《香港唔係追夢既地方》: Episode 23
Episode 23
「拍拍拍！」
當我以為絕望既時候，居然傳來左一陣拍掌聲！
「講得好。」Lydia 終於面露笑容。
「知唔知點解我要開始呢個計劃？Tony？」Lydia 問。
「搵樂壇新血⋯⋯？」我都係斷估架咋。
「而家既樂壇簡直就係一潭死水，時代係需要變遷同改革，而我覺得，大家需要既新星，就係我面前。」Lydia 好滿意咁望住我。
「個個就係你。」Lydia 欣賞咁講。
-
我得左喇！「新星計劃」真係取錄左我！Yes！
我好興奮咁離開銀河娛樂既寫字樓，我好想可以將我既喜悅分享畀人，尤其係 Jamie，只可惜佢根本唔會支持我⋯⋯
估唔到，呢個時候，Jamie 居然企左係到等我。
「Jamie！」我一見到佢，就六親不認想衝過去攬住佢。
「我好掛住你呀！唔好唔彩我喇！」我攬住佢咁講。
「你見完喇？」Jamie 好冷靜咁問，我放開佢，變成捉住佢膊頭，望住佢。
「係⋯⋯佢地取錄左我⋯⋯」
Jamie 眼神閃過一絲不快，我睇得出佢仍然唔支持我。
「咁我地點算？你係咪諗住完全唔顧我，自己中意點就點？」Jamie 問。
「唔係唔係⋯⋯緊係唔係喇！我除左依件事之外，咩都聽曬你話，好唔好？」我試圖哄返佢。
「夢想係咪真係咁重要？係咪重要到可以咩都唔理？」
「我邊有咩都唔理姐？呢個計劃我都有收入架，好彩我有 job 既話，隨時搵得多過我本身份工架！」
「好彩⋯⋯如果唔好彩呢？你可以點？你淨係睇到明星成功既一面、你淨係睇到坤哥。係，坤哥好好彩，捱幾年就出到頭，人人皆知。但香港，有更加多既音樂人係你連佢個名都唔識架！」
「唔係呀⋯⋯我唔係想出名，而係我真係好中意音樂⋯⋯你明唔明？音樂係我既生命⋯⋯」
「咁我呢？你夢想得音樂，咁有無我？你有無諗過我呀？你到底有無諗過我地既將來架？你係咪想我第時訓街呀？」
Jamie 既咄咄相逼，終於逼到我情緒去到臨界點。
「夠喇！」我好大聲咁喝住 Jamie。
「你根本就唔明白，我呢個機會，係幾咁難得！我到底等左幾耐！呢個機會對我好重要！我唔去我會後悔，我呢一生呢一世都會後悔呀！你係咪想我好似隻喪屍咁過一世呀？」
「你同我一齊都叫喪屍？」Jamie 又係咁，每次鬧交佢總係執著呢類型既細位，但每次我都會係呢位置上扯曬火。
「你呢？到底你自己有咩夢想？你根本就無夢想！你根本就唔明點解我要咁追求呢個夢！你唔會明呀！」
「係⋯⋯我無夢想，係⋯⋯我唔會明⋯⋯咁算喇，由得我唔明喇，你攬住你夢想過世。」Jamie 好灰咁拎轉身就走，而我亦都無去追返佢，因為我真係無力再去追返佢。
兩個唔同路既人，點可以繼續走落去？
今次，可能係我最大聲同佢講野既一次，亦可能係我地最後一次既對話。
-
我諗左好耐，我地咁樣算唔算分左手？我又算唔算係為左夢想而犧牲左佢？我係咪太自私？
或者佢講既，都有佢既道理。人生真係好矛盾，人大左就會發現，原來細個簡單係在於我地好容易就會識分正與邪、黑與白、對與錯。一睇就知，火箭兵團係壞人！綠魔係壞人！
但長大之後先發現，原來好多時，衝突都係緣於各自認為岩既野。無人完全係正派，亦無人完全係反派。咩係岩？咩係錯？邊個可以去定論？
人大左之後，世界唔再係黑同白，而係會有灰。
-
「話總說不清楚 該怎麼明瞭 一字一句像圈套
舊帳總翻不完 誰無理取鬧？以後雙手甩開剛好的微妙 然後戰火再燃燒
我們背對背擁抱 來用沉默在咆哮
愛情來不及變老 葬送在烽火的玩笑
我們背對背擁抱 真話兜著圈子亂亂繞
只是想讓我知道 只是想讓你知道
愛的警告」
-
今日，Lydia 叫左我上去，傾下計劃既細節。到場之後，我見到 Lydia 同 Morris 已經坐左係到，而另外仲有 Edwin、Agnes 同 Gareth 坐左係到。似乎我地四個就係唯一脫穎而出既人。
「好多謝你地幾個會參加我地呢個新星計劃，我相信你地都有各自既目標同志向，但都一樣，要靠呢個計劃去實現架喇，係咪？」
「夢想好似好遙遠，但有我推你地一把，就算係幾遙遠既星，我都可以推到你地摘到佢為止，所以你地唔使擔心。」Lydia 望住我地幾個講。
「不過要成功，就當然要付出喇，係咪？所以我地將會提供一連串既訓練，包括你地音樂既造詣，同一個知名歌星需要既各種技藝。」
「正式加入之後，你地四個就要搬入去我地公司設立畀你地既訓練宿舍，我包保你地出返來之後，個個都係出得廳堂既歌星！」Lydia 講既野好似句句都好有魔力。
不過⋯⋯要搬入去？
「簽左約之後，你地就會變成我地銀河娛樂既旗下歌手，你地既一言一行都會影響我地公司既形象仲有口碑，所以一定要謹言慎行，你地既事，就係我地既事，Okay？」Lydia 講，我地都點點頭，Lydia 臉上閃過一抹勝利既笑容。
「當然我地唔會逼你地參加、而家就簽名，返去慢慢考慮下。」Lydia 派左份合約畀我地，一人一份。
呢個時候，我就見到 Morris 咸咸濕濕咁打量住 Agnes，由上到下、由內至外⋯⋯死淫蟲！唔好搞 Agnes 呢個小天使呀！
可惜佢始終係老闆，我邊敢出聲，咪唯有死死地氣，扮睇唔到⋯⋯
況且，我都仲未有閒情逸致去理佢地，因為呢份合約簽、抑或是唔簽，對我影響都係好大⋯⋯
簽，就代表我完全放棄 Jamie。
唔簽，就代表我完全放棄夢想。
唉！我可以點？
-
我一路諗，一路行返屋企，忽然間我見到有個好熟悉既身影企係大堂附近等我⋯⋯
係 Jamie！
佢見到我，然後慢慢行過來，但佢好似眼濕濕咁，唔再好似之前咁，咁惡。
「BB⋯⋯對唔住⋯⋯」Jamie 竟然同我道歉？
「你做咩呀⋯⋯其實你都有道理既⋯⋯」我講。
「唔係呀⋯⋯我⋯⋯我個日返去之後，諗左好耐好耐，然後又同 Sophie 傾左好耐。」
「佢話得我岩，我淨係掛住諗自己⋯⋯我無諗過你到底開唔開心⋯⋯Sophie 話佢當日見到 Chris 為左將來而去做地產，見到 Chris 愁眉苦臉，佢覺得個心好痛，個時佢先知，原來佢最想既，係 Chris 開心⋯⋯」
「我都係⋯⋯我最想既唔係要你成功，我唔係要你富貴⋯⋯我都想你開心⋯⋯」Jamie 講到開始眼紅。
「你話我無夢想⋯⋯其實唔係⋯⋯只係我無同你講過⋯⋯」
「我既夢想⋯⋯係要做你老婆⋯⋯要同你一生一世⋯⋯我份人係好無大志⋯⋯我既願望同夢想，其實只係咁卑微⋯⋯」Jamie 終於忍唔住，喊左出來。
我即刻攬實佢，攬得好實，因為我好驚佢會再次轉身走左去⋯⋯
「我會支持你架喇以後⋯⋯無論你做咩⋯⋯我都會支持你架⋯⋯唔好趕我走⋯⋯唔好唔要我⋯⋯」Jamie 喊到聲都沙埋，我見猶憐。
「唔趕⋯⋯死都唔趕，你都唔好唔要我呀，知唔知呀？傻妹⋯⋯」我摸一摸佢個頭，佢仲係喊緊。
「咁⋯⋯咁係唔係即係好返喇⋯⋯」Jamie 問我，佢仲喘緊氣。
「係呀傻妹。」我捉實佢，逼佢望住我。
「我地加多樣規條。」我同佢講，佢一臉疑惑。
「咩規條？」
「我地以後，只諗將來，唔准提返過去，今次嬲完就算，之後唔准提返起，得唔得？」
「以後都係咁？」
「係！仇口唔准留過夜架。」我講。
「好！應承你！勾手指尾打印！」Jamie 破涕為笑，對住我伸出左手指尾同手指公。
我都笑笑口，同佢勾左手指尾同打左印。
「咁以後鬧交，咁樣就好返架喇，知無？好！今次呢單野，結案！Close File！」我笑笑咁講。
「唔得唔得，係 Delete File 至真丫！」Jamie 天真咁講。
我望住佢，先知道，真正既天使唔係佢個樣似就係，而係佢對住你既時候，係咁純真，佢就係你既專屬小天使。
未來既挑戰，一定會有好多，你一定要陪住我，一關一關咁闖過去，Jamie。
未完待續