《香港唔係追夢既地方》: Episode 25
Episode 25
第二日，我就開始我既新生活。落廳同佢地三個食早餐，但個氣氛仲尷尬過我之前第一日返工。
Agnes 一臉不屑咁啤住我，但轉個頭又同 Edwin 有傾有講。似乎 Agnes 只係會主動結識有權有勢既人，Morris 同 Edwin 都係佢既獵物。
至於 Gareth 一貫保持佢既氣場，生人勿近。我有時都會諗，其實好似佢咁，係咪反而仲可以好好保護自己？
-
我地既訓練，其實好多元化，有聲學既訓練、樂器既訓練，無可否認，呢到既訓練係真係有用既。比起之前既空想，而家真係實際好多。淨係換氣同咬字，已經有好多既學問係入面。
我好用心上堂學野，而 Gareth 都係一樣。不過 Agnes 同 Edwin 依然係有講有笑，佢地似乎唔係真係中意音樂……
-
上完堂之後，Edwin 過來撩我。
「喂，Tony 下話？今晚我出去開P，一齊玩呀？Agnes 都去。」Edwin 笑笑口咁問。
「下？但聽日韓小姐話要試音喎……玩一晚把聲會拆。」講真，我真係唔想去。
「試乜鬼音丫，有排再訓練喇！唔係唔去呀咁唔畀面呀？」Edwin 繼續問我。
「Gareth 呢？」我刻意咁問。
「孤獨精來架佢，問左喇！唔去呀佢。」
「我都怕畀佢過我頭，我唔去喇，我今晚要練歌，下次先。」我笑笑口拒絕佢。
「算喇 Edwin，佢係咁唔畀面架喇！行喇我地！」Agnes 繞住 Edwin 隻手就走，真係勢利既淫娃……
-
我係房入面一邊練結他，一邊諗返之前既事，到底係唔係每個歌星都要經歷咁既低潮或者情況？坤哥同方皓玟又會唔會有呢一面？我真係唔敢諗⋯⋯
一來唔想毀滅佢地係我心目中既形象，二來係唔想自己唔敢再行落去。
聽日就要試音，只要成功咁畀 Lydia 選中，就可以成為一個電視節目既串場表演歌星，就係一個揚名立萬既好機會！
就係咁，我一路練一路唱，諗住成功未來，直至慢慢訓著⋯⋯
－
第二朝一起身，我就即刻梳洗食早餐，但奇怪既係，點解唔見佢地？Agnes、Edwin 唔見就話姐，點解連最勤力既 Gareth 都唔見？唔通佢練到訓過龍？
出於一點善意，我走去佢房門口敲門。
「咯咯咯！」
過左一陣，都係無人應，我再敲多陣，都係無回應，再望下錶，差唔多夠鐘要去試音室。反正我都無佢房門鑰匙，不如去到搵 Lydia 睇下點叫醒佢仲好。
於是我就即刻去地下既試音室。
出奇地，我見到試音室間房既房門係閂實，我懷住好奇既心行過去，居然聽到有人唱緊歌！我即刻打開門睇，居然發現 Gareth、Agnes、Edwin 齊曬人，就連 Lydia、Morris 同聲學導師都到左，只見 Lydia 黑曬口面咁啤住我⋯⋯
「咁早呀 Tony？唔訓多陣？」Agnes 好奸咁望住我講，我完全唔知發生咩事。
「下？唔係11點咩？」我問。
「我一早改左時間，Agnes 無同你講咩？」Lydia 用佢個一雙好似可以睇透所有人既眼神望住我。
「無⋯⋯」但未等我講完，Agnes 已經插左把口埋來。
「咩無呀？我個晚仲入左你房同你講，老闆 Morris 都知架。」Agnes 一臉無辜咁講，我真係畀佢既演技嚇親，點解佢要做歌手？佢做演員既出路可能仲好喎！
「喂，你係咪想我爆你既野出來呀？」我不失霸氣咁兇返佢。
「你靠嚇呀？」Agnes 問我。
突然有另一個人出聲。
「你講呀，有咩你就爆。」出聲既唔係咩人，就正正係 Morris⋯⋯
Morris 從來都無咩點正面留意過我，但今次佢目露兇光咁望住我，我就知道我再講多一句應該就會死無全屍。我再掃視全場，Edwin 一臉花生樣，佢一定唔會幫我；Gareth 仍然都係好冷漠咁既樣，似乎佢都係唔會幫我；望落英明公正既 Lydia 係咩人我根本就唔清楚，我都唔期望佢會幫我⋯⋯
我忽然覺得好無助，明明我咩都無做過，我無去害人，點解無喇喇都會惹禍上身？到今日我先明白，原來真正既奸角，真係無樣睇⋯⋯
佢地個個都望住我，我就知道，我今次輸左，徹底咁輸左。
「無⋯⋯對唔住，我未訓醒，所以講錯野。」我低頭咁講，我隱約仲見到 Agnes 陰陰嘴笑⋯⋯
「算喇，你最後先唱，行埋一邊等。」Lydia 好冷漠咁講。
我死死地氣行埋一邊，睇住佢地一個一個唱歌。Agnes 既唱功真係平平，同平時唱K都無咩分別其實，我真係唔覺得佢可以有表演既實力；Edwin 就仲差，本身聲底已經唔靚，仲要爛蒲搞到爛曬聲，我覺得佢直頭唔可以係呢間房存在；只有 Gareth 真係唱得，佢的確係有咁既才華。
到我唱既時候，我見到 Lydia 同導師都點曬頭，應該掂喇今次！見到佢地滿意個樣，我不禁洗走左岩岩既不快。
睇住佢地商量結果，我就好緊張，可能因為有期望，我先會咁緊張。機會就係我面前，我一定唔會白白浪費！
「好，我地有結果喇。」Lydia 望住我地幾個講。
「Agnes、Gareth 同埋 Edwin 都可以做串場表演，各唱半首歌。」Lydia 講，我個世界即刻靜止左幾秒，咩話？得我一個唔可以唱？
「Tony 你個晚都要去，以防佢地有咩意外，可以替補。」Lydia 望住我講，但我呆左，根本做唔出任何反應。
「Tony？」Lydia 叫左一下我個名。
「唔服？」Morris 又再講野挑釁我，我望實佢，但我根本唔可以做咩，就算有幾嬲都好，都只可以生吞⋯⋯
「唔係。」我冷冷咁講。
「唔係就好。」Morris 陰陰嘴係到笑，我知道實係佢有心咁做⋯⋯
「咁今日都無堂上架喇，大家返去休息下。」Lydia 講，大家都開始散場。
睇住 Agnes 同 Morris、Edwin 有傾有講，我真係好嬲⋯⋯有種我從來無過既感受湧現係我心入面，係憎恨。
係，我好憎佢地⋯⋯好憎佢地⋯⋯但我又可以點？
唉。
未完待續