《香港唔係追夢既地方》: Episode 19
Episode 19
Lok 終於慢慢同我地講返佢同 Patrick 之間既故事畀我地聽。
「其實我中學個陣都唔知自己中意男人，只係我一直都無諗呢樣野，以為只係未到時機、遇唔岩中意既人。直到我入左大學之後，我識到好多唔同既人，之後先發覺，原來自己係一個同性戀者。」Lok 將佢既心路歷程娓娓道來。
「一直以來，我既生活都係好孤獨，屋企人成日出去，又唔係可以成日見到你地，我只可以係屋企讀書，為未來打拼……但係我一直都無發現同諗過，自己需要既到底係咩。直到我識到 Patrick……」Lok 一提起佢，竟然閃過一絲甜蜜既笑容。
「佢好好人，好陽光，好似帶畀我生命久違既陽光一樣……我明明唔係好理佢，偏偏佢就係都要來搵我，又同我食飯，又同我一齊溫書……原來不知不覺，佢同我經歷左好多好多野，無論我做咩，我都會諗起佢，原來佢已經係我生命入面佔左一個好重既位置。」
「直到佢同我表白，我先鼓起勇氣同佢一齊。」Lok 仲係有個好幸福既表情。
「同佢一齊之後，我地都好怕畀人知，所以無論做咩都係收收埋埋，拖手要係夜晚無人見到既時候先可以拖手，拍拖都唔可以係人前太甜蜜。甚至我連咁開心既感覺，都唔可以同人分享，包括你地……」
「但我地依然覺得好幸福，我覺得，我地開心咪得囉！但係地下情，又點可能長久……至少，我唔相信。結果畀我發現，佢同第二個男仔搞左野。」Lok 由幸福既神情，變成傷感。
「我唔容許我愛既人背叛我，所以無論佢點解釋我都無聽到，我……就同佢分左手，就係你地岩岩見到個一幕。」
「佢話，佢對我係認真，不過只係唔知點樣同我走落去，佢話佢唔敢同人講，覺得好大壓力，所以就唔小心搵左個個人慰解左佢……佢話好後悔，不過發生左就係發生左，佢都改變唔到，佢話佢以後會一心一意愛我，但我根本唔可以再信佢……唔見光既感情，又點可以走落去？就算繼續一齊，我又點同我爸爸媽媽講？點同大家交代？」Lok 歎左一口氣。
「唯有……當發左場夢，發左場好美妙既夢。」
聽住佢地既愛情故事，其實我發覺，根本同普通既愛情故事無分別。佢地一樣係人，一樣有感情，佢地又無做咩傷天害理既事，但點解會落到咁既下場？愛一個人，從來都唔係罪，點解男人可以中意女人，女人可以中意男人，點解女人唔可以中意返女人？男人唔可以中意返男人？
我地成日話追求自由，追求平等，我地又幾時有理到呢班想愛但不能愛既人？我地又可唔可以做到，見到 hehe sheshe 拖手既時候，唔用驚訝既目光望住佢地？我地又有無試過鼓勵佢地去追求所愛？
夢想可以好偉大，亦可以只係好卑微。
「所以你地明白，點解我個日會話結婚係我夢想喇？唔係錢既問題……而係……」Lok 苦笑左一下。
原來，佢既心願，只係咁簡單，但比起我地既，絕對唔會容易，甚至更加艱難。尤其係香港，成日打住開放既旗號，其實最封閉既，係我地至真。唔好話澳洲同美國，連隔離既台灣都可以有同性婚姻既時候，香港仲只係停留原地，有對男仔拖手，已經會畀人影相擺上網。
你話，香港仲點可以係一個追夢既地方？
-
聽完 Lok 既故事之後，其實我、Aaron 同 Chris 都覺得，Patrick 真係好中意 Lok。因為 Lok 睇唔到，個晚 Patrick 來回踱步個個樣，係幾咁緊張、幾咁擔心。
不過，人地既感情事，幾時到我地去理？
除非⋯⋯
【喂！咁多位救命！】Lok 忽然係 what's app group 講左呢句。
【咩事？】
【做乜鳩？】
【做咩？】我地三個同一時間問返佢。
【Patrick 約我今晚係海旁見面，仲叫我搵埋你地幾個一齊，仲可以帶埋你地既朋友喎⋯⋯佢想搞咩？】Lok 問。
【我地都有份？】我問。
【咁我去唔去好？】Lok 似乎有少少心猿意馬。
【去喇！睇下佢搞咩都好，話唔定想追返你？】Aaron 講。
【係囉，有我地一齊，無有怕喇！】Chris 都加把口。
就係咁，我地就決定今晚去會一會呢個 Patrick。
-
當晚，我、Jamie、Chris、Sophie 同 Aaron 一齊陪 Lok 去海旁。
去到 Patrick 所講既位置，但搵唔到佢，只係得啲普通既行人。
「佢呢？遲到呀？」Chris 問。
「佢唔會玩你呀嘛⋯⋯」Aaron 就有少少質疑佢。
Lok 個樣明顯好失落。
「算喇，應該無架喇。麻煩左你地咁大排人一齊出來⋯⋯」Lok 頭 dup dup 咁講。
正當 Lok 準備走既時候，忽然間音樂響起左！係好輕快既舞曲，我地仲未知發生咩事，忽然間有個行人好似上左身咁，跳起舞來！
之後唔只佢一個，周圍望起來好普通既行人，居然一個一個加入，最後差唔多有成三十個人一齊係到跳舞！
見到佢地跳得咁好睇，我地都忍唔住開始手舞足蹈，岩岩既煩惱同失望好似隨住輕快既節奏，一掃而空。
唔通佢地就係傳說中既快閃？
一輪熱舞之後，歌都唱完，佢地亦都跳完。咦？但佢地無走到既？快閃唔係即係快手跳完就閃架喇咩？
佢地停左係到，然後慢慢分成兩邊，形成左一條路。然後，音樂變成一首慢歌⋯⋯
係舞蹈員中間個條路，有個拎住紮花既男仔慢慢行出來，佢就係 Patrick！
Patrick 西裝骨骨，用一雙好深情既眼望住 Lok，一手拎住紮花，一手拎住支咪，然後唱起歌。
「用盡力推翻不了身邊恥笑，淪陷了，你我終於走失了。」
係周柏豪首新歌，不可能。
「磨合裡，緊握的手鬆開了，不再玩笑，處理著那些紛擾。」
「想怎麼都不緊要即管取笑，遺憾我，有過那幾秒動搖⋯⋯越靠近，越渺少，我縱使心驚膽跳，仍不肯相信、不想失去，不因此折腰。」
「誰都說，不可能，誰都說你這麼可人，求得命定愛侶，用愛還是身份？」Patrick 好有自信咁笑左一笑，然後繼續唱。
而 Lok 早已經聽到眼紅紅。
「同苦⋯⋯同甘⋯⋯抱著你去避過厄運，誠實謙厚上進去做人，其他不必膽心。」
「從不信不可能，容許我拆解不可能，從不認命，決意用愛橫越身份⋯⋯」
「誠心，或始終一天有回音⋯⋯仍舊可帶著你向前行，傻小子只需要⋯⋯決心⋯⋯」
歌就唱完，呢個時候班舞蹈員就開始拍手，佢地既臉上都掛住好開心既笑容。而周圍真正既行人都好驚訝同好好奇咁望住呢一刻。
「我準備左唔算好耐，但我好畀心機架⋯⋯可能唱得唔好聽，但呢首歌對我、對你，都好有意思。」Patrick 開始講。
「我地身邊可能會有好多人用鄙視既眼光去看待我地，我地會聽到好多閒言閒語，承受好大既壓力⋯⋯我地既生活同感情，都會變得好艱難，我地都承受唔住，最後走失⋯⋯」
「但分開之後，我先知道，原來我真係好愛你，想繼續愛你。」
「不可能，係，我同你要行落去，要一生一世，係好多人眼中都係不可能。但係我唔信，就等我去拆解我地之間每一個不可能，令不可能變成可能⋯⋯」
「我願意用愛去橫越我地既身份⋯⋯我特登用呢首歌，雖然呢首歌唔係講同性戀，但無論係異性戀同性戀定雙性戀，都一樣，會有付出、收獲、有難關⋯⋯我就想係呢到，藉住呢個機會同所有人講，Lok，我愛你。」Patrick 好認真咁講。
「你願唔願意同我一齊，用愛去橫越我地之間既身份同難關？之後既路絕對唔容易行，你願唔願意同我一齊行落去？」Patrick 望住 Lok，慢慢行埋去，送上佢紮花。而我地所有人，都望住眼紅紅、想忍但忍唔住而流曬眼淚既 Lok。
Lok 望望我地，我、Aaron 同 Chris 都點點頭以示支持。而 Jamie 同 Sophie 已經喊到收唔到聲，各自挨住我同 Chris 係到不斷點頭同喊。
「對唔住，你可唔可以原諒我？等我好好補償你？」Patrick 好溫柔咁同 Lok 講。
「補幾耐呀諗住？」Lok 笑笑口問佢。
「補到你唔要我為止。」Patrick 好溫柔咁講，Lok 終於都點點頭，Patrick 即刻好興奮咁攬住 Lok 係到轉，所有人都係到拍手叫好，成個海旁忽然充滿住溫馨同愛。
睇住佢地咁開心，我都好想佢地可以幸福快樂，雖然佢地條路絕對唔容易行，但我相信只要佢地唔放棄，一齊跨過種種難關，佢地一定可以闖出佢地既一片天，然後係佢地既一片晴空，自由咁翱翔。
呢個時候，電話震左震，我望一望，原來係 Jimmy 既訊息。
【多謝你 Tony，好感激你曾經畀過我鼓勵，多謝你。】
點解 Jimmy 講野咁怪？
「喂，人地咁 sweet，你係咪都應該有返少少表示？」Jamie 同我講，我拿拿聲收返埋部電話先即刻。
「得！而家表示！」我講完之後即刻攬住 Jamie 就錫。
Chris 同 Sophie 都唔執輸，又攬埋一舊打車輪。Lok 同 Patrick 呢對主角就當然喇。
而 Aaron 就只能夠繼續佢既毒J生活，羨慕我地一對一對。
無錯，我深信，誠心，終有一日，一定會有回音。
-
過左夢魅般既一晚之後，我又要繼續返「扮工室」繼續「扮工」。
成日係到諗：到底我係到做緊乜？
不過算喇，諗完咪又係繼續返工。
「有咩新歌呀⋯⋯你是你本身的傳奇？好似幾特別喎，邊個唱架？方皓玟？」點解又係方皓玟？呢個女歌手真係好特別⋯⋯
我特登 search 佢唱過咩歌，有《聽話》、《如果想我哭》、《分手總約在雨天》⋯⋯咪好出名個首？但我都唔太認識佢⋯⋯
仲有合唱《撐起雨傘》？咩話？原來佢有份？當日我剩係識何韻詩、黃耀明仲有周國賢⋯⋯最多加埋葉德嫻，但我根本唔知道連方皓玟都有份。
方皓玟竟然夠膽唱，反之睇返容祖兒、李克勤，佢地又敢唔敢咁唱？我心底忽然對方皓玟有一份敬佩之心。
「哇，又一單？搞咩呀香港D學生⋯⋯」有班周事開始傾起單新聞。
「好慘喎，又死。」
「政府真係垃圾來，最應該跳樓個個應該係教育局長喇，佢真係唔得掂！」
「超，定係班九十後廢咋，想當年我游水落香港捱捱捱⋯⋯一個人返兩份工養起成頭家呀⋯⋯」妖，又係呢個自以為是既死中坑，咁叻唔見你做李嘉誠？
不過，忽然我內心有種好強烈既不安感覺⋯⋯好似抖唔到氣咁⋯⋯我覺得單新聞⋯⋯
我慢慢行去佢地附近，睇下份報紙，原來係有個DSE生考完DSE等放榜，太大壓力而跳樓死左⋯⋯
呢個時候我手機忽然有人打來，我望望個來電顯示，竟然係 Sandy！
我個心跳得好快，我成個人都震曬，我心底有個好可怕既預兆⋯⋯求下你，千其唔好係真架⋯⋯
「喂⋯⋯？」我口都震埋。
「Tony 呀！⋯⋯」Sandy 把聲同我一樣震曬沙曬，同埋佢成個人都好慌。
「Jimmy 佢⋯⋯」Sandy 唔知點開口講，我鼓起勇氣望下份報紙既圖片⋯⋯
我成個電話即刻跌左落地。
Jimmy 跳樓死左。
未完待續