《香港唔係追夢既地方》: Episode 28

Episode 28

自從個次初賽既亮眼演出之後，我既世界又再一次改變。

原來有名，自然有利。

我出左名，香港好多人都識我，忽然間佢地都視我為樂壇既明日之星，態度亦都一百八十度大轉變。

Lydia 明顯對我好左，而 Morris 都對我客客氣氣。Agnes 無再挑釁我，而 Edwin 都好主動撩我講野。





好多好朋友都有send message 畀我，包括我班兄弟喇、Jack 喇、Renee 等等。

-

今日亦係好難得既假期同空檔，我約左 Jamie 出去拍拖行街，因為自從加入左銀河娛樂之後，我已經好耐無同佢真真正正拍下拖、行下街。

Jamie 比平時早到，已經係約定地點等緊我。離遠望到佢，唔知點解好似有少少唔同左樣，但我又講唔出有咩唔同。

佢見到我，即刻好開心咁向我揮手，衝過來攬住我。佢攬得我好實，好似驚我走左去咁。





「好掛住你呀！」佢伏係我心口。

「我都係。」我摸摸佢個頭，感覺好似有少少唔同左⋯⋯好似，有少少疏遠既感覺，係咪太耐無見？

佢鬆一鬆開我，然後望住我。

「你好似唔同左⋯⋯」連 Jamie 都感覺到，其實變既可能唔係佢，而係我。每日都活係戰場裡面，要同 Agnes、Gareth 佢地勾心鬥角，一稍有差池就萬劫不復，試問係咁既環境底下，人又點可能唔變？

若有一天，忽爾大了，城府⋯⋯開始深了。





不過我對 Jamie 係絕對唔會變。

「喂！個個咪係上次電視贏左初賽個個 Tony Wong？」周圍開始有人認得我。

「好似係喎，原來佢真人都唔差喎，係肥左少少⋯⋯」

「呢D叫有肉地呀！」

佢地真係肆無忌憚咁評論我。Jamie 聽到之後，拉住我走。

「我唔想聽到人地咁樣評論我男朋友，我地行喇！」Jamie 臉上有少少失落咁講。

可惜既係，我行到邊，佢地都會認到我，到最後我竟然要戴黑超⋯⋯原來明星，真係唔易做，只係想好地地、平平淡淡咁拍下拖，都咁難。

好唔容易，我地先走到去無人既角落，坐低休息下、傾下計。原來我同 Jamie 已經好耐無真係坐低傾下計。





「同大明星拍拖真係累死人喇⋯⋯」Jamie 歎左口氣。

「對唔住呀⋯⋯我都無諗過會咁⋯⋯」我好抱歉咁同佢講。

「對咩唔住丫，我應該好威就真丫！我以你為榮架！」Jamie 仍然一臉天真瀾漫既笑容。

「Jamie⋯⋯」我望住佢，佢真係好似天使一樣，令人唔捨得傷害佢既一個咁純潔女仔。

「嗯？做咩呀？」

「我以後會抽好多好多時間陪你，好無？」我對佢講。

「唔使喇！呢個時候先係你最應該努力既時間，唔好為左我分心丫，知唔知道？」Jamie 微笑咁講。





我前世做左咩好事？今世竟然會有個咁善解人意既女朋友？

我即刻攬實佢，唔畀佢離開我既懷抱。同佢嘴唇交纏左好耐，我隻手亦好唔規矩咁摸佢，佢都一樣。我地實在太耐無⋯⋯

結果，我同佢戴曬口罩黑超咁去左金莎開房，小別勝新婚，個晚佢話我既表現有九十分！真係開心。

雖然只係好平淡簡單既一晚，但我已經好開心、好滿足。我送左佢返屋企，依依不捨咁同佢揮手告別。

然後，我又要一個人，返去個個戰場。

-

我一路行返去宿舍，但我竟然見到門口企左一個人⋯⋯係 Agnes！

Agnes 腳步浮浮，仲拎住支酒，佢實係飲醉酒喇！飲到出門口咁誇張？





「喂？你搞咩？」我問佢。

「我真係⋯⋯好污糟⋯⋯」Agnes 醉昏昏咁講。

「咩污糟呀？返入去先講喇！」見佢一個女仔醉係門口又真係唔太好，即刻扶佢返入去宿舍先。點知佢行都行唔穩，成個身壓落我到！好彩我都有力水，頂得住佢。

佢著住小背心同短裙，我仲隱約睇到佢條事業線，你都咪話唔驚人⋯⋯好彩今日將精力發洩曬畀 Jamie，唔係真係好有可能做錯事。

我扶住佢，一邊開門，但呢個時候偏偏佢又好唔小心差錯腳跌左係地，我都畀佢扯跌埋。結果我騎係佢上面，用手支撐住地下，先至無壓親佢。不過呢個姿勢，真係有少少曖昧。

我即刻彈起身，望下周圍，好彩無人望到⋯⋯即刻關門，就咁扔佢係沙發就算。

妖女，我唔會再中你計！





正當我要走既時候，佢居然拉住我隻手，唔畀我走！

「Edwin 個衰人⋯⋯佢落藥⋯⋯同佢班 friend 輪姦我⋯⋯」Agnes 咬牙切齒咁講。

「下？唔係掛？」我真係叫左出聲。

「我知錯喇⋯⋯我知錯喇⋯⋯原諒我⋯⋯Tony⋯⋯」

下？關我咩事？咁古怪既呢個女人？都唔知佢up乜，不過講唔夠兩句，佢就訓著左。

雖然唔知真定假，不過一個女仔唔會搵呢D講笑掛？見佢咁慘，我都拎左張被畀佢，希望佢一覺訓天光之後就咩事都無喇⋯⋯

-

第二日一大清早，我就起身落去食早餐，Edwin 似乎未起身，並唔見佢。而 Gareth 同 Agnes 就好似唔識咁，一粒聲都唔出，食緊早餐。估唔到 Agnes 竟然無宿醉。

「早晨呀 Tony！我幫你擺左份早餐係微波爐！」Agnes 一見到我，即刻笑曬口咁獻殷勤，唔通佢嗒我糖？

「哦⋯⋯唔該。」我好尷尬咁同佢講。

「尋晚⋯⋯好彩有你咋。」Agnes 好怕羞咁講，Gareth 即刻望住我地兩個。

「你唔好咁既眼神，我地無野架。」我即刻舉高雙手，投降咁既款。

呢個時候，估唔到 Morris 忽然打開門，怒氣沖沖咁既樣，仲拎住本野。

「Tony！Agnes！」Morris 好嬲咁講。

「做咩事咁早又咁燥？」我問佢。

「你自己睇！」Morris 講完之後，將佢本野掟去我地面前，係一本八卦雜誌。

個標題竟然係⋯⋯「新星 Tony 變狗公，紅左即刻狂食女，爆完房再係大廳就地正法」⋯⋯

張相，係我同 Jamie 去時鐘酒店門口既相，仲有我尋晚唔小心同 Agnes 跌倒既相⋯⋯

我即刻好難以置信咁望左 Agnes 一下，佢個樣不但連少少驚訝都無，似乎一切都係佢意料之內，佢仲不忘對住我，展示一個勝利既笑容⋯⋯

呢個時候，手機震左一震。

【黃日朗，你搞完我再去搞第二個？】係 Jamie 既訊息！

未完待續