 喇！
Music！
「沙⋯⋯沙⋯⋯」
咦？音樂呢？
「沙⋯⋯沙⋯⋯」
唔係咁玩我呀嘛⋯⋯
未完待續