《高登獵殺遊戲》(情景題變講故 ): 傾無聊計 聲優裕美

我地架小巴將幽靈戰車爆開左之後…

亦都可以正式宣佈係我地既女車神贏左。

「咦，睇黎你贏左喇喎。」我響尾座玻璃窗望住幽靈戰車離我地越黎越遠。

「知道我高登山女車神既厲害未？」女車神講。

「哈哈哈，我一早就知啦，唔係點會咁有信心搭你架車丫。」堡主咁講。





「車，你係鬼對我有信心咩。」女車神笑住咁講。

而我聽住佢地既對話，都忍唔住好輕鬆咁笑左。

「咦，乜呢度叫高登山呀？」我問。

「係呀，我而家車返你去搵你班朋友丫。」女車神回應我。

「咁我呢？」堡主講。





「再之後先到你。」

我見原來不知不覺間，鍊鍊下車已經離開左方丈間寺院個站一段距離…

即使而家返緊去，應該都仲有返一段時間先會到，所以…

我就嘗試問多D有關呢個世界同佢地既野。

「喂，女車神，相信你都係唔知點解黎左呢個世界架啦？點解…點解你唔去殺人完成任務返去現實世界既？又…你既任務又係咩呀？介唔介意講俾我聽呀？」





「現實世界！？重要咩？現實世界充滿歧視，女人要做車神？哼，真係談何容易，返到去我就真係只可以係一個小巴女司機。資訊發達既年代，最諷刺係連我點樣參加賽車比賽都唔知，更何況我鍾意既係揸小巴，我鍾意既係香港既路段，現實世界就只有限制，根本揸車鍊車都談唔上一個爽字。響呢度，最少我可以響冇任何限制底下，不斷咁挑戰自己。」女車神一邊揸車一邊講。

「我咪又係，響現實世界，我只係一條毒撚，仲要係毒中毒，因為我係獨子，老豆老母都獨行獨斷，根本冇理過我，我黎到呢度，最少我有個骷髏頭堡。」堡主講。

「其實…」我本來想講「其實我冇問佢。」

不過見佢咁認真答，都係算喇，廢事好似串佢咁。

「咁你地有咩任務啫？」我再問。

「任務基本上，估計黎講大家都差唔多，都係要有十分，即係十粒高登膠，每個人一黎到呢度基本上就會有一粒膠，簡單黎講，呢度係一個搶九粒膠既遊戲。」女車神講。

「不過每個人都會被分配一D特性﹑特質﹑異能﹑工具或者係特別任務咁，我都唔怕講下我自己，我既任務好奇怪，可能同我個名有關，我除左殺九個人搶膠之外，其實仲可以憑住城市規劃黎攞膠，但係咩叫做好既城市規劃，我到而家都唔知，所以都停左落黎，決定留響古堡渡過餘生就算。」堡主講。

「我地…不如交換手提電話丫，丫，唔係，呢度應該冇手提電話可以用，咁…其實有咩方法可以聯絡呢？」我問。





「Call台。」佢地異口同聲講。

「Call台！？點樣用呀？」

「直接搵某個人係冇可能，不過可以留言，約人響某地方等。」堡主講。

「我試一次俾你睇。」女車神。

(咯咯 ~) 女車神響佢左手邊拿起左個對講機。

「Calling！Over！Calling！Over！我想…」

佢停左落黎，另向我講︰





「喂！靚仔，你點稱呼話？你又想搵你邊位朋友呀？你講佢地個名我聽丫。」

「我…我叫張子銘，你叫我契弟啦，我想搵…求其啦，小…都係屎忽佢啦。」

(你真係當左自己係契弟！？)

契弟唔係即係男朋友咩？(高登Filter)

俾多D靚女叫自己男朋友，其實都幾爽。

「好，契弟想搵屎忽，Calling，契弟想搵屎忽，Over！」之後女車神對住對講機講。

「冇問題，Over，冇問題，Over，大把屎忽等緊契弟。」Call台回應。

「叫屎忽響老哥立度等，Over。」





「老哥立係咩呀？」我好奇問。

「專醫痔。」堡主講。

「專醫痔！？」

「痔瘡個痔，講緊間寺廟呀，行內術語黎。」

「哦，咁我明喇。」

我之後衝左前去，仲搶左女車神個對講機，諗住試下玩…

「唔該你噃，Call台大姐，Over。」





「你叫我五十嵐裕美啦，我係聲優黎架，Over，不過…