《香港唔係追夢既地方》: Episode 31
Episode 31
Gareth 個眼神好似諗緊野，但轉個頭就只係望住我地點點頭，就走左去。
「咁奇怪既佢？你地唔打招呼架？」Sherry 問我。
「係⋯⋯同佢不嬲都唔熟。」我照直講。
「你唔好樹立咁多敵人呀，好易出事架。」Sherry 苦心提醒我。
「嗯⋯⋯點都好喇，今日多謝曬你。」我舉起杯，同 Sherry 乾乾杯當答謝佢。
-
我拎住紮花去到 Jamie 屋企樓下，我諗呢個時候佢應該係屋企睇緊電視。
我知道 Jamie 嬲緊我，一定唔會想見我，但我點都要哄返佢架喇。
我去左佢屋企門口禁鐘，但佢係防盜眼見到係我之後，竟然唔開門，仲叫我走。
我禁多幾次，佢仍然唔理我，睇來佢真係好嬲⋯⋯咁我唯有出絕招喇！
我去返佢屋企樓下個空地，望住佢個單位窗口，因為佢只係住二樓，所以我大聲叫上去，佢絕對聽到！
「林芷情！Jamie！」我大聲係到叫，隔離既人開始望住我。
無咩反應喎，我再叫！
「林芷情！你有一封未讀郵件呀！」
「你郵箱爆喇！來打開我吧！Come on！」
佢終於開窗啤住我。
「你傻架？」佢做口形問我，仲叫我唔好嘈！
「你打開郵件喇而家⋯⋯原來係一首歌呀！係林芷情⋯⋯唔係，林子祥既分分鐘需要你喎！」我講完之後，即刻放低紮花。
「願我會揸火箭，帶你到天空去，在太空中兩人住。」我一路唱，一路做手勢，指住佢話要帶佢上天空。
佢既隔離鄰舍都開始打開窗睇下我搞乜，仲有人拍片放上網。
「活到一千歲，都一般心醉，有你在身邊多樂趣。」我一路做小丑咁引 Jamie 笑，佢個樣又真係無咁惡，開始想笑。
「共你雙雙對，好得戚好得意，地塌地崩當閒事。就算翻風雨，只需睇到你，似見陽光千萬里。」
「有了你開心D，乜都稱心滿意，咸魚白菜也好好味。我與你永共敘，分分鐘需要你，你似是陽光空氣。」
「Jamie！原諒我喇！唔好嬲我喇！」我扁曬嘴，Jamie 終於扮唔到嬲，笑左出聲。
「好醜怪呀！返上來先喇！」Jamie 覺得好怕羞，拿拿聲叫我返上去。
「唔制呀，你陣間反口話仲嬲架，你講左我先走架。」我得戚咁望住佢。
「係喇！我原諒你喇！上返來喇！」Jamie 大叫。
「拿！你地幫我做證呀！佢再嬲我就係佢反口架喇！」我拿拿聲叫隔離既鄰居幫我做證，佢地居然點頭，仲做曬OK既手勢！真係好鄰居！
我拿拿聲拎住紮花上去佢屋企，原來佢屋企今晚無人。
「大人，原諒我未？」我笑笑口遞紮花畀佢。
「原諒喇！無下次呀！」Jamie 笑笑收左我紮花。
「講真話畀你聽架喇已經⋯⋯咁下次講假話囉⋯⋯」
「你講假話我就真係嬲死你！唔准呃我！知唔知道？」Jamie 指住我個鼻問。
「知道！大人！」我即刻攬住佢。
「大人，你今晚屋企無人⋯⋯可唔可以⋯⋯」我笑得好奸咁望住佢。
「你想點呀？我叫救命架⋯⋯」Jamie 都笑笑口同我玩。
「咁你叫破喉嚨都唔會有人救你架喇！」我即刻攬住佢訓係沙發就錫。
「破喉嚨！破喉嚨！」Jamie 又係到叫，我即刻錫佢個嘴，等佢無得出聲。
然後我地既衫褲鞋襪都跌曬落地⋯⋯
-
成件事都總算告一段落，我仍然都係要繼續返宿舍接受訓練，仲有就係要籌備比賽。
唔同既係，間屋只係得返我同 Gareth，有種感覺係，我地兩個好似暫時成為生存遊戲既倖存者，然後既龍爭虎鬥，應該都係我同佢之間既決戰。
點知第二日，我同佢食早餐既時候，就見到佢拎住本雜誌，個標題又係我！
「暖男Tony出招哄女朋友，網友一致大讚Tony深情可愛！」
下？個日唱歌哄 Jamie 又畀人拍低擺上雜誌？
「我無你咁識造勢。」Gareth 忽然開聲。
「你誤會曬喇，我只係⋯⋯」但我都未解釋完，Gareth 又繼續講。
「但我，係點都唔會輸畀你。」Gareth 啤住我咁講。
Gareth 對我敵意真係好深，唔通 Agnes、Edwin 走左之後，我仲要同佢鬥到底？
-
我接到 Lydia 既命令，要去寫字樓。
一打開門，就見到 Lydia、Morris 同一個人開緊會。我認得個個男人，係電影公司老闆。
「趙生，咁我有消息就再通知你好嘛，唔該曬。」Lydia 企起身好客氣咁同佢握手，然後就由 Morris 送佢走。
「Tony，來左喇？坐丫。」Lydia 叫我坐去佢面前。
「韓小姐，有野要搵我？」我問。
「岩岩個位係時代電影公司既老闆趙生，佢想拍一部電影。」Lydia 開始講畀我聽。
「你個日唱歌哄女朋友段片係網上熱播，人人都讚你係細心暖男，非常聰明。」Lydia 望住我笑笑。
「唔係呀韓小姐，我唔係有心⋯⋯」
「得喇，唔使講，總之我而家要塑造出你係一個咁好既男仔既形象，所以我會同趙生合作，開套戲畀你。」Lydia 講，我真係受寵若驚，有無咁快可以做電影主角？我咪紅得仲快過坤哥？
「我知道你偶像係坤哥同方皓玟，坤哥我就無打算同佢合作，因為我想你，做第二個坤哥⋯⋯取代佢。」Lydia 一副深謀遠慮既模樣。
未完待續