《男人多情而長情，女人專情而絕情》: 第十三章

我幫佢拭完眼淚，點知佢喊得仲勁。 

完全停唔到咁，我真係最怕女人喊，依家成個粥館D人都望住我，勁尷尬。 

「做咩事呀?」我好溫柔咁同佢講。 

佢終於都答我，「無野呀，只係突然間諗返起，之前都未有人試過對我咁好。」 

「我有件事想話俾你知，但你聽完唔好嬲喎。」 





究竟咩事呢?腦海中瞬間浮現出好多種可能。 

係咪瞞住我同方子龍出去呢? 

係咪想同我講你好好人，你應該搵個更加好既人呢? 

係咪因為屋企問題，所以無得同我一齊? 

「其實你係尖沙咀海旁既時侯，我一直都無走到，我一直留係海旁，所以吹風吹到病左。」 





「下?」我估佢唔到。 

佢咁樣令我既內疚感大增。 

佢病係因為我，更讓我睇得佢好著緊我，而我卻怪佢同方子龍......
 
「你走左之後，我自己係海旁諗左好耐，自己唔應該係你面前同異性行得咁埋，係我自己做得唔夠好。」 

「而我係度等既原因係，我一直希望你會返黎揾我。」 





「但我知你唔會返黎，因為我曾經都俾人拋棄過好多次，每一次都希望佢地會返黎搵我，只要佢地肯返黎，我就一定係度。」 

「我既感性同我講好希望你會返黎，但理性同我講你咁嬲，邊會返黎，真係好矛盾。」 

「我係海旁回憶起我地岩岩相識到依家既日子，其實你好錫我，就連嬲我走左去，都係因為我。」 

「我係愛情入面就係咁卑微，為左所愛既人，我可以做任何野，亦因此變得一文不值。」 

原來我地既諗法都係一樣，我地都未試過咁樣認真溝通過。 

「你咁錫我，我真係覺得好幸福，幸福到好似覺得唔屬於我咁。」 

「令我覺得你應該值得更加好既人，我配唔上得到你既好。」
 
我聽完之後覺得好心酸，原來家姐真係覺得好岩，佢真係經唔起傷害。 





https://www.youtube.com/watch?v=1LJhXQ9FMLY 

就好似一直受虐打既狗仔咁，對人失去信心。 

我好內疚，唔想康僑受到傷害。 

「其實任何人都有幸福既權利，無人可以拎得走，你亦如是。」 

「由今日起，我會盡全力俾我所有幸福你。」我捉住康僑隻手，好肉緊咁講。 

我發現粥館D人望住我，靜左。然後細細聲咁笑。 

以前既我會怕羞，尷尬，無地自容。 





依家既我，唔再理人地點睇，我只會理康僑點睇。 

「我捉實左你隻手我就唔會放手嫁啦。」我好認真咁講。 

「你話嫁，講得出要做得到嫁！」 

成間粥館都充滿住甜蜜既味道。 

此刻既我地又點會知道，將來我地並唔係捉住對方隻手?
 
我送完康僑返屋企，我就自己返去，已經好夜。 

拍過拖既巴打都知道，送完女朋友返屋企，自己行返去果條路的確好孤獨。 

但好就可以同女朋友傾電話，但如果佢忙既話，行返去就真係幾難捱下。 





特別係大家屋企既地鐵站超過10個站既話，就好辛苦。 

幾經辛苦返到屋企，岩岩一路都有同康僑傾電話。 

「我返到啦，多謝你陪我傾電話返黎。」 

「你次次都送我返黎，我先要多謝你。」 

「好啦，唔傾啦，早D訓啦你。」 

「嗯，掰掰。」 

「我愛你。」我錫左部電話一啖。 





「好鬼衰既姐你，把口咁鬼甜。」聽得出佢既口吻好怕羞。 

「我都愛你。」 

終於捨得收線入屋企。 

我甜絲絲咁開門入去。 

一開門就見到我家姐企左係門口。
 
「做咩呀家姐你，企係門口，想嚇死人咩？」

「無呀，睇下你做咩嘴角含春咁囉。」

Hi Hi啦，係門口d野一定俾佢聽到曬。

「黎，我地入房傾啦。」佢細細聲咁同我講啦。

其實佢都幾照顧左，叫我入房傾，係唔想俾老豆老母知姐。

抵我咁錫你。

入到佢房，佢就開始「關心」我啦。

「點呀，同女朋友發展到咩地步呀？」

我地真係無咩隱瞞，好直接了當，成日都係咁，所以我地感情好好。

我一五一十咁講曬俾佢知。

其實俾多個人知道，可以幫手分析下成件事都係唔錯。

「咁姐係你地依家無事啦？」

「無野啦，只係我第一次拍拖，真係咩都唔識。」

「有邊個第一次就識嫁？仲要愛情呢樣野無人教你。」

家姐佢如數家珍，「那總之你記住：

1.人既欲望無窮無盡，你無可能滿足到佢所有野。

2.所有人都係口不對心既，包括你自己。

3.愛情俾到好多野你，但呢個世界唔係得愛情一樣野。」

「好好記住家姐講既呢3樣野啦。」