《香港唔係追夢既地方》: Episode 32
Episode 32
我返宿舍之後諗左好耐，我係咪就快可以達成我既夢想，做到第二個坤哥？如果係，我又點解會覺得唔開心？
追夢既美麗，原來係在於追夢既過程同努力，所經歷既失敗、挫折，反而係你最寶貴既經歷，證明你點樣不斷努力、打不死、屢敗屢戰。成功，其實只係一個 bonus。
到我真係成為左第二個坤哥喇，之後呢？要做第二個張國榮？
忽然間，我個內心好多唔同既思緒，但偏偏有種不安既感覺⋯⋯好似有種，風雨欲來既感覺，我感覺到有唔好既事即將發生。
－
跟住既日子，我都係努力準備比賽既事，因為我絕對唔可以輸，拍戲都只係其次，真正重要既係唱歌。
唔知係咪因為 Lydia 不斷同外界講，我將會接拍電影，令到 Gareth 覺得有威脅，所以 Gareth 既練習比起以前仲密左。
相比起 Gareth，我話自己努力，都真係有少少慚愧。因為我練習既時間係長左，但我個心諗既野反而多左好多。因為，Sherry 開始有 keep 住搵我。
就係咁，我一邊同 Jamie 一齊，一邊又暗中覆 Sherry 既 message，感覺真係好矛盾。好似好對唔住 Jamie，但我又唔算真係出軌，同 Sherry 都只係好普通既交流同對話，無理由真係完全唔理佢架嘛？
就係咁，我就好似行緊鋼線咁，維繫住呢段咁危險既關係⋯⋯
－
「喂呀，你會唔會問到你老闆拎到容祖兒演唱會既飛呀？好想睇呀⋯⋯」Jamie 同我講，今日我地又去左行街食飯拍拖。
「我試下喇！」
「你呀，唔使練習咩？就快又要比賽架喇喎⋯⋯個個 Gareth 好似好猛喎聽你講，你唔緊張咩？仲出來陪我咁好死？」Jamie 笑問我。
「掛住你嘛，咪想見你多D囉。」我講，但其實我自己都心知道，係因為出於內疚⋯⋯因為我係佢唔知道既情況下同 Sherry 傾計，或者抽多少少時間見 Jamie，就算係一種補償？又或者係我個心會好過少少⋯⋯
「口花花，你有無咁樣哄其他女仔架！」Jamie 忽然好疑惑咁望住我。
「無喇！緊係無喇大人！」我好緊張咁搖曬頭。
「講笑咋，咁緊張做咩喎！我就知你唔敢呃我，唔驚我唔要你咩！哈哈！」Jamie 好天真咁笑，我個心都當堂放鬆曬。
「緊係，靠你以後煮飯畀我食架喇，無你既話我會餓死死架。」我扮喊咁，哄到 Jamie 笑曬。
呢個時候，手機一震。
【Tony⋯⋯我想死⋯⋯】係 Sherry！Sherry 做咩會咁講？我從來都無見過咁上進既 Sherry 會咁講野⋯⋯佢一定係受左好大打擊！
我望一望 Jamie，睇住佢咁天真純潔既樣，我真係唔忍心呃佢⋯⋯但我唔可以講真話⋯⋯但我又唔可以唔理 Sherry⋯⋯
「Jamie⋯⋯」
「嗯？做咩丫？」
「我呢⋯⋯」
「做咩吞吞吐吐呀？」Jamie 問我。
「我⋯⋯我要返去練習喇！Lydia 急 call 我返去⋯⋯」我終於，都係講左大話⋯⋯
「咁咋下嘛？走喇走喇，比賽緊要丫，呢個比賽對你事業來講好重要架，你一定要畀心機，我體諒你架！行喇！」Jamie 推我行，但我真係唔願意離開佢⋯⋯佢太好喇。
「Jamie⋯⋯」
「做咩丫又？」
「我愛你，好愛你。」
「無喇喇咁口花花⋯⋯不過，我都係丫！傻佬，永遠都咁愛你！」Jamie 天真咁望住我講。
佢越好⋯⋯我個心越痛⋯⋯
我最尾都係轉身，離開左佢。
－
我根據 Sherry 同我講既地點搵到佢，見到佢拎住支酒同一疊紙，坐左係公園既角落。
「Sherry！你做咩呀？」我好緊張咁衝過去，因為我從來都未見過 Sherry 要借酒消愁。
「我真係⋯⋯好無用⋯⋯」Sherry 臉紅紅，似乎佢都有少少醉意。我過去扶住佢，不過諗諗下係呢到同佢傾，可能又會畀狗仔隊影到⋯⋯
所以，我決定扶佢返去宿舍。
－
我好吃力咁扶佢返宿舍，但我無帶佢上房，一來怕佢誤會，二來都真係怕我地會做錯事。
「Sherry，你做咩事咁唔開心？」我問佢。
「你覺得⋯⋯我份人點？」Sherry 忽然問。
「你？你好開朗喇⋯⋯好識幫人喇⋯⋯好聰明喇⋯⋯仲好有夢想添。」我照直講。
「夢想⋯⋯係，我都有夢想⋯⋯就係要令到香港有屬於自己真正既好劇本，我想香港人唔係淨係中意西片，我想香港人都可以中意睇返港產片⋯⋯」Sherry 講。
「你一定得架，你寫劇咁叻，上次個奪音樂劇，不知幾好睇。」我笑笑。
「叻⋯⋯叻都唔代表一定可以⋯⋯編劇寫既劇本，原來重要既唔係好定唔好⋯⋯而係佢識人多唔多⋯⋯寫既情節岩唔岩老細口味⋯⋯」Sherry 好頹咁講，然後將佢疊紙亂咁掟。
「喂⋯⋯唔好咁喇你！我覺得好睇架⋯⋯」我一邊講，一邊執返個疊紙，原來係佢寫既劇本。真係可笑，佢寫既劇既劇名，竟然係《香港唔係追夢既地方》，真係好應景⋯⋯
「我畀過咁多間電影公司睇，佢地無一間要我既劇本，反而個班咩⋯⋯《重甜日記》、《我老婆係AV女優》就畀佢地採用⋯⋯你覺得好睇？有咩用⋯⋯你幫到我咩？」Sherry 望住我，佢既眼神充滿悲傷同絕望，我好想幫佢⋯⋯
個個都可以唔明白佢，但我特別明白佢。
「香港人就係中意呢種劇⋯⋯畀你揀，你都會揀睇個種戲⋯⋯我只係想寫其他有意思既故事同劇本⋯⋯我只係想寫我中意寫既野⋯⋯唔通我又有錯咩？」Sherry 講講下，仲開始流眼淚。
「無⋯⋯根本無人會幫到我⋯⋯」Sherry 開始喊起上來，望住佢孤單既身影，我好想幫佢⋯⋯好想保護佢。
我攬住左佢。
「我會幫你，我應承你⋯⋯我一定會幫你。」我係 Sherry 耳邊講，佢都開始攬實我⋯⋯
呢個時候，我係玻璃既倒影，見到 Gareth 係樓梯口望住我地。
未完待續