Ch6.

        個天已經入黑,岩岩雷米既火系魔法所造成既影響亦都漸漸消失。
 
        商隊眾人係緣風林入面搵左一幅較平坦既空地,係附近紮營,運送商品既木頭車都拖晒過黎。
 
        火把矗立係營帳既四周,巡邏隊分成兩隊替更。
 
        眾人係砍樹開路上用左唔少體力,但無奈只能以乾糧充飢。
 




        對於眾人黎講,鬍子老闆拎出黎請客既紅酒,已經係最好既慰藉。
 
        池目同兩個小隊成員、鬍子同一班商隊成員、我、同雷米圍成一圈,鬍子正係到講緊佢多年黎行商既見聞。
 
        「講真既,哈哈,老子我有咩風浪未見過,一大群四、五十lv既魔獸湧出黎搶商品我都遇過。天藍城原本治安就比較好,如果唔係又點會淨係招募一啲二、三十lv既隊伍黎護送。」鬍子瞇著眼講。
 
        「老闆,你醉喇…」一個商隊成員講。
 
        「哈哈,你先至醉呀,老子冇醉!果啲乜商品物商品,根本就唔值錢,就算今日真係比人搶晒,損失都唔會多,老子個呸,搶搶搶,搶條毛咩,我永言大商會係你好得罪架咩!啊~」鬍子講完就訓低左。
 




        而池目聽完鬍子既酒後胡言,只係淺嚐左一啖紅酒,留低一句:「係時候換更。」就起身走開左。
 
        「咁,方小哥,告辭先。」兩個小隊成員跟上池目既步伐。
 
        我同雷米未成年,所以冇份飲酒,得果汁飲。宜家鬍子同池目都唔係度,我都冇乜必要留低。
 
        「我地都返營先。」我對商隊既幾位成員講。
 
        「好呀,今日真係辛苦晒你地,我諗夜啲支援既人就會到。」一個商隊成員。
 




        依個時候,一隻白色雀仔飛過黎我地依度,停留左係鬍子身上。小白鳥腳上綁住一卷信紙,好似古代啲飛鴿傳書咁既feel。
 
        跟住隻雀仔見鬍子冇反應,就用個咀督佢塊面,跟住咬住佢啲鬚黎扯。
 
        「屌~邊個呀!」鬍子比隻雀騷擾,心情唔耐煩,於是望一望,一見到係信鴿,就當堂醒左,拎起封信黎睇。
 
        鬍子拎左封信之後,雀仔就折返飛走。
 
        鬍子好認真咁睇封信寫乜,我偷偷行去佢後面昅,發現每個中文字我都識,但加埋一齊我真係唔知佢講緊乜。
 
         一個商隊成員見到我咁樣,就笑笑口講:「冇用架方小哥,雖然話『私信』(註1)其他人都睇到,但我地商會有再加密,唔係咁容易解讀到。」
 
        鬍子睇完之後,就拎左張信紙出黎,係上面撩呀撩,應該係準備回信。
 
        依個時候,一個黑影從天而降,「喂,鬍子!」從聲音判斷,係一個少女。




 
        「哇屌!」鬍子比果個身影坐住身體,令佢冇辦法郁到。
 
        我由側邊望過去,一頭亞麻棕長髮、裹係衣服入面微微隆起既胸部,同埋果對充滿美感既大腿,唔,果然係個少女。
 
        「你老尾又飲酒呀話,吓?咪叫過你運送期間唔比飲酒。」個少女講。
 
        唔,明明都算係一個美少女,但點解講野啲語氣好似怪怪地?
 
        「大、大小姐點解你會親自黎既!?」鬍子望清果個身影之後,乜酒醉都醒晒。
 
        「呵呵,少女既逆襲大成功~」不遠處黎左一隊騎馬人員,帶頭果個如是說。
 
        「喂喂,老侯,你同我好好解釋一下!」鬍子對帶頭果個講。
 




        「咪姐係,大小姐跟會長學商學到好悶,咪出黎搵你玩下囉。」老侯。
 
        「喂喂,你淨係同老侯講野得架喇,眼中冇我依個大小姐架喇?」少女。
 
        「仲有老侯你,乜野叫學到好悶,我依啲叫實習!」少女。
 
        「真係傷腦筋…」鬍子微微搖頭。
 
        ……
 
        支援部隊將馬匹安置好之後,陸續接替左巡邏既工作。
 
        老侯坐低同鬍子聚舊,鬍子既酒意再臨,又飲左好幾杯。
 
        少女坐係鬍子既旁邊,不時開鬍子玩笑。




 
        而雷米今日魔力消耗有啲多,身體比較攰,就返去訓先。
 
        「係喎,小兄弟,你叫咩名?」老侯問我。
 
        「呵呵,依個細路就勁喇,今日就係佢,係,就係佢,啊唔係,係我~」鬍子又再次醉倒。
 
        「方言。」
 
        「認真呢?」老侯。
 
        我望住老侯個樣,我望唔清,我睇唔透,我唔知佢真係知依個係假名,定抑或係乜野。
 
        依個時候,大小姐突然間插嘴:「啊,原來就係你,黎,同我單挑!」
 





提示:
 
詠雯向你提出對決請求,你是否接受?
 
模式:一對一
 
規則:半血對決,藥水禁止
 
獎勵:無
 
備註:陷入無時效的昏厥狀態者,自動判定為敗方。」
 
        「我拒絕。」依啲人,感覺就好細路女feel,就算贏左佢咪盞死纏爛打落去。
 
        再加上我今日戰鬥咁耐,隻右手又未好返,真係咪搞咁多野。
 
        「喂,你做咩啊!」
 
        「Sorry,我唔想打。」我講完企左起身,向營既方向走。
 
        詠雯將手伸出,想捉住我。「你同我企…」但係都未講完,我已經閃走左。
 
        「呵呵,比人拒絕呢。」老侯。
 
        「啊你個臭老侯係度幸災樂禍!」詠雯將身邊一個酒杯一腳踢過去,不過老侯一伸手就接住左。

        「哼!」詠雯氣沖沖咁離去。

        ……
 
        由天藍城去天臻城,最快只需要大半日路程。
 
        不過咁係要訓練有素,加上冇任何突發事故先做到,就好似黎支援既商會一行人。
 
        至於商隊依種緩慢既移動單位,大概六、七日走唔甩。
 
        而依兩日以黎,雖然商會大小姐詠雯不斷搵機會挑戰我,但都被我通通拒絕。
 
        某個營帳入面,老侯搵左我入去同佢吹水。
 
        「佢大概係一直好想證明自己既實力。」我咁樣分析。
 
        「呵呵,方小弟,依啲就係青春呀。」老侯拎起個樽,飲左啖入面既凍飲,跟住問:「咁,你諗住一直拒絕落去?」
 
        我攤開手,講:「暫時係掛,我仲未諗到個兩全其美既辦法。宜家就算我肯同佢打,贏左,佢又繼續挑戰我;輸左,九成又話我讓佢呀明明商隊啲報告入面我唔係咁樣呀乜乜乜。」
 
        「呵呵,方小弟,你都幾識睇人架喎。唔知仲以為你識左大小姐好耐。」
 
        「講依啲。」我輕嘆一聲,諗起詠雯個樣,「唔係我識睇人,係佢咩都寫晒係塊臉上姐。」
 
        「大小姐都幾好呀,雖然話粗魯左啲,不過樣同身材都幾唔錯呀。」老侯笑笑口。
 
        等等先,識左兩日你就同我講依啲?倒貼呀宜家?同埋乜宜家啲人咁夠薑光明正大咁同外人討論自己boss個女架咩?
 
        好大陣陰毛味,我都係唔好亂答。
 
        「佢…」依個時候,我突然諗起一樣野。
 
        ……
 
        「咪姐係,大小姐跟會長學商學到好悶,咪出黎搵你玩下囉。」老侯。
 
        「喂喂,你淨係同老侯講野得架喇,眼中冇我依個大小姐架喇?」少女。
 
        「仲有老侯你,乜野叫學到好悶,我依啲叫實習!」少女。
 
        ……
 
        「會長佢…冇男丁?」
 
        老侯一聽,又用返佢果副撲克臉望住我,就同上次佢反問我「認真呢?」果陣個樣一鳩樣,完全令人睇唔出破綻。
 
        過左兩秒,老侯又笑返,講:「哈哈,有趣,有趣,方小弟你真係好有趣。」
 
        依個時候,有人衝左入黎。
 
        佢腳步非常之急,但入黎果陣眼尾都瞥一瞥到我,佢講:「侯大人,失禮,但係有緊急情況。」
 
        老侯望一望佢下屬再望一望我,佢好似廢事叫我走咁,自己哄左上前聽。
 
        一聽之下,佢臉色為之一變,神情凝重。
 
        「方小弟,跟我黎。」
 
        ……
 
        「夠鐘換班咯~」一名隨行既女性支援人員對守備商品既人員講。
 
        宜家係商隊出發至今既第三晚,距離劫商經已兩日,天藍城往天臻城既路程已經行左五分之二有多。
 
        由於依趟商品唔趕,商隊每天大約只行半日路程,日出時開始移動、天色入黑時就停低,尋找適合紮營既地方。
 
        商隊既車輛都放晒係同一個範圍之內,由六至七個人守備。
 
        「辛苦晒。」
 
        「你都辛苦喇~快啲去休息喇。」
 
        客套既話講完,守備商品既人由女性黎既方向離去,等佢接替自己既位置。
 
        但係果個女既,趁住守備人員背對住佢既果一刻,手裡出現左魔法陣!
 
        「岩丫,係時候要休息架喇~」佢喃喃自語,同時將手中既技能送比果位人員既背脊,然後「啊!」一聲,人員應聲倒下。
 
        「睇黎要速戰速決先得。」佢講,然後走近放置商品既木頭車。
 
        ……
 
        我同老侯係營帳度跑出黎,幾分鐘內就到左放置商品既地方。
 
        依度架起左幾個帳篷頂,遮擋雨水同陽光,二、三十輛木頭車全部放晒係依個area,而地下就有個商隊成員訓低左。
 
        幾個商隊成員檢查緊佢既狀態,另外有幾個成員檢查緊木頭車。我自己都用右眼望過,訓係到果個成員已經死左。
 
        老侯依個時候問我:「方小弟,你用空間魔法,會唔會分到對方用左邊類魔法。」
 
        「我新手黎架咋喎,鬼識呀。」
 
        「你岩岩睇人數據果陣,咪右邊眼珠會變紅,你宜家想像下同一個情況,不過係用左眼。」
 
        我聽老侯咁講,又試下對周圍望一望,發現呀屌你又真係望到。
 
        我見到附近有各種唔同形狀既公仔,有啲似粒水滴咁,有啲似個小火苗咁,應該就係元素黎,但係佢地都係死氣沉沉咁,而且數量稀少,可能同夜晚有關係。
 
        老侯見我好似成功,就催促我:「做正經事先。」
 
        我行埋去死左果個成員度,望一望佢身體,發現佢身體比少量既公仔纏繞住,但係以我或者寧風既記憶都好,都唔識分依啲係咩黎。
 
        於是我答:「唔得,分辨唔到。」
 
        「咁得兩個可能,一係lv差太多,一係係用家族獨有的魔法。」老侯分析道。
 
        依個時候,檢查木頭車既人有發現。
 
        「侯大人!依邊!」
 
        我地行埋左去其中一輛木頭車度,個成員講:「侯大人,依架車有開封過既痕跡。」
 
        「的確,即刻通知鬍子,跟住叫人黎點算商品,我要知對方偷左啲乜野!」老侯發號施令。
 
        成員都即刻行動,但係依個時候又有成員衝左入黎。
 
        「侯大人!大…大小姐唔見左!」佢大嗌住走入黎,今次我聽得好清楚。
 
        所以話,女人就係麻撚煩。
 
        「瞬。」我連續使用幾個瞬移,踏上我既深夜尋人之路。

        ……
 
        「停低!」詠雯追趕前方既商隊女成員,大嗌。
 
        「仆街呀,死人蘭同我停低!」詠雯繼續嗌。
 
        兩人係緣風林既樹上穿插,詠雯只能勉強維持住係樹枝上行走既速度。
 
        但蘭就唔知點解,係一棵棵樹木間如履平地,再咁落去,詠雯好快會被扔開。
 
        「再唔停低我就用魔法架喇!」
 
        蘭依舊冇答覆,只顧趕路。
 
        「切…」詠雯右手上既魔印徐徐轉動。
 
        詠雯施放左一個防禦魔法,電網,雷米之前都曾使用過。
 
        依個係一個可以係前方組成電網,掂到既人都有機率會被麻痺既魔法。
 
        施法範圍剛好足夠,比詠雯將電網放置係蘭既身前,但係蘭卻視若無睹,徑直穿過,安然無恙咁通過左電網。
 
        「冇可能!」詠雯不可置信咁追逐蘭既身影。
 
        兩人繼續走,蘭已經漸漸拉開距離。
 
        詠雯勉強追趕,到最後,竟然穿過左森林,去到一片小空地上。
 
        人呢?詠雯心諗,細心觀察周圍既環境。
 
        空地中心係一個小湖,月光投射係湖水之上,清澈無瑕。
 
        而空地四周都係矗立既林木,樹葉隨風而發出沙沙聲。
 
        佢好可能已經跑返入森林,但係我又唔知係邊一邊,詠雯心諗。
 
        「可惡。」詠雯抱怨。
 
        而依個時候,隱藏係樹葉搖擺既沙沙聲之下,蘭企左係詠雯背後既一棵大樹上,武器高舉。
 
        蘭從樹上躍起,碎石斬!對下方既詠雯發動攻擊。
 
        武器憑住從上而下既衝力,增強左劈擊既力道,重重咁落係詠雯背後。
 
        詠雯係最後一刻發現,立刻轉身,但係武器早已達陣。
 
        「Critical!」詠雯被蘭擊中,立刻失去超過三分之一既血量,同時受到[重創]效果。
 
        「事到如今,就同你隻烏蠅玩下。」蘭。
 
        詠雯被擊中,身體不自主滾到湖邊,然後借力企返起身,但見蘭已經拎住手上既大鐮刀直衝而來。
 
        十字連斬!
 
        只見蘭手上一柄大鐮刀從上而下揮動之際,詠雯既武器成功捆住鐮刀,令技能失效。
 
        「啊?係長鞭?係商會玩左半年有多,都真係未見識過大小姐用武器既英姿。」
 
        「廢話少講,邊個派你黎既?」
 
        「呵呵,大小姐,你知唔知我個名係咩?」蘭掙脫長鞭既束縛,鐮刀再次往前揮。
 
        詠雯想趁機向後退,卻一直被蘭迎上,唔比詠雯拉開距離。
 
        「唔係蘭咩?」詠雯沿著湖邊後退,專注防守:一時將鐮刀撥開,卸去力道;一時捆住鐮刀,中斷揮擊。
 
        但係對付依種重量有返咁上下既武器,加上一直拉唔開距離既情況下,詠雯處於下風,體力消耗得好快。
 
        蘭冷笑,「傻啦,蘭唔係我個名,只係我既──」
 
        「代號。」蘭狠狠咁將鐮刀揮下,詠雯試圖再用長鞭捆住,但因力氣不足,長鞭被一下扔開。
 
        蘭原本將鐮刀由左上往右下斜揮,將鞭子扔開之後鐮刀勢往左下,蘭利用依點順勢往上連擊。
 
        詠雯無法抵擋,再次被擊飛。
 
        依個時候,寧風既身影憑空出現,係詠雯既墜落處將佢緊緊接住。
 
        「啊,係你,」蘭望一望寧風,再望一望另一邊,「啊,連老侯都黎左,咁差唔多要走。」蘭講,然後雙手既魔印開始轉動。
 
        「蘭,做咩走都唔講聲呀,咁我會好掛住你架喎~」老侯係林木間走出黎。
 
        「呵呵,多謝喇,我真係──」蘭答緊老侯,卻被一魔法打斷。
 
        落雷!
 
        詠雯係寧風既懷中使出依個雷系魔法,轟隆一聲,一道雷電從天而降,落點中心就係蘭企緊既地方。
 
        但係,蘭不慌不忙咁,將左手上既黑光,對住寧風。
 
        然後,原本應該會擊中蘭既雷電,打係蘭手上既魔法陣之後,就好似光線遇到鏡一樣,向寧風既方向折射!
 
        而且,折射後既雷電感覺上比原來既更快、威力更大。
 
        「瞬!」寧風立刻用瞬移閃開,但係由於多帶一個人、又完全身處係落雷既影響範圍,瞬移既施放受到一定延誤,令寧風既右手臂始終係被打中。
 
        二人成功移動至湖既另一邊,寧風感覺到手臂出唔到力,急忙將詠雯放係草地上。
 
        老侯趁依個空隙立刻衝往蘭,但係蘭既右手上已經發出魔法陣。
 
        老侯往蘭揮劍,穿過蘭既身體,但毫無實感。
 
        魔法陣一出現,就代表施法完成,由果一刻起,蘭已經唔係依個地方,只係留低一個殘留數秒既虛影。
 
        三人訝異地望住蘭既殘影,「三位,有緣再會。」蘭。
 
        然後,蘭既身影就消失係空氣中。
 
        「瞬!」寧風出現係蘭消失既地方,由於右手無法使用既關係,冇辦法將詠雯一同帶過黎。
 
        寧風用佢發紅既左眼係度望,老侯見狀先去將詠雯抱過黎,返黎果陣,寧風拎住張紙,而紙上有個圖案。
 
        「依個係咩元素黎?」寧風將紙交比老侯,問佢同詠雯。
 
        「係暗系魔法。」詠雯答,「聖日大陸上,唔應該存在既暗系魔法。」

───────────────────────────
備註:
 
1)私信:從遠方傳來小鳥,能託它將信紙運送給目標,運送時間因兩者距離而增加,運送途中可被任何人擊落,運送目標必須為私信對象。
 
已有 0 人追稿