Episode 22

係我班兄弟幫助之下,我自彈自唱錄左段片作為音樂作品交上去畀銀河娛樂,正式報名「新星歌手計劃」。

-

「夢想 於漆黑裡仍然鏗鏘
仍然大聲高唱 仍然期待世界給我鼓掌
是妄想 趁現在追趕失散方向
曾懷著心底的信仰 千次萬次跌傷




開始不敢回頭尋覓那真相 明日那個幻想
也開始不甘被雕刻成石像

踏上這無盡旅途 過去飄散消散失散花火
重燃起 重燃點起鼓舞
或許到最後沒有完美句號 仍然倔強冒險一一去征討
踏上這無盡旅途 誰又能鑑定你的醜惡與美好 低與高
離隊抹走那刺心挖苦的勸告 人生夢一場革命至蒼老」

-





「你真係考慮清楚喇?」Venus 好認真咁問我。

「係⋯⋯我發覺自己真正想做既,唔係呢份工既工作。」我好認真咁同返 Venus 講。

「咁好喇,搵到自己理想都係一件好事,歡迎你隨時返來。」Venus 笑笑咁講。

「一定!多謝你當日肯畀機會我!」我好感激咁同 Venus 講。

-





我向 Venus 辭左職,亦都同老母講左呢件事。我以為我老母會好大反應咁反對,但佢既反應竟然係我出乎意料之外。

「你真係辭左職?你參加比賽?」老母問我。

「唔係比賽⋯⋯係訓練計劃⋯⋯

「你唔會後悔呀嘛?」老母問多我一次。

「唔會!但如果我唔把握今次機會,我一定會後悔一世!」我好堅定。佢點左一下頭,就繼續食飯無出聲。

終有一日,我一定會證明畀你睇,我會成功!雖然唔知要幾耐,但終有一日,我一定會⋯⋯

-





過左幾日,銀河娛樂個邊就打左畀我,叫我去見一見佢地。

今次都可以算係一次既面試,雖然比起上次見 Venus,今次理應係輕鬆好多、無咁 formal,但我既心情反而緊張好多好多。

我揹住我支結他,準時咁到達左銀河娛樂集團既寫字樓。

一入到去,已經見到有唔少人等緊⋯⋯似乎佢地都係我既同道中人。

有唔少後生仔女,都係同我差唔多年紀,佢地好多都同我一樣拎住樂器,大部份係結他,仲有烏克麗麗。

呢個時候我見到有個高高地、青靚白淨既男仔,竟然抬住部電子琴!睇來佢都係熱愛音樂之人,我霎時間好似搵到好多知音人一樣。佢望住我,我又望返住佢。

我報以一笑,諗住識英雄重英雄,點知佢竟然唔理我……算,估唔到佢靚靚仔仔但係咁無情。我望一望佢個名牌,原來佢叫 Gareth。

坐佢隔離既,係一個五官好清秀既女仔,黑色長髮,加上雪白既肌膚,令佢望上去更加清純同可愛,好似一個天使咁。呢個女仔叫 Agnes。





我埋去登記,然後接待處姐姐就畀左個名牌我,Tony。

就係依個時候,有兩個人出現左。係城中名人萬家雄仲有佢個寶貝仔萬志峰,Edwin。

「萬生!你好!」接待處姐姐即刻恭恭敬敬咁同萬家兩父子打招呼,待遇真係唔同。

「我係咪要等?」Edwin 問,接待處姐姐即刻話唔使,仲即刻帶左佢地入去會議室。

唉,我地呢班平民百姓就算身懷絕技,都要苦幹。但 Edwin 含住金鑰匙出世,就算佢五音不全,自然靠父幹已經可以成功。

佢只係短短傾左十幾分鐘就出返來,仲用一種好高傲既眼神掃視我地全部人。

超!好巴閉咩!終有一日,我一定可以出名過你!





等呀等,等呀等,最後連 Gareth、Agnes 都見完走埋,都仲未到我……等待,永遠都係令人最緊張、最坐立不安既,又會幻想陣間入面會見到咩人?佢地會點對我?佢地係咪騙子呢?

唉,越諗越遠,到我未呀到底?!

「黃日朗,Tony,可以入去喇!」接待處姐姐機械式咁講,我又機械式咁跟佢入去。因為我其實已經緊張到手腳都硬埋。

步步驚心,應該就係我而家既狀態。慢慢打開會議室到門,一入去,就見到有兩個人坐左係到望住我。

男既約莫四十幾、五十歲,係一個中年男人,戴住副黑超、著住西裝。不過佢少少型既味道都無,你以為佢似三個?No,佢只係似一個猥瑣佬。

而另一個女人就比較後生少少,有女強人既味道,佢舉手投足都散發住一種好強大既氣埸同壓逼感。雖然佢唔算年輕,不過佢絕對係風韻猶存。佢留左一頭好長但卷卷地既啡色長髮,著住一套好有威嚴既女性西裝,就感覺到就算佢唔係老闆,都一定係大粒野。

「你好,Tony,係咪?我叫 Lydia Han,係銀河娛樂集團既主席。我身邊呢位係 Morris Shing,係銀河娛樂集團既副主席。」Lydia 開聲同我打招呼,雖然佢好友善,而且掛住笑容,但佢仍然有一種咄咄逼人既強大氣場……

「你好!」我生硬咁講。





「唔使咁緊張,可能你都估唔到係我地親自見你地,咁係因為我地好著重今次既計劃,所以想親自揀人。」Lydia 一眼就睇穿我,呢個女人真係唔簡單。談笑用兵,絕對就係講緊佢。不過雖然係咁,銀河娛樂集團可以成為娛樂圈首屈一指既龍頭大哥,佢一定係居功至偉。

「係既。咁我介紹下自己先喇,我叫 Tony……」我想表現下自己醒目既一面,搏加分!

「你既資料我之前已經收到,唔使點解釋。」Lydia 直接打斷我,而 Morris 仲係到禁緊手機,兩個大老闆既感覺真係差好遠。

「你話你好中意彈結他同唱歌,我地都睇過你段片,覺得唔錯。不過,我想問你一個問題。」Lydia 望實我,佢既眼神真係好有侵略性,我真係唔係好敢直視佢。

「點解你會揀呢一首歌?」Lydia 問。

其實我都有諗過佢會問我呢條問題,我明明準備好……但我畀佢眼神嚇一嚇,我居然唔記得左我份標準答案!

仆街喇今次!

「我呢……之所以揀呢首歌……係因為……無……」我完全唔知答咩好,我見到 Lydia 皺曬眉,連一直玩緊電話既 Morris 都忍唔住望住我。

唔係掛,我咁難得先有呢個機會,唔通就要因為太緊張而失敗?唔可以!咁樣實在太失敗!我點樣證明畀 Jamie、老母睇?我會對唔住佢地、對唔住班兄弟、對唔住 Jimmy 同 Jayden……唔可以!

一幕一幕回憶忽然湧上心頭,令我回想起我身邊既人既故事。Jayden 想追但追唔到夢、Kate 日夜返工就係為左夢想既個股努力、仲有 Renee 當日演戲唸既對白,仲有 Sherry、Lok……

「因為,夢想。」我衝口而出咁講,但 Lydia 仍然皺緊眉。

「我既夢想係唱歌,我真係好中意音樂,音樂可以話係我既生命,如果無左音樂,我應該會生存唔到落去。」

「但要實現夢想、靠音樂去做職業,真係唔容易,尤其係香港,呢條路好長、好長……可以話係長到見唔到盡頭,就好似首歌歌名咁,無盡。」

「或者到最尾真係無完美既句號,最尾我可能為左夢想而一無所有,無錢無屋企人無女朋友……但我諗到左個日我回想今日,我都一樣唔會後悔今日來左呢到。」

「因為,我起碼有試過去追,有試過去令我既生命變得有意義,而唔係為左生存而生存。」

呢個時候,我終於理直氣壯咁抬頭直視 Lydia,但 Lydia 眉頭仍然都係緊皺。而 Morris 就低頭禁返電話。

唔通……打動唔到佢地?唉,唔通我失敗左?

「拍拍拍!」正當我幻想緊失敗之後係點既時候,忽然傳來左一陣掌聲。

未完待續