《香港唔係追夢既地方》: Episode 18
Episode 18
個男仔一野錫 Lok！我地三個都嚇到出唔到聲！
「夠喇！」Lok 推開個個男仔。
「Lok 呀，點解呀？」個男仔問佢。
「點解？點解你出軌個時唔問下你自己點解呀？我同你無野好講。」Lok 同個男仔講。
「對唔住呀！我個時只係一時衝動，我⋯⋯」個男仔嘗試解釋，但 Lok 打斷左佢。
「Patrick，你問清楚你自己，到底你真係中意我，定只係當我係飛機杯？」Lok 仍然係一語中的咁問佢，個個叫 Patrick 既男仔呆左呆。
「答唔出？要諗？咁即係已經答左，完喇，好嘛？」Lok 好決絕咁講，Patrick 都唔敢再打擾 Lok，唯有默默咁離開。
呢個時候，Lok 行多兩步，先至望到我地。
我地所有人都呆曬。
-
「Lok⋯⋯你⋯⋯」我地四個終於再次聚首一堂，不過氣氛比起上次，更加尷尬，我更加唔知點去開口。
「你做咩唔話畀我地知？」Chris 嘗試冷靜咁問佢。
「點話畀你地知？唔通無喇喇同你地講，我係基佬呀！咁呀？」Lok 一臉鼓躁。
唔怪得之，一直都無聽過 Lok 拍拖、中意咩女仔，我地仲覺得好奇怪，明明 Lok 都唔差，點解咁多年都無女朋友⋯⋯
「如果我同你地講左，你地既反應咪就係咁既樣⋯⋯咁我仲會想同你地講？」Lok 冷笑左一下，然後望住我地幾個。
原來 Lok 一直將佢既事收收埋埋，顯得神神秘秘咁，係因為佢根本唔信我地⋯⋯
「我地唔係咁既意思⋯⋯只不過我地無諗過係咁⋯⋯」我嘗試冷靜咁解釋。
「仲有咩好講姐？你地會接受你地既兄弟中意男人咩？第時攜眷出席聚會唔通我又帶個男人出來見你地？」Lok 好激動咁講，正當我想回應既時候，Chris 竟然一拳打中 Lok！
「咁算咩兄弟？你諗住呃我地一世，然後唔再理我地幾個？」Chris 好兇狠咁問 Lok。
「係呀！我根本同你地唔同世界！我同你地根本⋯⋯」都未等 Lok 講完，Chris 又一拳打埋去！
Aaron 試圖拉住 Chris。
「咪咁喇！停手呀！」Aaron 想阻止 Chris，但 Chris 就連 Aaron 都打埋！
「仲有你呀！做咩賣保險賣到你自己都變埋呀？我覺得我好似唔識你咁呀！」Chris 好似將佢一直積壓落來既情緒都發洩左出來。
「我唔想咁架⋯⋯」
「咁你唔搵返我地？」我問 Aaron。
「我唔敢面對你地呀！我覺得自己好無用，好卑鄙、好垃圾！點解我為左向上爬，就連兄弟都拋棄埋，連自己都拋棄埋！」Aaron 都開始喊起上來，對住 Chris 大叫。
「我唔了解你地，我唔知你同 Sophie 有咩難關，又唔知道 Lok 既野，又唔知道 Tony 想點，我根本無面目面對你地！」Aaron 喊住咁講。
「識得耐，就以為可以咩都唔講⋯⋯」我都忍唔住，要宣洩一下⋯⋯
「我地就係怕講個一句，差D連班兄弟都無埋！一個唔聲唔聲走去做地產！一個識左男朋友又唔出聲！一個做保險做到唔敢面對自己！我呀，個日我第一次上台表演，我一直以為你地會出現，我一路等一路等⋯⋯無呀，你地一個都無來！」
「人大左就會發現有班咁既兄弟係幾咁難能可貴⋯⋯你呀，你以為我地會因為你中意男人而避開你咩？中意男人又點呀？會多左對角？定識爆炸？又唔係咩作奸犯科既野，你點解唔想比我地知？」我對住 Lok 講。
「仲有你，你以前都唔係咁細膽，有咩咪講出來囉，打返場波打返場交咪無事囉，成日都係咁架喇！你怕咩姐！」我又對住 Aaron 咁講，但眼淚已經忍唔住。
Chris 行埋去，慢慢扶起跌倒既 Lok。
「我地一世人四兄弟，有今生無來世⋯⋯你畀人飛，我地幫你出頭！你畀老闆蝦，我地幫你打爆佢！你唔開心，我地一齊飲酒飲天光！」
「咪係⋯⋯以前個肥仔蝦蝦霸霸，咪又係畀我地四大名捕搞掂！總之，四大名捕少一個都唔得！」Chris 搭住 Aaron 同 Lok 膊頭，但 Aaron 仲未冷靜到落來。
「我公司既同事⋯⋯日日就同我鬥數，我其實好想再同你地飲酒傾計⋯⋯」Aaron 仲喊緊。
「對唔住⋯⋯」Lok 都一臉內疚。
「對咩唔住呀！難得今晚齊人！啤啤佢喇！」Chris 開心咁講，我又搭埋一齊過去，然後好似以前咁，打打鬧鬧，一齊去買啤酒。
今晚，係我地重返青春既一晚，時間就好似一下子倒回去以前咁樣。
我地係呢一個悲喜交集既晚上，哼起屬於我地既一首青春頌。
「若然現時士氣高昂 即管放肆任性
當你感到無力軟弱 切記不怪宿命
若然做人未算聰明 更要賣力亡命
還未要負責之際 切記盡興
誰亦會隨年變老 方懂得童年多好
等不到來年變老 才懷念 那種悠然腳步
來吧 趁毫無控訴 快悉穿沿途的污糟
這段少年時間 既然昂貴 大好青春要盡耗
記住要共最美的人分享每個夜晚
別忘掉原是靠堅持醫好每個傷患
既是有力挺起胸膛即管好好作反
無懼雨水沾濕兩眼」
-
「喂，到底你同個個男仔做咩事架？」我拎住罐啤酒問 Lok。
「其實，佢係我大學識既朋友，佢亦都曾經係我既男朋友⋯⋯」
未完待續