[純愛]我有隻手鈪，可以上其他人身: 十六
滿身大汗，走到更衣室洗了個澡。剛才在球場拍過照之後，李Sir 叫同學們先回班房一下，可能是有什麼重要的事情要宣佈吧，還是別讓大家久等，快快洗乾淨就回去吧。
回想一下剛才比賽時，由我得分的那幾球也是一些基本、簡單的上籃動作。從旁人的角度好看，應該不算很誇張吧...嗯，應該沒有人注意到什麼不自然的地方吧...
由於更衣室沒有風筒，所以我只能用乾手機把髮吹乾。
將衣物收拾好，離開更衣室，沿著樓梯走回班房。到底李Sir 會怎樣慶祝A 班奪冠呢？明天就到聯歡會了，又可以大吃一頓，然後與任婉玲和文綺君在台上唱歌...真期待明天的到來。
走到三樓的樓梯間，突然一把聲音把我叫停：「寶恩。」
我轉過頭來，只見徐正柱早就換回校服，靠在牆上。難不成他一直站在這裡等我？
「做咩？」我垂下頭來，將頭髮撥到耳邊。
「頭先場波...恭喜你。」
「多謝。」我打了那麼多年的球，贏了也是正常的吧。
「同埋...對唔住。」徐正柱突然低下頭來向我道歉。
「下？你做咩事呀？」我有點搞不懂狀況。
「頭先第四節果陣，我真係無心整傷呀賢...」
噢！對了！剛才為了拖延時間，我故意在徐正柱面對指責他蓄意侵犯黃博賢。沒想到原來他會如此在意這件事。想想也對，這關乎他的名聲阿，要是傳了出去，被人說他暴力打球，只怕影響他的球員生涯，我得馬上道歉才是：「我知！我知呀，我當時都係隨口講架咋，我諗其他人都明白你無心既！」
「其他人點睇都無所謂...我最希望係你唔好誤會...」他說。
看到徐正柱的樣子，讓我有些後悔當時說了這種話來。
「總之就係我唔岩啦...對唔住。」我說。
「俞寶恩。」他一臉認真地望向我這邊來。
「做咩？」
「我...」他一副欲言又止的樣子。
我望著徐正柱的臉，靜靜等著他說話。
「我呢兩年黎好盡力咁學識點去照顧人。」
「嗯。」突然說這些幹嘛？
「我記得你以前講過我份人太輕佻...我都好盡力去改。」
「係分開果日我先發現當時既自己真係好幼稚既人...」
「我成日諗...如果我唔係咁幼稚，或者我地可以一齊到依家。」
「可能我成日都好似玩世不恭咁，但有兩野係呢兩年黎，我提醒自己一定要做到。」
「第一樣係努力溫書，考好DSE。今日老師話我應該全班頭三名...所以應該叫做達成左。」
「至於第二樣野...」
「就係想追返你...」
「俞寶恩。為左你，我已經改變左好多，我會學識點去照顧自己，同埋...照顧好你。唔知你可唔可以比多次機會我...」
我一時還沒反應過來，這...這是告白吧？天阿，我被男人告白了。
我該怎樣回應？總不能說好吧？我又不知道俞寶恩現在到底喜不喜歡徐正柱...我本人是挺喜歡徐正柱這個人啦，長得不錯，打球又厲害，加上聽他剛才說自己考了頭三名，最重要的是他專一地追求俞寶恩差不多兩年了...簡單說就是個完美的中六男生，如果我真的是女生的話，也許會接受他的告白吧。
可是，我現在要接受他的告白嗎？萬一俞寶恩實際上喜歡另一個人，那我不就做錯了嗎？唉，我又沒有談過戀愛，不知道要如何面對告白阿...
要是俞寶恩也喜歡徐正柱，但我現在拒絕了他的話，搞不好徐正柱會開始追求別的女生，那麼俞寶恩一定會很傷心吧。以徐正柱的質素，要追其他女生也不是難事吧，這次拒絕了他的話，不知道他還會不會繼續追求俞寶恩...
「寶恩？」徐正柱見我遲遲沒有回答，所以喊了我一下。
「下？」我馬上回過神來，但還是不知道要如何回答才好。
「Sorry... 我係咪太突然...嚇親你？」徐正柱說。
「嗯...」的確被他突如其來的告白嚇到了。
徐正柱退後兩步，抓了兩下頭，對我說：「哈哈，咁...或者你依家未必答到我...不過你放心，我唔會放棄架！」說罷，他馬上跑回B 班的班房那邊去。而我的心一直跳，一直急促地跳...
感情這些麻煩事，我可幫不了俞寶恩阿...
我回到A 班的班房，只見大家正拍手喝采。文綺君走到我面前對我說：「咁遲先上黎既？頭先李Sir 話聽日聯歡會Party 會加餸呀！」
「咁大方？」李Sir 果真是個大豪客，平時已經常常買飲料給大家，這次還要豪爽地請大家吃東西，真想知道他的月薪到底夠不夠用。
「俞寶恩！全靠你落場先贏到咋！同學們比D 掌聲俞寶恩！」李Sir 說。
班房掌聲雷動，我拿了一包蘋果汁坐在一旁。看著男生們爭相拿著冠軍獎杯拍照，心裡也為大家感到高興。
「寶恩，我地終於拎左冠軍啦。」任婉玲坐在我旁邊對我說。
「係呀，終於打破亞軍宿命。」我吸一口蘋果汁。
「我唔係好識籃球，不過我見你好似打得好勁咁喎。」任婉玲說。
「我...我都係傳下球咋嘛，主要係黃博賢同馮宇謙...」我望一望任婉玲，只見她正望著馮宇謙傻笑著。
「馮宇謙...頭先射三分波個樣係幾Charm 既...如果我地聽日歌唱比賽都贏到，咁就好啦。」任婉玲咬一咬飲管說。
任婉玲根本沒認真聽我說話嘛...不過剛才馮宇謙的表現的確值得一讚。文綺君走到我與任婉玲身邊，說不如趁有時間，再練習一下歌唱。本打算直接與她們倆到音樂室去，可是剛才打籃球的幾位隊員硬要拉我合照，於是我就對她們說聲待會再見。
拍過照後，我走到馮宇謙身邊，對他說：「頭先果場打得唔錯喎，都話左只要你有信心就一定入波架啦。」
馮宇謙不好意思地抓抓頭，然後說：「其實最後果球都淆淆地架...如果唔入架話就真係唔知點算好。但係我果刻諗起林書豪前幾年係最後一秒射三分果幕...佢做到既我都應該做到，所以就鼓起勇氣，結果就入左啦。」
那刻他的心理壓力必定很大吧，幸好他不負眾望得了三分。我說：「果下係幾型既，連呀玲都話你射三分果刻好Charm 。」
馮宇謙低頭甜笑，然後說：「真既？係呢...聽日你同任婉玲佢地會上台唱歌架可？你地都要加油，拎個冠軍返黎。」
我點點頭，然後收拾好東西，走到音樂室。雖然剛才午飯時已經練過一遍，但明天就要上台比賽了，還是多練習比較好。
練了半個多小時，文綺君見大家也進入狀態了，就說：「我地聽日保持返呢個水準，應該就無問題架啦！」
「無問題係指？」我問。
「拎冠軍囉！」任婉玲說。
聽到任婉玲這句，我突然充滿對唱歌充滿了自信。曾幾何時只能坐在台下，看著其他同學在台上唱著我喜歡的歌，還能受到眾人的注目。現在自己竟然有機會站在台上...哈哈，明天一定要努力，把歌唱冠軍贏回來！
回到家的時候，已經差不多七點半了。俞媽媽剛巧煮好飯，而俞定謙正幫助將碗筷拿到桌上。
「寶恩，咁夜既？」俞媽媽問。
「係呀...去左準備聽日D 野...」
「係咪返埋聽日就放假啦？」俞媽媽又問。
「嗯，然後就放聖誕節假。」
「隻鈪幾靚喎，之前唔見你有隻咁既鈪既？」俞媽媽突然望著我手上的額。
「係呀...有個朋友送比我...」
我望一望手上那隻額，它由原來黑漆漆的一塊玉器，變成了玫瑰色。搞什麼鬼？原來不是我眼花，是它真的會變紅，難道這隻鈪會脫色嗎？還是它的表漆剝落呢？不過現在這種顏色好像比黑色好看多了。
吃過飯後，俞定謙又跑到房間之內。本來見他幫忙收拾碗筷，還打算讚他轉性了，沒想到還是一樣吃過飯就瑟縮房內。於是我又偷偷打開他的房門...其實這種做法很危險，要是他正在做什麼奇怪的事，那我就尷尬得很了...
才剛打開門，就被他發現了。他轉過頭來問：「家姐？做咩？」
一看他的電腦螢幕，整個螢幕也是中文字，大概是在看小說吧。我問：「睇緊咩？」
「高登小說咋嘛。」他繼續滾動滑鼠滾輪。
「哦...唔好睇甜故喎。」我說。
「痴線，我睇緊鬼故...你出返去啦唔好阻住我。」俞定謙用力把門關上。
他什麼時候開始愛上看高登小說了？不過換個角度想想，看小說總比打LOL 要來得健康吧...希望他不要去看甜故就好了。
洗過澡後，躺在床上，彷彿閉上眼就能隨時入睡。我戴上耳機，這晚就只聽「花又開好了」這一首歌就夠了。不知道明天的比賽結果會怎樣呢？突然手機一震，原來是某個對話群組發了訊息過來。
「文綺君changed the subject to "調中SHE－花又開好了！！"」
文綺君把這個群組改了名字，我微笑了一下，然後與她們在群組裡聊天。
我：哈哈，調中Hebe駕到
文綺君：練成點呀你地？
任婉玲：熟哂啦
任婉玲：我先係hebe btw
我：好緊張
文綺君：前年都係緊張左成晚
任婉玲：今年有咩對手？
文綺君：好似無咩特別勁既對手...
文綺君：B 班有幾個男仔話自己係調中飛輪海(笑喊)
我：邊幾個？
任婉玲：徐正柱有無份(奸笑)
文綺君：有！
文綺君：不過呢班人無咩威脅，唔洗擔心
任婉玲：哈哈，佢地係咪想上台跳D 白痴舞步？
文綺君：應該係呀，好似上年D F.6咁...
原來這個群組在兩年多之前已經創立了，那時候這三個人還是很要好的朋友，只是自劉先生那件事之後，這個群組就被冷待了兩年。我掃動到以往的對話紀錄，看著她們舊時的對話，馬上感受到她們三人當時的情誼有多深厚－－講別人壞話、講老師壞話、講男友壞話、講潮流、講音樂。
她們的對話幾乎就是由以上的元素所組成，不過有幾段對話讓我得別在意...
2013-10-15
俞寶恩：文學堂都無靚仔喎！
俞寶恩：老師仲調左我同個肥仔坐(笑喊)
任婉玲：係咪B 班姓歐果個？
文綺君：慘囉你今次(笑喊)(笑喊)(笑喊)
俞寶恩：係！D 滴水好稀疏果個！
俞寶恩：不停撩我講野，唔知想點
任婉玲：可能佢想追你呢(笑喊)
文綺君：叫徐生打佢一獲啦(笑喊)
俞寶恩：唔會係想追我掛
俞寶恩：我有男朋友架啦喎
2013-10-22
俞寶恩：今日個毒男真係變態到
文綺君：(笑喊)(笑喊)(笑喊)搞乜
任婉玲：偷影你對腳丫嘛(笑喊)
任婉玲：靚女係慘D 架啦(笑喊)
俞寶恩：我真係差D 講粗口架啦
文綺君：有無話比老師知？
俞寶恩：咁又無
俞寶恩：不過比我發現左之後，我就逼佢DEL左張相佢
任婉玲：徐生知唔知？
俞寶恩：無講呀，廢事真係去打佢啦
文綺君：(笑喊)(笑喊)(笑喊)笑死
俞寶恩：你地話點好？
俞寶恩：我聽日同老師講話想調位先
唔...大概由這個時候起，歐偉浚就不停滋擾俞寶恩了吧。可是俞寶恩卻打算息事寧人，沒有告發他。
2014-1-15
任婉玲：(笑喊)(笑喊)(笑喊)呀君
任婉玲：今日又有人向寶恩表白
文綺君：岩岩同徐生分手就有人狗衝啦
文綺君：邊個？黃博賢？
任婉玲：(笑喊)(笑喊)笑死，點解係黃博賢
俞寶恩：頂，呀玲唔好講呀(哭泣)
文綺君：(笑喊)唔會係歐偉浚掛
任婉玲：(笑喊)(笑喊)(笑喊)(笑喊)
文綺君：估唔到佢都幾勇敢架喎(笑喊)
俞寶恩：喂呀！(哭泣)
文綺君：咁寶恩有無接受佢既表白？
任婉玲：可惜無睇到寶恩個表情
任婉玲：尷尬到爆(笑喊)
俞寶恩：我一口拒絕左佢
任婉玲：其實歐偉浚都唔錯丫...又識文學..
俞寶恩：咁你要啦(笑喊)
任婉玲：痴線！
2014-1-21
俞寶恩：個毒男真係好Q 煩！
俞寶恩：日日都Whatsapp 我話要約我
任婉玲：(笑喊)(笑喊)(笑喊)
任婉玲：佢真係娛樂性豐富
文綺君：咁你咪同佢出一次囉
文綺君：可能你發現佢既優點(笑喊)
俞寶恩：唉！佢頭先恐嚇我
俞寶恩：話唔出就後果自負喎
任婉玲：爛桃花(笑喊)
文綺君：個毒男做得出D 咩丫
文綺君：唔洗怕佢
文綺君：佢再咁煩就話比老師聽
從這幾段對話也已經足夠讓我對歐偉浚產生極大的反感了。可是，俞寶恩也用不著害怕成這個樣子吧？
2014-1-30
文綺君：寶恩！
文綺君：你睇下呢個係咪你呢既？
文綺君將一個網址發到群組之內，我打開一看，原來是高登討論區：
「[有圖]索靚學生妹J圖！」
有些圖片已經失效了，可是大部份的圖片還是照樣能看。所有的圖片拍到某個女學生，我認得那套校服，正正就是調官中的女學生校服...圖片裡的那個女生不就是俞寶恩嗎？看一看留言：「好想奶！」「求FB/IG！」「對腳！！！」「摩牙！」「靚呀！女神呀！」
俞寶恩：頂！
任婉玲：擺明係條死毒男放上去...
俞寶恩：唉！
文綺君：聽日返去同老師講啦！
任婉玲：我地陪你！！
接下來已經沒有關於歐偉浚的聊天紀錄了。我想，俞寶恩當時被高登用戶評頭品足的時候，心裡一定不好受...幸好全部都是正面評價。
俞寶恩大概是因為不知道歐偉浚還會幹出什麼事來，所以才會如此害怕他吧。而這種恐懼的感覺由兩年前直到現在也沒有改變過...居然如此欺負寶恩...真過份，有機會一定要狠狠修理他一頓。
拉到最底，看一看最新的對話。任婉玲與文綺君二人也說了晚安，大概是想早點睡覺，明天能有好表現吧。這些年來她們互相幫助過對方這麼多，幸好到最後還是能回到一起，希望以後再也沒有東西可以拆散她們吧。
好期待明天的聯歡會...