[純愛]我有隻手鈪，可以上其他人身: 八
（八）
曾經幻想過，要是我可以帶著現有知識，重新回到中學生活，有兩件事是必須做的：第一是在堂上用大學知識威風一下，可是現在上課時根本沒有機會讓我發揮。
第二件事就是要追女孩子，我的中學生涯唯一的遺憾就是沒有好好地去追過一個女孩，所以到現在沒有拍過拖。我一直天真地以為只要考入大學，自然會有女朋友。現在我知錯了...而且好不容易可以回到中學生活，但我竟然變了女兒身...（好像也可以去追女孩吧？）
昨天不慎少做了一份功課，然後中史課的時候交不了。老師問：「邊個無功課交就企起身。」
徐正柱立馬站了起來，明明都中六了，還常常欠功課，到底有沒有心讀書？本來老師看到只有徐正柱站了起來，便欲破口大罵，卻又看到我一臉尷尬地一同站著，於是馬上用溫柔的語氣說：「拿，你兩個今日放學前要補交返比我呀。」然後叫我們坐下，繼續上課。
「欠功課唔似你喎，係咪為左放學陪我做功課咋？」徐正柱說。
「咪傻啦你，得閒我都返去訓下教啦。」我說。
「講中左啦，嬲啦。」徐正柱指著我笑。
「小學雞！」
「不如做完份essay 之後黎睇我打波丫。」徐正柱說。
「打咩波？」
「今日到我果班打班際呀，你會黎睇架可？」
「同你好熟...」本打算斷言拒絕，但想到唐尹明暗示過俞寶恩與徐正柱以前關係不錯，所以還是不要把話說得太死好，我說：「同你咁熟，做完功課我一定黎。」
在唸中六之前，每個星期五都是美好的。當下課後，就代表終於可以有兩天的假期，喘息一下。可是到中六的那年，星期五也不代表什麼，因為星期六也要補課，或是到自修室溫習。
捱到了放學，徐正柱跑到我班房來，說要教我做中史功課。可是他卻總是問我問題，也不知道是誰教誰。我故意放慢手腳，寫得慢一點，好讓我待會可以避免去看他打球。
「寶恩，咁呢個政策個失敗之處係咩？」徐正柱問。
「書咪有囉，第一係推行過急...呢一度有得抄，然後係國庫問題...」我在書上圈著重點。
「哦...咁即係我岩哂啦。我夠鐘去打波啦，你快D 做完份Essay 之後幫我交埋啦。」徐正柱將功課放到我面前：「記得黎睇我點樣打爆5E 班！」說罷，就拿起大背包離開班房。
徐正柱離開之後，另一個人馬上坐在我身旁，我往左一看，原來是黃博賢，他問：「寶恩，你同徐正柱頭先忙緊咩？」
我撥一撥頭髮，然後頭輕輕一側，微笑著對他說：「無呀，做功課咋嘛。」
「哦...一陣你係咪會去睇佢打波？」黃博賢問。
唔，我連自己班的比賽也沒有看，怎麼會去看其他班的賽事呢？我說：「趕得切咪去望下囉，你都應該要去睇下人地點打啦。」
「徐正柱D 打法我好熟啦....」黃博賢說。
「係喎，哈哈！你地以前係隊友黎架喎，但係後來做咩退隊既？」我一邊抄著中史書，一邊問。
黃博賢沒有答話，只是望到另一方去，然後說：「你口唔口渴？我幫你買野飲丫。」
正好我也口乾了，況且我在寧靜的環境下工作，效率應該會比較高，所以我說：「檸檬茶丫唔該。」
黃博賢離開了班房，然後就輪到文綺君坐在我身邊說：「寶恩呀，Sing Con 果度你諗成點？」
昨晚聽了一整夜的SHE 歌曲，對她們的歌有了一點點認識。可是要比賽的話，我怕還是會累輸她們。於是我說：「我怕累輸你地呀...」
文綺君脫下眼鏡說：「我地三個之中，你唱歌最好聽喎，依家咁講野即係咩意思先？」
「呃...我意思係...」
「你係咪想同其他人參賽，我無所謂架...」文綺君軟硬兼施，看來只得硬著頭皮頂上了...
「我當然會同你地一齊報啦...」我說。
文綺君高興地點點頭說：「咁唱返中四果首架啦！」然後又回到自己的座位，應該是在填報名表吧。
黃博賢買完飲料回來了，他將一包檸檬茶放到我面前。差最後一個段落就能完成了，我得加把勁去完成這份功課。而黃博賢就一直坐在我身邊，沒有說半句話，實在搞不清楚他在想些什麼。
「呼！搞掂！」寫紙寫到手都軟了，總算將這份功課完成。
「犀利。」黃博賢說。
難道他在等我放學嗎？頓然覺得有點尷尬，只好對他說：「你...仲未走既？」
「無呀，見你都未走，所以咪坐下囉。」他回答。
看一看時鐘，現在才5時多，應該趕得及去看徐正柱打球。我收拾好東西，然後帶好東西，打算離開班房。
「咦，你返屋企拿？」黃博賢問。
「Er…係呀，可能落去睇下B 班打成點。」我回應。
「好呀，我都想去睇下佢地打成點。」
這個人是在等我放學嗎，怎麼一直在身邊徘徊呢？大概俞寶恩與他也很熟吧，我還是繼續順他的意思好了。
我們到了籃球場，看到比賽時間只剩數分鐘，而6B 班已經領先二十分左右。
「唰！」徐正柱又成功地上籃，全場也為他的精彩步法歡呼。他看到我站在場外，馬上興高采烈地向我揮手，但瞥見黃博賢站在我身旁， 又馬上收起笑容繼續打球。
「走啦，都無野睇既。」如此懸殊的比數，根本就是以大欺小的比賽。
「嗯...」黃博賢似乎在盤算著什麼似的。
「做咩咁苦惱咁既？」我問。
「無呀，見B 班咁fit，唔知道我地今年有無機會贏咋嘛。」
「唔洗咁擔心既，最緊要係打得開心咪得囉。」我安慰他說。
黃博賢點點頭，然後我們一同離開學校。
回到家中，媽媽正在煮飯，俞定謙也乖巧地掃著地。我見大家也正忙著，於是也幫手收拾東西，不知道今天是什麼日子呢，竟然連俞定謙這種懶人也肯幫忙打掃。
飯差不多煮好了，俞定謙幫忙把菜捧到桌上，我坐在飯桌等開飯，這時門突然傳鑰匙的聲音，到底是誰回來了呢？
「岩岩好！開飯！」男人將門關上，然後隨手把鑰匙放到一旁。
看他滿頭銀絲，可是臉上皺紋卻不算多，而且身體看起來挺強壯。俞定謙喊了一聲：「爸爸。」
我自然猜到這個男人是俞爸爸了，只是第一次見他，感覺還相當陌生，也不好意思喊他作爸爸了，於是微笑地對他說：「食飯啦。」
晚飯期間，俞爸爸與俞媽媽一直討論著有關內地工作的事。從他的對話之中大概明白到，俞爸爸是因為工作關係才會一星期只能回來一次。之前有打算直接問俞定謙：「喂，我地個爸爸係咪死左？」幸好沉得住氣沒有去問，不然就糗了。
俞定謙今晚吃過晚飯後，並沒有像平時一樣跑回房裡，反而繼續坐在座位上夾菜吃。這種家庭晚飯，看似平平無奇，但對於俞氏一家而言，卻是每星期難得一次的家庭相聚時間。這麼說來，我對上一次與父母吃飯...是多少年前的事阿...
晚飯過後，俞媽媽在廚房洗碗，我與俞定謙坐在沙發上陪著俞爸爸看電視。
「謙仔，拿，零用錢。」俞爸爸從錢包拿出四百元給俞定謙，俞定謙乖乖接過。
難怪俞定謙今天表現得如此生性，原來俞爸爸掌握著他的經濟命脈。俞定謙這個小戲子也真沒職業道德，收了錢就馬上回房。俞爸爸拿出三張五百元給我，對我說：「寶恩呀，下個星期爸爸未必返黎，我比埋下個星期既零用錢你先。細佬果份呢，你下星期先比佢，廢事佢亂咁洗。」
我點點頭，將錢收下，然後陪他看完這部劇集。
明天要補課，家人洗過澡後都已經睡了，這個時間理論上我應該要睡覺的。可是我卻心血來潮要聽一聽歌，模仿著SHE 的唱法。今天終於拿到了零用錢，得好好收起來才是。於是我打開平常裝著錢的抽屜，打算放好現金，卻發現了抽屜下方原來有個暗格。難怪我總覺得這個抽屜好像很淺似的。
將暗格打開，裡面是一本精美的筆記本。我將它打開...
咦，這應該是俞寶恩的日記吧，不過又不是每日也寫，有時甚至一個月才寫一次，所以應該說是「週記」或是「月記」會比較好。這本週記最早的一篇是中四那年所寫的：
「 2013-9-2 MON
今日開學！悶左成個假期，終於可以返學啦
A班黎左好多插班生，不過一個靚仔都無既
好彩揀到文學同中史！不過無得再呀君呀玲
三個人一齊上堂吹水/0\
放學去左同呀君呀玲去旺中，呀君話新黎個
唔知乜乜順幾靚仔，呀玲就話坐佢隔離果個
劉先生好似唔錯。希望佢地兩個可以得米XD
買左本靚靚簿仔！我以後要keep住寫日記！」
「 2013-9-3 TUE
中史堂有個無聊既MK仔徐正柱坐我隔離
係咁講埋D 無聊野，個樣又MK，唔知想點。
今個學年要努力讀書！繼續拎第一！拎獎學金！」
隔了一個月左右，才有另一份日記：
「 2013-10-15 TUE
陳宗順終於肯開口表白XD，成班人都哄動
好羨慕呀君！終於等到個好男仔！
劉先生唔知想點，成日同我講想溝呀玲
但又唔肯去馬！
真係無鬼用！
文學堂調位～
黎左個好樣衰既毒男坐我隔離
係咁想聊我講野
煩到死
放學同徐生走<3，差D 比老師發現我地拖手
好彩我縮得快～ 」
嗯...難怪之前唐尹明會說「我」與徐正柱很熟...原來以前俞寶恩與徐正柱是情侶關係呢...哦...看到這裡我怎麼會有些奇怪的滋味在心頭呢...
陳宗順與文綺君已經在一起這麼久了，真羨慕他們。可是這個劉先生到底是誰呢？
「 2013-11-12 TUE
爸爸間廠終於頂唔住要執了，之前投資
既錢全部都蝕哂。
依家爸爸一個星期得一日可以返黎香港
其他時間要係大陸做野。
唉，連我D 零用錢都要CUT啦/0\
死人徐正柱你真係好小學雞
小學雞小學雞小學雞小學雞小學雞！ 」
難怪俞爸爸要等到星期五才出現，而且之前看到俞定謙的Skype 說什麼以前很有錢，原來自那一年起，俞氏一家就家道中落。
「 2013-12-06 FRI
就快Sing Con ！好緊張！依家晚晚都聽SHE
希望可以贏到啦/.\
想搵份Part Time ，但到到都嫌我細唔請我/0\
放學同呀君呀玲一齊食tea，呀君不停讚陳
宗順好好，煩鬼死XD呀玲仲一臉羨慕咁樣
劉先生幾時出手溝呀玲丫？呵呵！ 」
從以上這幾篇日記看來，這個劉先生好像對任婉玲有所傾慕，而且與班裡面的同學們關係好像不錯。可是我卻記得，A 班裡面沒有人姓劉阿，難道是其他班的人？怎麼這幾天也沒看到這個劉先生呢？我繼續往後看：
「 2013-12-20 FRI
贏左Sing con ，以後大家請叫我做調中HEBE！
李Sir 買左好多野比大家食！
聯歡會之後成班人去左唱k ！
劉先生唱情歌XD
不過，
點解係古天樂既「男朋友」？（佢唱到成個達哥咁）
明明呀玲都無仔。
好心劉先生同呀玲你兩個，明明對對方有意思
就早D 出聲啦XD
班際籃球！徐生好犀利！
我都唔知應該支持自己班定係B 班好啦！
恭喜徐生拎左籃球冠軍！ 」
「 2013-12-25 WED
同徐生出街，不過呢個人實在太小學雞
連自己既野都未處理好，點照顧我？
唉。 」
「 2014-01-05 SUN
掰掰小學雞 」
看樣子，徐正柱與俞寶恩之間的戀情應該在這劃上句號了吧。俞寶恩的日記上不停強調徐正柱是小學雞，我想他以前一定是個不太成熟的人。
日記後面好像再也沒有提過徐正柱了，俞寶恩大概已經放下這段感情了吧，我反而期待看看任婉玲與劉先生的事。
「 2014-02-13 THU
劉先生終於肯出手！
聽日要幫劉先生揀份禮物比呀玲
唔通佢想情人節表白？嘻嘻
好鬼浪漫！
呀君都話羨慕！ 」
劉先生看來對任婉玲相當認真阿，追了那麼久，終於要告白了嗎？真讓人期待！我馬上翻到後面那一頁：
「 2014-02-14 FRI
搞咁多野原來都係只係為左咁咋？ 」
「 2014-02-15 SAT
琴日放學同個賤人行旺角
又話要買咩買咩
行到夜晚話請我食飯
食完飯又話送我返屋企
我問：「你唔係打算今日表白咩？」
個賤人話：「係呀，俞寶恩！
我鍾意左你好耐，你可唔可以做我
女朋友？」
原來之前係扮追呀玲黎埋我身
死賤人，有無諗過呀玲感受
Cheap精，Cheap 到死。
我將呢件事講左比呀君聽
唉，唔知呀玲會點諗 」
「 2014-03-07 FRI
劉先生開始公然咁追我
呀玲都知道左成件事
然後呀玲就無再點覆過我Msg了
你滿意啦，賤人劉先生。 」
看到這幾篇日記，手不自覺地運起勁來。這個劉先生果真卑鄙無恥到極點，竟然假借追度任婉玲，來接近俞寶恩。這樣利用別人的信任，還破壞了女生之間的友誼，實在太過份了。
自這件事之後，俞寶恩的日記色彩也開始偏向灰暗。
「 2014-04-04 FRI
其實f.4係咪無可能搵到part time？
見左兩份都無聲氣
份零用錢完全唔夠用了
俞定謙可唔可以唔好再咁小朋友！
對屋企人態度好D 啦！
成日激嬲阿媽！生性啦衰仔！ 」
「 2014-05-12 MON
終於有間糖水店肯請我！
做住先啦... 」
由這天開始，俞寶恩就踏上了被剝削的道路。不過這也是無可奈可之事，實在很少公司願意去請一個年紀這麼小的女孩子阿。
「 2014-07-12 SAT
由第一名跌到第十名
都唔錯，起碼仲有獎學金！ 」
「 2014-09-01 MON
返左成個暑假工，都係賺得雞碎咁少
屋企部電腦壞左，唔想阿媽比錢
但細佬又無電腦用...
唯一開心既係知道左劉先生個賤人轉左校 」
「 2014-09-16 TUE
成個暑假既人工，就用黎買左部電腦。
不過見到細佬開心就得啦。
功課越黎越多，時間越黎越少
Essay，SBA，IES
點可能做得哂阿！！！！！ 」
「 2015-01-17 SAT
上學期居然跌到去全級四十名...
我係咪揀錯左科？
定係我根本唔適合讀書？ 」
「 2015-06-26 FRI
可唔可以唔考試？
我真係好辛苦...
成日淨係識偷偷地係房喊
完全唔知應該點算好... 」
「 2015-07-11 SAT
成績已經跌到谷底
翻唔到身啦
做Parttime又係咁比人鬧
我真係一無事處
我真係無鬼用...
點解會考得咁差................. 」
「 2015-11-14 WED
其實都一早知道無我份
好彩今日天台有保安行過
如果唔係...... 」
天台？保安？這篇日記是什麼意思呢？
翻到日記的最後一頁，看一看日期，是上個月才寫下的，正正就是我控制俞寶恩的身體之前兩個星期：
「 2015-11-16 FRI
如果呢個世界真係有神
如果真係天道酬勤
點解我要落得咁既田地？
補習又要自己出錢
買野又要自己比...
想買對鞋，又要唔知儲幾多年先得
細佬又唔肯比心機讀書..
爸爸媽媽將寄望放哂係我身上
前日班主任同我講
校長推薦計劃比左上年既第一、二名
就算有我份咁又點丫，我咁既成績
根本入唔到大學...
如果我真係入唔到大學點算？
我要去讀asso? hd?
定係早D 出黎做野？
我真係好想入U…
明明已經好比心機
但點解我總係考得咁差
下個月又要考試啦
如果再係考得咁差
到底點算好？？？？？
反正都入唔到U
好大壓力...
好想死..............
我想好好回報爸爸媽媽既期望...
如果有呢個世界真係有天使呢樣野
你，可唔可以幫下我？ 」
看完俞寶恩的日記之後，我的鼻子一酸、心情也變得沉重起來。
的確每個高中學生也背負著山一樣大的壓力，特別是像俞寶恩這種對自己有要求的學生，壓力可能更大。
經濟、學業、人際關係等因素排山倒海的襲來，作為一個十七歲的女生，又怎能處理得好呢？唉，她的壓力這麼大，難怪我這幾天控制著她的身體時會那麼順利。
不過，每個人也總得學會面對壓力，只有經過這些磨練，人才會成長。
我望向窗外，抹一抹臉上不知何時流出來的淚珠，想像到俞寶恩在做完功課後自己躲在被窩裡偷偷落淚的樣子。到底誰說中學生讀書時沒有壓力？
凌晨一時多了，我合上日記，又戴上耳機，就此睡去。