《香港唔係追夢既地方》: Episode 21

Episode 21

自從 Jimmy 死左之後，我不斷諗自己既人生，到底會係點，又應該會係點。

每日做住我自己唔中意既野，留係一個我唔中意既地方，重覆重覆⋯⋯好似入左迷宮咁，兜極都兜唔到出去。

個人意志越消沉，就越覺得香港呢個地方好灰暗。繁華十色都只係暗淡無味既機械城市。

高樓大廈越起越高，令我好似慢慢睇唔到晴朗既天空，建築物遮蓋我地既視野⋯⋯





反之，Sandy 就好似畀 Jimmy 激勵左一樣，越來越努力返工、學野，人生充滿動力同色彩，我忽然間好明白，點解 Jimmy 會咁羨慕佢。

Sandy 既生命可能唔算成功同富有，但佢開心、滿足，已經好足夠。

咁我呢？我既生命係咪就要咁樣虛耗呢？到頭來，我又會得到咩野？

-

「你是你本身的傳奇，憑著你志氣會成大器⋯⋯」聽住電視入面既方皓玟唱住佢既歌，我不其然係到諗，方皓玟既夢想係咪要做歌星呢？定係佢想做全球國際巨星？





我繼續用電腦，難得放假係屋企，緊係 hea 下喇！

「新星歌手計劃⋯⋯？」我係 facebook 見到呢個廣告，原來係銀河娛樂集團推出既一個計劃，係要搵出有潛質既人，接受佢地既訓練同力捧而成為新生代實力派歌手⋯⋯

我忽然，望一望自己既手指，原來之前彈結他壓出來既紋已經無左，而我支結他亦都早已經封左塵，仲成日畀阿媽話佢阻定，要扔左佢。

我又記得我係公園，曾經同 Chris 佢地講過，我想做第二個坤哥⋯⋯

唔通，呢個就係我既一個機會？





-

今日返工，我仍然神不守舍，我心入面仍然諗住個個「新星歌手計劃」。

正當我返到 office 仲遊緊魂既時候，Venus 忽然過來搵我。

就係當日請我個個HR，Venus。

「Tony，點呀？做左半年，覺得慣唔慣？」Venus 好溫柔咁問我。

「慣呀，完全慣曬。」緊係死人都答慣喇！

「其實你主管同我傾左好耐，佢決定同你續約，同埋升你職，當然⋯⋯人工都會有所調整喇。」Venus 笑笑口咁講，我真係打左個突。

下？升我職？





-

點解要係依個時候升我職，點解個天總係要畀咁艱難既抉擇我⋯⋯

「新星歌手」定高級員工？

夢想定係現實？

我真係唔識揀⋯⋯

-

「仲使諗？緊係繼續做落去喇！你知唔知做半年就升職係幾咁難得既事！好多人恨都恨唔到架！」我將件事同左 Jamie 講之後，Jamie 好似仲興奮過我。





「唔係喎，但『新星歌手』呢個機會都好難得喎⋯⋯」

「你諗下我地之後既支出先得架，你又要還學費喇，又要畀家用喇，又要儲錢結婚喎，你唔想買樓咩？買完都要供樓架⋯⋯仲有交稅呢？水電媒呢？仲有呀⋯⋯而家既米好貴架⋯⋯」Jamie 一輪咀數曬我地即將要面對既問題出來，原來生活真係咁逼人。

「但係⋯⋯我中意唱歌喎⋯⋯」

「但係你收入會唔穩定喎，你有無諗過如果你紅唔起，無 job 開，你真係會乞食？」Jamie 潑左一大盤冷水過來。

我好想駁佢，但佢講既的確係事實……人有夢想固之然係好，但人始終要食要訓，始終要生活，無錢既話，又點可以生活落去……

只係⋯⋯如果人既生活，只係為左勉強生存落去，咁又有咩意義？我終於明白，點解香港唔係追夢既地方，因為香港呢個地方連畀我地生存既地方同空氣都唔足夠⋯⋯

無論我地幾努力，都只可以勉強係香港苟延殘喘，除此之外，我地已經咩都做唔到⋯⋯

我正想要放棄既時候，腦海響起左一首歌。





Supper Moment 既無盡。

諗深一層，係外國追夢可能會易少少，但其實一樣有好多難關，佢地一樣會面對好多挑戰，因為追夢，從來就唔係一件容易既事情，因為係無盡頭，唔係你努力就一定會得到回報，到最尾你可能會成功，但更有可能既係咩都無。

但就算係咁，你都唔會後悔，咁樣先係真正既追夢。

香港唔係追夢既地方，但我地可以係追夢既人。

我望住 Jamie，好堅定咁同佢講：「唔可以，因為呢個係我既夢想，我唔可以放棄！」

-

當然，我同 Jamie 緊係鬧左場大交，但我知道，我今日唔去追夢，將來我老左，一定會後悔。





-

Agent 13，Sharon Carter 曾經同美國隊長講：「Many people will tell you something wrong is something right. Then, you should compromise, but if you can't, don't. When they tell you to move, you have to stand like a tree, and then look at their eyes and say “No, you move.”」

未完待續