作者的話: 

從天使之戀II結束後就緊接開始寫,歷時70日(7月14日~9月21日),共296頁,152, 568字,只係一篇寫作手法簡單既記敘文。 

一開始都係以為十萬字之內就搞掂,估唔到都寫到咁多,我亦好慶幸自己可以番番到日日寫兩千幾字既水平,唔似得作天使II果陣咁頹,一日得果千零字,兩個月內就嘔出15萬字,對比起寫天使II果陣用五個月先寫得出27萬字,在下狀態大概都算有所回升。 

https://www.youtube.com/watch?v=IN-GOfh1PXE 

「維吉爾」也好,「琴血」也罷,都只係一個稱呼,總之最後落得如此結局既人,故事既主人翁就係我。 



點解要寫呢個故事呢?其實原因有好多,首先最大既原因就係維吉爾從認識「紙製摩天輪」,搭船見呢個網友,為佢付出一初,再到經歷人生低潮時被人所遺棄,被出戴綠帽,最後自己變成浮誇之間既過程實在係太戲劇性,連自己都唔相信自己既生活竟然就同電視劇一樣咁「精彩」… 

遇上咁既事,的確係極為悲慘而痛苦,但我並唔係完全沉淪起苦海當中,而係選擇將一切寫成故事。一個包含港澳地域歧視、網戀、 異地戀、出軌既故事,情節實在係太曲折離奇、扣人心弦,我作為一個作者,有個咁精彩既題材,實在係忍唔住唔寫。 

其實唔係剩係故事劇情曲折,就連我起寫既過程中都經歷過無數波折,痛苦過徬徨過掙扎過,我起寫故事既過程中所經歷既事我起之後既外傳中都會詳細敘述,敬請留意… 

你如果問,一個男人岩岩比人拋棄,仲最痛最深刻既時期就將自己做兵既血淚史寫出黎,當中既過程係幾痛苦,內心會有幾撕裂的話,我會答你,我簡直直日日都被虐到半生不死。 

幸好最後我都可以克服沿途既所有困難,捱過各種心酸及前熬。我好感謝每一位支持我既毒者,除左讀者之外,大家更加係我既朋友,冇大家我未必會捱得到落去。再一次多謝你地,你地當中甚至有啲係由天使一開始就開始追既,一路追到而家,你地真係長情,哈哈... 



另外我都想多謝我起故事入面提到既果個Group入面既成員,雖然我同佢地已經分道揚鑣,佢地好多都已經因為我既為人,同我對女主角藹晴所做過既事而對我感到十分不屑,甚至鄙視我,我唔會講聲「Hi你」,不過始終都係因你地既存在我先有呢個題材,冇你地我都寫唔出呢個故事...

特別鳴謝一位叫「雪榚味雪榚」既讀者,佢起幕前幕後都幫左我好多,至於佢點樣起我寫作過程中幫助我,我會之後起外傳中講到。 

我最感謝既,係我身邊既一班朋友,阿朗、阿添、阿豪、Phelba同埋當然,成個故事中最重要既薰衣草女孩,天使琴兒,冇佢地起我身邊的話,我都唔知自己起被背叛之後,捱唔捱得過果段心靈創傷最嚴重既時期。 

講番寫呢個故事既原因,我唔係話真係想散播仇恨、報復藹晴同Austin,事情既然已經過去,就由它隨風而去,無謂再深究落去,再究落去都只會令我呢個傻小子損手爛腳。藹晴同Austin的確真有其人,亦真有其事,但寫得出呢啲野,我自然會盡力保護故事中每一個真實人物既私隱。 

在下同藹晴之間既故事當然唔止係由4月11日至到4月29日咁短,呢個只係一個濃縮版,不過寫重點就已經夠啦,再多寫都係無謂,要寫既已經寫哂出黎,維吉爾同藹晴間既事大致上就係咁。 



還記得我同藹晴可以講係由Dear Jane拉埋一齊,都可以算係起Dear Jane既音樂中結束。當初藹晴被傷透、孤獨時,我比一首「哪裡只得我共你」佢聽,然後就飛越伶仃洋,展開同佢既故事... 

數月前,Dear Jane搞左一場IG抽相既Mini live,我地亦有幸被抽中,最諷刺既係我地既關係就係起果日開始注定要結束,當Dear Jane唱起「就用我的雙手,帶著你走不掙扎、只緊扣」同埋「不許你注定一人,永遠共你去抱緊」時,我都伸手去握住藹晴既小手,Dear Jane既主唱仲望住我微笑,果下眼神就好似起到講「衰仔,幾醒目喎,周圍果幾Pair都剩係坐住起到剩係聽歌,得你一個男仔咁識得把握時機氹女仔!」,我都笑住望左一下主唱... 

但後來,佢地唱起「無可避免」,當主唱唱到「請不要再悼念從前,講分手不必講...再見」果陣,佢又望住我黎唱,搞到我心都寒一寒。結果我地聽完呢次Mini live之後,我同藹晴既感情就起九龍灣呢個地方破裂,自始,一向好欣賞Dear Jane既我就再都冇開過Dear Jane既歌黎聽,九龍灣我亦再冇踏足過,呢個地方同呢個樂團既音樂就隨住藹晴呢個人,一齊比埋葬在我記憶中既深處。 

你地係咪起到心諗,可以起Dear Jane Po當日Mini live既合照到刮我出黎呢...刮吧刮吧,在下特徵:矮毒窮醜。 

我想借呢個故事,借描述出維吉爾被藹晴戴綠帽後既巨大痛苦,奉勸每一位仁兄,無論發生咩事都好,出軌係一條錯既出路!對你既伴侶保持絕對專一、忠貞、忠誠,係唯一一個令你地走得長久既方法,要解決任何問題,都必須要以伴侶忠貞為基礎。 

對自己伴侶真係感到厭倦想搵第個既人,我勸你即刻同你另一半分手,你自己作出咁既選擇係你既事,唔好拖住人地哂人地時間; 

未拍拖既朋友,我希望你地可以對呢個case引以為戒,將來起一段關係中唔好比自己犯咁既錯; 

戀愛中既朋友,我衷心祝福你地可以與對方持守到底,如果你地可以做到尊重信任對方,對對方坦誠,有事拎出黎一齊溝通,保持絕對忠貞,將婚姻視為無價的話,你地一定會好幸福。 



扮完一輪情場軍師,講番個故事既寫作啦... 

同天使之戀唔同,我打完天使之戀一定會有好多劇情同人物既分析同寫作心得分享出黎,但今次呢篇真係只係一篇純粹憑我回憶打番出黎既記敘文,冇天使之戀咁轟烈浪漫既愛情。 

人物方面都冇點去特別刻意修飾,藹晴我冇特登醜化過,天使琴我亦無特登美化過,只係將兩個女主所做既事同佢地既行為性格好原本咁敘述番出黎。 

當然,呢個係一個建基於真人真事既故事,所以女主角唔係完美,行為言語上會有好多缺憾,而男主角最後甚至仲惡魔甦醒,變身為魔化維吉爾。我當然可以將男女主角都美化,但我唔希望咁做,因為我唔係想好似往常咁寫一齣唯美浪漫既愛情小說,而係比較原汁原味咁用記敘文,將愛情毒於砒霜既果種愛恨交織既情感掙扎赤裸裸地呈現,還原番出黎。 

所以其實我都冇咩講啦,或者你地有咩問題可以留言問我,我好中意答毒們者既問題。 

係啦,有啲新毒者可能唔明,點解咁多友仔起到留言講天使琴、天使彤,又故事一推出就中意琴兒多過藹晴呢?仲有所謂既天使之戀係咩呢?其實講緊就係我之前既故事,有興趣既朋友可以參詳下... 

https://www.shikoto.com/author/14541/%E7%90%B4%E8%A1%80.html 

未完,仲有至少多於一個外傳,敬請大家留意。 



我目標好明確,我剩知自己要快啲寫完個故,準備好心情,起10月8號迎接The Flash第三季。寫完維吉爾我會寫咩?我會重寫天使之戀同阿彤真人故。 

在下為琴血,在琴上滴上自己的血和愛,手指與琴鍵交融,奏出心中的戀曲,後會有期。