《香港唔係追夢既地方》: Episode 16

Episode 16

Sandy 忽然 send 左個 message 畀我，叫我救佢！

下？到底發生咩事？

-

Sandy 急急約左我去左間M記見面，佢明明唔使考 DSE架喇，點解仲好似好大件事咁？





「對唔住！遲左到⋯⋯」Sandy 急急咁坐低。

「做咩事？救咩命？」我單刀直入問佢。

「我呢⋯⋯我想⋯⋯」佢兒兒我我咁。

「講喇？想做咩？到底咩事？」我問佢。

「我想問你借三百蚊！」Sandy 忽然好急咁講。





「下？做咩事？你屋企人無畀零用你咩？」我問。

「唉⋯⋯自從我同左佢地講，我唔考 DSE，要去學廚，直接做學徒，佢地就好大反應，又話趕我走又話點⋯⋯」Sandy 好灰咁講。

「咁最尾點？佢地點？」

「佢地無趕我走⋯⋯但佢地話，我去做學徒即係可以自己養自己，所以就話唔畀零用我，除非我諗通左再去考 DSE，如果唔係就一直唔畀⋯⋯」

「下？咁都得？你無同佢地講你既夢想架咩？」我好緊張咁問。





「我緊係有喇，但係佢地就話而家呢個社會根本就唔講夢想⋯⋯係佢地眼中，只有讀到大學、搵份政府工，先係好。」Sandy 心灰意冷咁講。

「可能佢地講得岩⋯⋯我讀唔到大學，我只係呢個社會既失敗者⋯⋯」

「喂！你之前個團火去左邊？」我一句質埋去。

「火？」

「你之前咁果斷做決定，話要學廚唔考 DSE，你有無後悔？」我問佢。

「無！我絕對無⋯⋯我只係估唔到間餐廳呃我糧⋯⋯想做自己想做既野都咁難⋯⋯定係我真係咁無用，咩都做唔到？」Sandy 仍然好頹。

「你無後悔就得喇，人係為自己而活，從來都無人話過追夢係件容易既事，你點可以咁易放棄？」我好認真咁講，唔知點解我好想幫佢，好想鼓勵佢。

可能係因為⋯⋯有夢想既人已經買少見少，係香港呢個五光十色既都市，人人都只係為錢而生活，色彩早已經黯淡無光。而有夢想既人，就好似當中既一點光明同色彩，令呢個社會、令香港呢個地方，仲尚存一點既美麗。





Jayden 想飛，但佢飛唔起，我無幫佢無鼓勵佢。今日 Sandy 想飛，佢而家正係孤身一個人對抗住呢個無情既社會，佢個一點既信念隨時就會消逝，如果我唔畀鼓勵佢唔支持佢，就無人支持佢，然後連呢一點光，都會黯淡落來。

或者都係因為我自己無去追夢，無膽去追夢，所以先將呢一點既心意同希望投射左係 Sandy 身上。我好想佢成功，好想佢證明到畀全世界知道，香港仍然係一個追夢既地方。

「你要堅持落去，終有一日，你身邊既人會明白你，然後支持你。你唔一定要做到好叻好出名，但至要你活得開心，就已經無悔無憾，唔係咩？」我講，然後拎左三百蚊遞畀佢。

對於有返全職既我，三百蚊唔係一個大數目，但對 Sandy 來講，可能好重要。

「借畀你，唔使咁急還，到你覺得自己真係追到你既夢想個時，先還畀我。」我同佢講。

Sandy 好感動咁望住我，然後珍而重之咁拎住呢三百蚊。

「仲有呀，你要相信自己，連你自己都唔信自己係得既，你點叫人地去信你呢？」我同佢講。





我拍拍佢膊頭，就走喇。由得佢慢慢思考一下，之後既路要點行。

呢個時候，M記真係好應景，竟然響起一首好有意思既歌。

係周柏豪既 Imperfect。

「從好處著眼即使古蹟都變作新鮮
從好處著眼即使悲觀不致太片面
塵封的照相機亦記低黯淡的光線
合照上缺席那位放身邊

誰可以做到不失一分走過每一天
誰走到盡處真的終於走到你志願
從最壞時代裡另有種完美的主義
在破裂鏡內與你的面容互相嘉勉」





-

係咪覺得我同 Sandy 講既野好有意思？我本來都唔係咁叻，咁識去鼓勵人、咁有心去鼓勵人⋯⋯

望住天上既飛機飛過，我又再諗起 Jayden 既故事。佢個人雖然唔係到，但佢既精神，一早已經活係我心入面。

人生既奧妙就係去影響人地。Jayden 用佢既力量去感染我，而我就用我既力量去感染 Chris、Sophie 同 Sandy，仲有更多更多既人。

-

今日又做「扮工人」，係 office hea下，睇下 facebook。

都係呢D，睇下笑料睇下新聞睇下J圖，又一日。





咦！咪住！點解會咁架？

［ Lok 已更換了他的頭像］

點解⋯⋯點解會變左全黑？Lok 到底發生左咩事？

未完待續