《男人多情而長情，女人專情而絕情》: 第十一章

我地學校成隊波都好sad，特別係方子龍。 

差果一分，差少少就可以殺入總決賽，佢一定好唔甘心。 

「我地去搵方子龍影相呀，好無呀？」康僑問我。 

我見到方子龍咁都好於心不忍。 

於是應承左佢。 





方子龍俾一大堆人圍住，爭住要同佢影相。 

我地就等到佢同其他人影曬，先行埋佢。 

「岩岩打得好好呀！唔好咁灰啦。」康僑開始發揮佢既治療能力，真係會令人幾窩心。 

「差少少......」方子龍細細聲咁講。 

「就係差呢少少先有機會令你繼續進步，加油呀！」康僑鼓勵佢。 





「嗯，多謝你。」此刻既佢好似無心情回應人。 

「可唔可以同我地影張相呀？」康僑問。 

「好呀，但我想單獨同你影張相先。」方子龍望一望我，果一個眼神包含左好多野。 

康僑佢不假思索就應承左，真係唔諗下我。 

方子龍仲叫我揸機，真係幾慶下。 





佢將隻手放係康僑膊頭上面，初頭康僑都有啲驚訝，但都無推開到，好開心咁笑住影相。 

「呀華，過黎一齊影張啦。」康僑講。 

「唔啦，我唔鐘意影相。」我好老實咁講。 

「黎啦一齊啦，一張咁多姐。」講真真係好難拒絕佢。 

但我都係堅持，「唔啦，你地影啦。」 

「算啦，既然華Dee佢唔想就唔好逼佢啦。」方子龍勤康僑。 

心諗：你條友仔乘人之危，搞到我岩岩仲擔心你，真係去死啦你！ 

聽完真係好慶，但我無表現出黎，收返落個肚度。

影完之後我地由灣仔坐船去尖沙咀，全程我地無講過野，但我地有拖住手。

我地係星光大道拖住手行，望住個日落，真係好浪漫。

如果無去睇比賽既話會好好多。

大風暴前夕總是平靜。

「你係咪唔開心？」佢終於都問，我等左佢問好耐。

「無呀。」Hi，原來口不對心唔係女人既專利。

「真係？」佢好好語氣咁問我。

我已經心軟，我終於同佢講我唔開心既野。





「其實我真係唔知自己有?咩咁值得你去鐘意。」

我行去海邊，微微捱係攔捍度。

「方子龍佢咁完美，岩岩你同佢都幾襯呀。」我講出黎都好酸。

「原來有人醋勁咁大嫁？」佢仲笑笑咁講。

「係嫁啦！如果我唔呷醋就唔係鐘意你啦！」果時既語氣我都好重下。

「唔好嬲啦，最多我應承你下次唔會。」

相信有拍過拖既人都清楚，實會有講過呢句：「應承你下次唔會。」





「算啦，我都唔知我有咩值得你鐘意。」

「鐘意一個人洗咩講值唔值得咩？」佢開始駁我。

「如果真係要揀佢，我一開始就唔會揀你啦，我俾人玩咁多次仲點會揀果?人？」

「你講到咁，姐係你揀我係因為我唔會離開你？」我開始有D激動。

 

「唔係，係因為我地岩岩開始日久生情，而你真係一個好好既男仔，所以我先會鐘意左你。」 

「咁姐係如果當初坐係你隔離既唔係我，而係方子龍，你係咪一樣都會鐘意佢呀？」 

康僑佢無出到聲，我諗已經有答案。 

「我明啦。」我留低左呢句之後，我就走左。 

留低左康僑係果度。 





佢亦都無追上黎，我地就咁分開左。 

呢次係我地第一次既冷戰。

返到屋企，佢無搵我。 

好空洞，完全無動力做野。 

我一直思索緊究竟佢講既野係咪真。 

對於佢講既野唔知信唔信好，但內心深處始終都係相信佢講既野。 

為左可以繼續同康僑一齊，我會選擇相信。 

成晚我都無乜點瞓過，一直望住部手機，希望佢會響，但佢都係靜靜咁瞓左係張床度。 

第二朝，返都學校都見唔到佢。 

佢無返學，我更加擔心。 

真係好後悔自己搞到成件事咁，好內疚，如果可以黎多次我一定唔會再咁做。 

我諗返起家姐段說話，佢再受傷就會好慘，會變成點我真係唔知。 

當時既我，為左唔俾自己受傷，而選擇去受傷康僑。 

當時既我，完全無諗過康僑既感受，只有諗自己既感受。 

當時既我，為左逃避而逃避，無諗過要面對問題。 

我仍然係咁無用。 

我地之所以搞到咁，唔係因為方子龍，而係因為我。