《香港唔係追夢既地方》: Episode 15
Episode 15
睇住 Chris 同 Sophie，令我諗起一首歌。
李克勤既紙牌屋。
希望佢地，可以過到呢一關。
「殘忍的 人生中 渴望有情人與共
可記得 找到他 你曾如何地放鬆
如今的 危機中 要是綿羊學懂珍惜那牧童
總能 包容 他掀起那份痛」
-
（以下為 Chris 的主視點角度）
我同 Tony 傾完一輪，發覺佢講既幾有道理。人係唔應該放棄夢想，向現實低頭。但亦都唔應該為左夢想而漠視一切。
我已經無見 Sophie 幾個月，我真係好掛住佢，Tony 講得岩，一段關係唔會等得好多年，如果我再唔追返佢，終有一日佢會畀第二個男人帶走⋯⋯
所以，我鼓起左勇氣，約左 Sophie 出來，同時亦都聽 Tony 所講，準備左一份驚喜畀佢。
-
我一早已經到左沙灘，呢到入左夜之後就無咩人。而我份「驚喜」亦都準備好。
海風吹住我，有一種講唔出既寒冷侵蝕緊我，到底係凍，定係我驚？驚 Sophie 已經唔再愛我，驚我會失敗⋯⋯
越驚，就越寒。
呢個時候，我離遠望到有個女仔走緊埋來，係佢，係 Sophie。佢同以前一樣咁有氣質同貴氣，一樣咁優雅、一樣咁靚女。
佢頭髮好長，好亮麗，皮膚仲好白滑，身材高瘦既佢係我眼中就好似會畀風吹走一樣，令我好想捉實佢、攬實佢、保護佢。
「Sophie！」我叫左佢個名，揮手叫佢過來。
佢慢慢行左過來，佢好似唔係好開心⋯⋯
「好耐無見⋯⋯你幾好呀嘛？」我好生疏咁講左呢句出來，無見咁耐居然有一種生疏既感覺，唔知講咩好⋯⋯
佢無講野，只係點下頭。我知道，我唔可以再拖，我一定要把握當下，捉緊呢個眼前人。
「Sophie，我諗左好耐⋯⋯有 D 野我一定要同你講。」
「以前，我覺得自己好無用，中意打波、想去追夢，但係偏偏又窮又無錢，甚至連波鞋都要問你借錢。」
「我離開你，係因為我唔想靠曬你⋯⋯但最大既原因係，我唔想我畀唔到幸福你。」
「你由細到大，都係食好、住好，乜野都係最靚最好，我根本就無諗過你會中意我呢個窮小子。當我真係做到你男朋友個陣，我覺得自己好似發緊夢咁⋯⋯」
「但我個陣以為，夢係一定要醒。當我連自己都養唔掂既時候，我仲點可以叫你同我一齊？我太愛你，所以我要暫時放開你。」
「我想證明畀你地所有人睇、證明畀你睇，我係可以畀到幸福你⋯⋯我想買層樓送畀你，我想要我地既安樂窩可以誕生。」
我講講下，然後捧起擺起我隔離既一個盒仔，揭開左佢，然後畀 Sophie 睇。
Sophie 本身已經眼紅紅，佢睇到之後，掩住個口，難忍驚訝既表情。
「盒入面係我砌左好耐既紙牌屋，仲記得你同我講過，你話想第時要開放式廚房，咁你就可以一邊望住我，一邊做我既煮飯婆⋯⋯」
Sophie 已經喊到收唔到聲，而我自己亦都覺得對眼好熱好矇⋯⋯淚水令我睇唔清楚前面，但我就好似見到一幕一幕情景，係我同 Sophie 將來一齊生活既情景⋯⋯
佢好努力咁炒菜，我就行去佢隔離幫佢落油、洗米。然後一齊係廚房到對住食飯，唔使好豐富，可能每一餐只係粗茶淡飯，但已經好滿足。
「以前我覺得唔可以要求你為我再做D咩，但我後尾諗到，做人有時係應該要自私D，我想你等我，係我身邊陪住我⋯⋯我應承你我會好努力好畀心機，為我地既將來打拼⋯⋯」
「今日呢間只係紙屋，但將來我會送間真既畀你。」我抹一抹自己既眼淚，然後望住佢，Sophie 原來已經喊到收唔到聲。
「可唔可以，繼續留係我身邊？我會好努力咁返工搵錢⋯⋯」
佢竟然搖搖頭。
「唔得⋯⋯」佢把聲好沙，到底⋯⋯
唔通，真係錯過左，就追唔返？
「Sophie 呀，我真係會⋯⋯」
「唔係呀唔係呀⋯⋯你聽我講先喇！」Sophie 忽然打斷我講野。
「我既意思係⋯⋯你唔好再返個份工喇⋯⋯你去參加打出名堂喇，但我都會繼續留係你身邊支持你⋯⋯」Sophie 一邊喊一邊咁講，點解佢會知道打出名堂選中左我，點解佢會知道我返咩工⋯⋯
佢忽然衝過來攬住我，佢伏左係我胸膛，捉得我好實。
「傻佬！成日都唔聽人講野⋯⋯我從來都無話過介意你無錢無樓呀，做咩拋低我一個走去做地產？」Sophie 講。
「Tony 同完你傾之後，佢搵左我，同我講你既近況。我好好奇，我就去左偷偷睇你返工返成點，我睇住你逐個客問，經歷完興奮然後又失落，然後屢敗屢戰，再屢戰屢敗⋯⋯我睇到你好辛苦好努力，但我知道你根本唔中意做呢行，我個心好痛，點解你要為左我而做D你唔中意既野？」
「我要既唔係自己既幸福，係我地兩個既幸福，我唔想你唔開心，我唔想你委屈自己！」
「我可以陪你捱，我可以唔食好野，咪當減肥囉！同埋貴野一定好架咩？仲記唔記得，你第一次帶我去食燒味飯，我話去美心喇，乾淨D，你就捉左我去你屋企樓下間殘舊燒味鋪，你話同老闆熟，佢會加到好大盒飯，大到合唔實個蓋，要用橡筋扎住架呢？我個陣根本唔知道，原來細鋪頭係咁有人情味，我好中意，你帶左好多我從來未體驗過既生活畀我。」
「仲有呀！屋大一定好住架咩？屋大即係打掃得多架咋傻佬！要一房一廳咪夠囉！仲有呀，傻佬，你係咪唔記得左點解我要開放式廚房？因為我要你係出面同我一齊洗碗呀！」Sophie 笑笑咁講，但佢仲流緊眼淚⋯⋯
「無論你去到邊、想去邊，我都會陪你支持你。你打籃球，我一定場場係你隔離舉牌大叫架！」
多謝你⋯⋯多謝你⋯⋯
我攬實佢，佢都攬實我。
「你應承我，你一定要畀心機做你想做既野，盡力無悔，就可以喇，當你累，我永遠都會係你背後幫你揼骨按摩⋯⋯」
「Sophie。」我捉住佢，然後望住佢。
「做咩？」佢問我，我無答佢，我只係錫埋去。
由得海風幾大幾凍都好，我都會係你前面擋住，我會永遠係到保護你。
-
「揚起的 塵土中 要是兩人緣已盡
天塌的 一秒鐘 你們為何在抱擁
迷失中 尋初衷 歲月無情或者增加了裂縫
山窮 水窮 沖不走那份勇
從前你倆為什麼執手起誓
難捱的關口請你記住原委 努力保衛
同林鳥要是害怕半路墜毀
不只要分享所有美麗 愛美在一起賭上一切
難道回望這半生修到 默契 忍心作廢」
-
（回到 Tony 視點）
幾日之後就見到 Chris 辭左職，然後拖住 Sophie 開開心心食燒味飯。
佢地既故事，令我相信，原來現實世界裡面，都會有童話故事。
只要相信，童話就會出現。
呢個時候，我手機震左震。
【Tony，救命，我需要你幫手！】
Send message 過來既，竟然係 Sandy。
未完待續