《香港唔係追夢既地方》: Episode 14

Episode 14 

我約左 Chris 出來食飯，但佢話佢放工時間唔定，於是我就話我去等佢收工喇，佢又叫我唔好。問佢做緊咩工，又唔答我，神神祕祕，咁我唯有去佢返工附近既地方等佢。

 去到行左一陣、等左一陣，已經九點幾，但佢仲未打來，佢到底做緊咩？ 

不經不覺行到去商場，我見到有班西裝友好似搵獵物咁周圍捉住人問，我望左望，原來係地產經紀叫人睇樓⋯⋯

 佢地為左賣得出單位，真係咩都做得出。 





「先生睇唔睇樓？而家XX豪庭開盤⋯⋯」有個地產經紀撲埋來。 

「唔使喇。」我冷冷咁拒絕左個地產經紀，心諗你係咪玩野，睇我個樣點樣買得起？ 

行多兩步，我回望左個堆地產經紀，當中有一個靚靚仔仔大大隻隻既，好熟面口⋯⋯ 係⋯⋯係⋯⋯係 Chris！

 我口都震埋，望住佢，我唔識反應。呢個時候，佢亦終於望到我，我地都一臉尷尬複雜。 

- 





我地兩個坐左起大排檔，叫左兩個麵。明明大家都應該好肚餓，偏偏無人郁、無人出聲。 我真係唔知講咩好，因為我從來都無諗過咁有夢想同運動天份既 Chris 居然會走去做地產經紀⋯⋯ 

睇住佢都屈服係現實之下，令我覺得特別心痛、特別沮喪。 

「點解你會⋯⋯」我決定打破呢個冷漠。 

「我會⋯⋯做呢行？」Chris 笑左笑。 

「其實我都唔想畀任何人知，做地產⋯⋯我自己都諗左好耐。」





「我唔係想係呢行發展，我只係⋯⋯」Chris 一副欲言又止咁既樣。 

「講喇。」我堅定咁望實佢，希望佢可以面對自己，將所有野講出來。 

「我只係⋯⋯需要錢，需要好多錢。」 

「做咩事？係咪你屋企⋯⋯」我即刻緊張起來。 

「唔係，唔係⋯⋯我只係想證明自己，可以畀到幸福 Sophie，我只係想買一層樓、一個單位⋯⋯」 

「只要我做得成一單生意，我就等如你地幾個月甚至成年既收入⋯⋯」 

「你同 Sophie 到底搞成點？」我問佢。 

「我同佢⋯⋯好耐無見喇。自從個次鬧大交之後，佢都無理返我。我知道佢仲係中意我⋯⋯但如果我咩成績都無，就返去搵返佢，我覺得自己根本唔係一個男人！所以我做呢行，我要好快、好快買間屋返來，證明畀佢、畀佢屋企人、畀全世界知道，我係可以畀到幸福佢。」Chris 雙眼忽然充滿幹勁，睇來 Sophie 真係佢好大既動力。 





「但係⋯⋯都唔知係好彩定唔好彩，好耐之前我咪拍左段片參加個個打出名堂既，入選就可以見到 Kobe，甚至仲可以得到佢既指導！可以同 Kobe 傾計甚至打波係我一生最大既心願！而我段片⋯⋯竟然入選左！」Chris 比起岩岩，仲更加興奮，不過好快又變返失落。 

「咁咪好囉！你恨左好耐喇⋯⋯啵⋯⋯」我忽然收左口，因為我霎時間明白，點解佢會咁失落。 

Sophie 同 Kobe，佢應該要點選擇？現實同夢想，又會點揀？ 如果要你平平凡凡過一世，但係同你最心愛既人一齊，你會唔會捨棄你既夢想？定抑或是你會成為夢想中既你，發光發亮贏盡掌聲、花盡一生係你最中意既興趣上面，然後贏盡全世界，但錯失你一生最愛最愛既人？ 呢個問題，比起老婆同老母跌落水你救邊個，仲難答、仲難揀。 

「哈哈，世界就係咁殘酷，一定要你捨棄一樣野，先有可能換到另一樣野，仲要唔係包保一定得喎。」Chris 歎左一口氣，以前成日聽講有捨先有得，定係到最尾我地捨棄左，都未必得到呢？ 但我忽然諗到一樣野。 

「你想要間屋送畀 Sophie 姐！我有辦法！」 Chris 即刻好好奇咁望住我。 

我知道呢個辦法可能有少少無賴，但亦都係唯一一個可能係兩全其美既做法。


未完待續