《香港唔係追夢既地方》: Episode 26
Episode 26
我一直都深深不忿，但奈何世界就係咁，如果世界真係有個公平公正既審判官，你話幾好？
如果每個人都可以遇到佢既伯樂，係佢既夢想上面發光發熱，咁你話幾好呢？如果每樣野都根據真正實力去排行，咁你話幾好呢？
-
一星期之後，Lydia 同 Morris 就帶住我地一齊去電視台準備節目。睇住佢地盛裝打扮、忙碌咁準備表演，我個心就好唔舒服。明明機會就擺係我面前，明明上台個個應該係我⋯⋯
「韓小姐，你地個邊有無人多？我地唔夠人！」電視台節目總監同 Lydia 密密傾。
「無喎，佢地三個都要串場唱歌，我分唔到人畀你。」Lydia 同個節目總監講，呢個時候 Morris 望一望我，嘴角又向上戚，起到陰陰嘴笑。仆街，佢唔係想隊我出去呀話？
「我地有多一個，精壯男仔，岩唔岩？」Morris 同個節目總監講。
唉，大難臨頭！
-
我終於踏上舞台⋯⋯不過唔係拎住支咪表演，係著起套衫扮識行識走既樹⋯⋯
我真係覺得自己好羞家，同人講追夢追夢，追到而家要係全香港人面前扮樹！畀老母見到咁點？畀我班兄弟⋯⋯畀 Jamie 見到⋯⋯唉，真係成年唔使出街。
我盡量低頭，唔想畀鏡頭影到我個樣，但一方面我又好想睇下⋯⋯係我前面成為全場焦點、表演緊既 Gareth、Agnes 同 Edwin，佢地三個成功左，係一場好好既處男處女秀。明明 Agnes 同 Edwin 唱得唔好，但佢地都得到全場既掌聲，而我呢？繼續係後面扮樹⋯⋯
「喂！Tony！」
有把女人聲細細聲叫我個名？唔係掛！有人認得我？唔好掛！
「妖，望過來喇粉腸，叫你呀仆街！」把聲雖然好細聲，但好熟，而且咁粗鄙⋯⋯
我望一望隔離，原來有個女仔扮緊花！佢就係 Renee！
「係你！點解你⋯⋯」我忍唔住驚訝，細細聲叫左一聲。
「喂！你兩個咪咁多嗲呀！」耳機傳來節目總監個把勁黑人憎既聲，我同 Renee 對望左一下，一齊苦笑。
同是天涯淪落人，似乎就係咁解。
呢個時候，主持請左個嘉賓上台，話要同 Gareth 佢地三個合唱，呢個嘉賓竟然就係方皓玟！
係我夢魅已求既機會！點解唔係我！
「呢三位都係好有潛力既新人，我諗你地既夢想都係可以做一位一流既歌手喇，係唔係？」方皓玟笑笑咁問佢地。
「係呀，我好中意唱歌。」Agnes 率先回應，盡顯佢虛偽既一面。
「咁跟住送一首歌畀大家，希望呢首歌可以鼓勵到所有為生活、為夢想打拼既人⋯⋯」方皓玟開始講。
「就算你地遇到挫折，都唔好放棄，因為可以成就傳說既，一定係你自己，只要相信自己，就一定可以成功，送畀你地，《你是你本身的傳奇》！」方皓玟講。
「我也想哭 你今天知道嗎？
賺到幾多 願放棄自由嗎？
快樂要靠成功嗎？
努力拼搏求身價
平凡活一種很公式的笑話」
聽住方皓玟同 Gareth、Agnes 佢地合唱呢首歌，我真係百般滋味在心頭。不過我相信，同台上有咁既感受既人，絕對唔只我一個，仲有 Renee。
記得 Renee 同我講過，佢既夢想係做演員。原來佢都為自己夢想努力緊，終於可以係電視台見到佢，而佢而家都算係一個藝員，只係⋯⋯
追夢，真係唔容易。
我望一望 Renee，平時大剌剌既佢，今日終於收起佢一貫既傲氣，向現實低頭。見住佢雙眼紅紅，我都有種百感交集既感受。
我地係同一時間，同一個地方，跌低。
跌得幾痛下架都，如果我地怕痛，或者都會放棄追夢。追夢除左要勇氣，更加需要既係堅持。
「只要相信夢 定能飛
高與低 得與失 即使無法躲避
你是你本身的傳奇
憑著你志氣會成大器
天公不造美 幾經風浪也是你」
「我信架⋯⋯」Renee 把聲有少少沙啞咁同我講。
「終有一日，我一定可以企係呢個舞台上面，做我最想做既野，我唔會放棄。」Renee 眼神雖然憂傷，但佢好堅定。
「加油呀你，你得架！」我強忍住自己既悲傷，鼓勵佢。
「你都係，下次就係我地既舞台！」Renee 好有信心咁講。
「就算今天的你哪年紀
活著就無悔地 做個你愛的你
請記得發夢 定能飛
高與低 得與失之間無法準備
你是你本身的傳奇
前路裡振翅再高飛
即使不完美 只需經歷你自己」
方皓玟佢地唱完，亦都鞠躬謝幕。
「呢首歌真係講得好岩，所以我每次唔開心、失意既時候，我都會聽呢首歌。」Renee 同我講。
「今日邊個恰我，我發誓我之後一定要雙倍還返畀佢地，我唔係咁好恰！」Renee 有少少氣憤咁講。
岩，Renee 講得好岩，我而家要做既唔應該係頹廢，我應該要更努力。古有坤哥扮棋上位，今有我 Tony 扮樹爆紅！
-
返到去後台，我終於可以除左扮樹個件衫。Morris 就走過來。
「點呀？樹哥哥，扮得開唔開心？」Morris 笑笑口咁講。
「開心，緊係開心。」我都不甘示弱，笑笑口咁同佢講。
我留意到，Lydia 一直係後面聽住我同 Morris 既對話，佢若有所思咁望住我⋯⋯
到底呢個女人諗緊乜？
未完待續