《男人多情而長情，女人專情而絕情》: 第十九章
但我睇得出康僑佢其實未準備好，佢可以做到咁，已經係好信任我。
我更加唔想佢失望。
我停止我手頭上既動作，即刻衝左入廁所。
我將水龍頭開到最大，然後用D水洗洗自己個面，冷靜落黎。
我望一望鏡中既自己，俾慾望控制住，成匹野獸咁。
我再用水潑自己塊面，試圖讓自己冷靜落黎。
潑左好耐，D水已經濺曬出黎，連塊鏡都係。
我問自己，「十年後，你會唔會後悔今日無繼續做落去？」
果一刻我係幾肯定，我唔會！
唔後悔就好，我咁樣諗。
我開廁所門，諗住入返房搵康僑，點知佢就企左係廁所門口。
一出到黎，見到康倩表情好低落，仲死盯住我下面。
我仲扯扯地既，但岩岩冷靜完，已經無扯得咁勁嫁啦，但佢都係死唔肯移走視線。
我大約都估到咩事，我行前大大力攬住佢。
（我聽人講女仔唔開心既時候，大多數都係想要人攬下佢。）
我攬到好實好實，攬左一陣，我感覺到膊頭濕濕地。
我想同康僑返房，但諗諗下，怕又發生D咩事，於是想帶佢去沙發度坐下。
當我想拉佢果陣，佢死死地企係度，唔想我走咁。
「傻豬黎，無野嫁，我地坐沙發度傾下啦好無？」我用溫柔既聲線同佢講。
佢死勁咁擰曬頭，仲要指住佢房門。
我唔係蠢既，我大約都估到佢咩意思。
「傻豬，出去沙發啦。」我嘗試拉佢出去。
點知佢都係一樣唔肯出，係咁擰頭。
佢捉到我好實，我未曾見過佢咁大力。
我行埋佢錫佢額頭，好用力咁錫，錫左一陣到，佢先肯放鬆少少。
我再一次試住帶佢去沙發，佢好似石像咁，點一點就識郁咁。
我慢慢帶佢去沙發到。
我拉佢去沙發既時候，順手將D燈開光D。
我地坐低左落黎，我見到佢眼睛紅曬，面上仲有幾條淚痕。
不由得心痛起黎，即刻解釋。
「其實我知你仲未準備好進入下一步，先忍住唔繼續落去，其實我都好辛苦。」
我輕輕撫摸佢塊面，拭一拭佢面上既淚痕。
佢沈默良久，我決定等佢出聲我又繼續講落去。
等左10分鐘到，其間我就咁望住佢，望住佢隻眼仔係度轉。
咩都無做呀，就咁樣欣賞佢囉，唔係可以點姐，唔通玩手機咩。
康僑好似平復返個心情，「我真係好愛你，好想俾曬所有野你。」
言畢，佢慢慢將個頭放係我大脾度，好似小朋友咁捱左落黎。
「但好怕你會離開我。」佢好認真咁望住我。
「傻啦，無左你，我既生活都唔知點算。」
佢笑左一笑，「呢種害怕你係唔會明。」
佢言重深長咁講，「當你經歷過好多段感情，受過好多傷害，終於俾你搵到岩你既人，你有好驚佢好似以前既人咁，離開佢。」
「我地呢個年代比起以前，更難搵到真感情。」
聽到呢到，我不禁諗返起家姐講既果段話。
的確，人與人之間既信任一開始係好易，但經過長期既傷害，再次信任就好難。
我輕輕摸住康僑既頭髮，一路係度諗野。
佢眼甘甘咁望住我，期待我講野回應佢。
「我都唔知將來我會唔會離開你，將來既事好難講，但至少依家既我，唔會想要離開你，甚至想要為你努力。」我經過思考先講呢一段說話。
我係毒，但我唔係蠢既。
「為左配得上你，我努力脫毒，努力去做運動，去做健身，呢一切改變，如果唔係你，我根本唔係想去做，更加無動力去做。」
「要一個男人為女人唔係件容易既事，但你卻輕易做到，因為我愛既係你。」
康僑佢有D驚訝，「呢次係你第一次同我講我愛你，你同我拍拖到依家都無講過一句。」
咁又難怪佢咁訝異既，男人既思維同女人思維的確唔一樣。
「女人覺得愛就要講出黎，男人覺得愛就要做出黎。」
「我覺得行動仲實際，一千句我愛你都及唔上一個愛你既行為。」
我慢慢將自己認為既價值觀話俾佢知，始終呢一番說話我好少會講出口，寧願放係心。
「你唔講人地點會知你愛人喔。」
「你係鐘意我呀，你就會感覺到嫁啦。」
「咁女仔鐘意人地講嫁嘛！」佢股起兩頗，又黎扮嬲。
「係啦係啦，唔好發脾氣啦，咁男仔同女仔諗野係唔同嫁啦。」我解釋俾佢聽。
「我想你認真聽我講呢一次。」我臉帶嚴肅。
「咩......咩事呀？」佢有D戰戰兢兢。
「岩先呢......」我吞一吞口水，「我唔係唔想同你做落去，而係唔想依家，我想等我同你結左婚之後先做。」
「我唔想咁不負責任，我寧願自己打飛機，都唔想再傷害你。萬一我同你做左，之前無辦法同你行到老，你受既傷會仲痛。我想你多D愛自己，錫住自己，唔好咩都俾曬我，依家既我唔值得你俾曬最好既野我。」
「俾D時間我，我會變得更加好，到時候你再俾你最好既野我啦，好無？」
係我講到一半既時候，康僑既眼睛已經慢慢浸緊淚水出黎。
但今次，康僑臉上係掛住笑容。
佢伸隻手上黎摸我塊面，細細力咁錫左我塊面一啖。
然後撓住我條頸，攬住左我。
係我耳邊細細聲咁講，「傻豬黎既，我愛你。」
聽到呢句我都忍唔住笑左出黎。
享受緊呢一種甜蜜既同時，我突然諗返起一D野。
份禮物！！！！！！！！！！
「呀！係啦」我突然叫左出黎，嚇親康僑。
「搞咩呀你，真係嚇鬼死我。」佢摸摸自己心口，試圖讓自己平復心情。
「無呀，我突然醒返起份禮物呀！你快D去拆黎睇啦。」我催康僑。
佢起身去廚房果邊，睇黎佢一返黎就放左係果度。
佢係廚房拎住我份禮物出黎。
我最期待既畫面就黎出現啦。
「咩黎嫁？咁緊張既你？」岩啦，佢出現問號既表情就岩啦。
「唔好問啦，快D拆啦。」我就黎頂唔順。
佢對住我反一反白眼。唉，女人變得真係快，上一秒明明咁喊緊感動緊，下一秒已經可以反我白眼。
我見住佢慢慢拆開D絲帶，開左個盒，佢既表情係咁：
「你......你做左幾耐？」佢有D不可置信眼前既野。
無錯！我就係要你呢個反應。
我揉一揉自己個鼻，好驕傲咁講：「做左成個幾兩個月嫁。」
生平第一次覺得自己咁得戚。
我期待佢下個反應係好開心好興奮咁笑上黎攬住我。
但佢無咁樣做，反而係粒聲無出，行過黎攬住我。
個盒入面真係裝滿曬好多唔同顏色既心心，D顏色都係我自己畫上去，講有錢我係無得贏嫁啦，但講心機講心思，我係無得輸。
「好多謝你。」康僑佢攬到我實一實。
我今晚真係激左佢好多次，我估佢既心情就好似坐過山車咁。
不過至少可以肯定既係，我捉住左康僑既人同心，佢已經走唔甩嫁啦。
「喂，呀僑，你仲未睇曬嫁，正係見到D心心就夠啦咩？」我算係俾左提示佢嫁啦，要講到出面既話，咪浪費曬我成份驚喜？
「下？仲有咩？」佢係我膊頭郁左郁，係人都估到佢係度拭眼淚啦。
一晚整喊左佢3次，我都幾Hi Hi下。
「你自己發掘下啦，我去一去廁所。」我借尿遁，俾時間佢搵下。
跟手我就行左入廁所，留低左不明所以既康僑。
我去完個廁所出黎，佢已經拆緊D心心黎睇。
我為左唔打擾佢，就去佢房間參觀下，因為要睇曬全部都需要D時間，事關我都做左好耐嫁。
佢間房唔算太大，又唔太細，可以話係岩岩好。
而且好整潔，十分符合佢既形象，被鋪係疊好曬，書枱擺放住幾本返學用既書，同幾隻跳跳虎既公仔。