Ch7.

        某個帳篷裡,詠雯係床上坐直,經過隨行既醫護人員治療之後,詠雯就開始同我地上歷史課。
 
        詠雯望一望我,問:「你...冇問題?」
 
        我輕輕點頭,佢就開始講:「古精靈時代果陣,聖日大陸其實有7種基本元素,分別係:水、火、土、風、雷、光、暗。而每一種元素都有一個獨立既精靈族群,七個精靈族一直維持住世界既平衡。」
 
        首先講聖日大陸,如果Gladys係世界或者地球咁既話,聖日大陸就係類似七大洲其中一洲咁既概念,亦即係話其實Gladys仲有好多依度既人未探索過既地方。
 




        「係古精靈時代末期,當時各個精靈族都醉心於研究一種可以簡化魔法既系統,亦即係基本系魔法既雛型。但當時既暗精靈族,並無係基本系魔法上斟酌。基於佢地對魔法既了解,暗精靈族有一種獨特既研究方法,而亦取得成功。結果好快,短短幾百年間,規模最細既暗精靈族就變左七族中實力最強。」詠雯繼續講,鬍子、老侯,仲有幾個商隊成員坐晒係床附近,聽得津津有味,當然我同雷米都係度。
 
        依度有啲似戰國時代,各國都尋求變法,一旦成功就會兵強糧足,強勢一排咁樣。
 
      「原本七族相安無事果陣,暗精靈因其孤僻既性格已經令六族唔妥佢。去到暗精靈族實力變強之後,就開始強勢反彈,經常想取得七族間既主導權,惹起其他六族不滿,最後六族共同圍剿暗精靈族,將暗精靈族驅逐出聖日大陸,並將大陸上所有暗元素完全消滅。此為有名嘅『絕暗之戰』。」
 
        姐係話,好耐好耐以前,依度係有暗元素,但至從『絕暗』之後,依片大陸就冇左暗元素依樣野。
 
        突然,一股強烈既痛感傳黎,「Si…呀…」我有啲忍唔住痛,輕輕呻吟左一下。
 




        詠雯一路緊講歷史,其實雷米一路就係我旁邊幫我治療緊。我隻右手三度受傷,情況絕對唔輕鬆。
 
        本身第一次,成隻右手手臂比諾黑由手腕鎅到上膊頭。之後第二次,比老侍者既攻擊搞到傷口裂開左,本身都已經係包紮再包紮,點知第三次,蘭既魔法反射都係擊中我右手。
 
        雖然雷米識得治療系魔法,諾黑果次我都係成隻手臂比短劍劃過,經魔法治療後都可以馬上叫做郁動到下,但係都唔係話一下子痊癒,尤其雷米既lv並唔係高,就算恢復返啲debuff同血量,身體都係需要時間康復。
 
        而經過我既受傷再受傷,傷口又再度裂開返,右手宜家連想郁都唔係咁易,加上打中我既係雷系魔法,麻痺既效果令移動難上加難。
 
        但因為事態緊急,我都好想即刻知有關Gladys既野,等治療好再聽就太遲。
 




        詠雯聽到我呻吟,神情擔憂咁望一望我,我示意佢繼續。
 
        「『絕暗』一戰,六族雖然成功,但暗精靈族出奇不意既各種特殊魔法,令六族付出沉重代價。其中,有一招詛咒類既魔法,令精靈族同精靈族之間所生既孩兒極易夭折,就算成功出世都活唔長。精靈族為左繁洐後裔,於是逼於無奈同各種獸族交配,包括龍族、麒麟族等,令依啲族群開始擁有強大既魔法力量。」
 
        咁姐係話其實啲魔獸識用魔法其實唔完全係天生,而係可能佢地n年前既祖先同精靈扑過,真係諗起都…
 
        「同時,佢地培植出一種擁有接近精靈外貌、保留精靈血統,但係唔受詛咒影響既生物,亦即係宜家既人類。」
 
    「會唔會係咁呀?」人類竟然係可以培植出黎!?現代醫學都只係做到冇幾多年,你呃鬼食豆腐呀?我忍唔住問左出聲,然後補充:「連人類都可以培植?精靈有冇咁堅呀?」
 
        詠雯瞄一瞄我,答:「精靈族既魔法能力的確係好強大,依點睇返後世有精靈血統既人類同魔獸既實力就可以得知。但至於係咪真係可以培植到人類,我都唔係好確信,但歷史書係咁寫。」
 
        我心諗,以前既精靈一定係隱瞞左啲乜野,仲有打暗精靈族既理由都未必係我唔妥你咁單純,大概都係果啲想搶你技術甚至捉走啲精靈返去研究果啲fd,先至會搞到咁大件事要「絕暗」。
 
        詠雯繼續講:「當時,由於果啲同他族交配所生既亞精靈族,往往都會被賦予獸族外形,而非精靈族既外貌,亦因此精靈族將繁殖既希望寄望係人類身上。」




 
        我諗當時精靈族個諗法就好似白人如果同白人生仔,就會早死,所以被逼同黑人交配,但係同黑人扑完生既9成都係黑人,而依啲後裔一定比人睇唔起,或者根本唔會有精靈當依啲係精靈族既後裔,所以先要寄望係同精靈外貌接近既人類身上。
 
        「不過,人類雖然擁有精靈族既血統,但並唔似得精靈族天生就可以操控元素,而且智慧相差甚多,壽命亦只得幾十歲。為左令人類有自衛既能力,精靈族將前人研究既簡化魔法再度簡化,姐係宜家既基本系魔法,令人類可以比較容易咁一步步學識使用魔法,並且教佢地一種簡單既象形文字,作為溝通既媒介。至新精靈時代中期,精靈族已經完全滅絕,而人類就開始掘起,係眾多獸族當中脫穎而出。」
 
        「歷史就係依度完喇,大家有冇咩想問?」詠雯。
 
        我諗左一陣佢講既歷史之後,就開口問:「咁但係聖日大陸冇暗元素姐,點解就唔可以有暗系魔法呢?元素同魔法中間有咩關係?」
 
        係詠雯想開口答果陣,雷米突然間講野:「等陣,」雷米望一望四周,再望住我講:「主人你好似…患左元素感染。」

        ……
 
        寧風訓左係床上,雷米幫佢蓋好被,擔憂咁坐係床邊。
 




        詠雯搭一搭佢膊頭,安慰佢:「放心喇,我地商會有專業既治療師,唔會有事。
 
        雷米點一點頭,詠雯行出帳篷。
 
        帳篷外既人員見到詠雯,即刻話:「大小姐,你宜家最需要既係休息…」
 
        詠雯擰頭:「我唔鍾意比人蒙在鼓裡既感覺,而且蘭…」佢諗返起果個女成員既身影,「我一定要搵佢出黎。」
 
        詠雯越過幾個帳篷,行入其中一個帳篷度,成員正係度向老侯同鬍子報告:「失竊既係一條風屬性項鍊,用綠字魔晶製成,大概值幾個銀幣。」
 
      「幾個銀幣既野,點解要不惜一切偷到手…又搵騎士團幫手,連潛伏係我地商會既異族人都出埋黎。」鬍子。
 
        「雯,過黎坐。」老侯見到詠雯入左黎,叫佢埋黎坐低。
 
        「大小姐。」鬍子同成員同佢打招呼。




 
        詠雯坐低左之後,老侯問:「出發前有冇檢查過?附近元素有冇異常?」
 
        鬍子:「有,肯肯定有檢查過,一切正常。」
 
        「唔…咁冇可能呀,應該唔會有神器係入面。但蘭係異族人依啲,都仲有好多可疑既地方,可能要返去同會長商量下先。」到底點解聖日大陸外既人會黎左依度,佢地到底係點樣黎聖日大陸,又點解會盯上一啲唔值錢既項鍊,成件事唔尋常既地方實在太多,老侯一時都諗唔到咩結論。
 
        「咁,方小弟情況點?」既然依邊冇結論,老侯轉變話題。
 
        鬍子插嘴,「元素感染,對普通人就冇乜野,但對魔法師一個唔小心就好麻煩。」
 
        元素感染係聖日大陸上常見既病,病因係一啲身體分辨唔到既元素透過傷口進入身體,造成感染。受感染期間,傷口會較難癒合,身體對元素會比較敏感,比果種元素既魔法打中果陣傷害會增加,但一般人只要定時食藥就可以舒緩病情。對魔法師黎講後果就較為嚴重,處理不慎有可能會打亂身體內元素既排序,影響魔法既威力。理論上黎講,每個人一生只會被同一種元素感染一次。
 
        詠雯內疚咁講:「一日都係我…如果我冇想攻擊蘭…」
 




        「傻啦,根本唔關你事,」老侯輕撫詠雯頭頂:「更何況,元素感染係會痊癒既,差在需要一啲時間姐。我已經通知左分部,我地一到達天臻城就可以幫方小弟開始治療。」
 
        上面提過,元素感染可以靠藥物/藥水舒緩病情,但如果想痊癒的話就需要得到治療師既治療先可以。
 
        「不過真係冇諗到,雖然元素感染係大陸係好常見,但好似大小姐依啲魔法學院學生咁,細細個入讀學院果陣,基本上學院已經預備好各系既免疫藥水,比院生使用,所以會感染既魔法師基本上係寥寥可數,今次都係因為有暗系魔法先至會咁。」鬍子。
 
        老侯見到詠雯根本仲係耿耿於懷,無法專心,於是用一把猥瑣既聲音問佢:「唔好咁喇,你再愁都幫唔到方小弟架喇,不如講下岩岩佢公主抱你果陣係咩感覺?」
 
        「你你你…老侯呀!」詠雯諗返起果個情節,臉頰一紅。
 
        「呵呵,小姐,你有啲咩我未見過先得架,連你出世果陣我都係隔黎睇住架。」老侯如數家珍,「哇,仲記得你細個果陣,成個男仔頭咁,走去恰啲細路,有次仲拎左會長…」
 
        「夠喇夠喇唔準再講!」詠雯指住老侯,喝道。
 
        一班成員包括鬍子都忍唔住笑左出聲,搞到詠雯非常尷尬。
 
        「哼,老侯你好野!仲有你地呀!之後我再慢慢同你地算帳!」詠雯抵受唔住依個氣氛,氣沖沖走出帳篷。
 
        ……
 
        會議結束,幾個成員都出返去,剩返鬍子同老侯。
 
        「係喎,話時話,老侯,」鬍子問:「你記得我同你提過方言想要既野架可,依個人既來歷都應該唔簡單。」
 
        老侯心中一早有數,笑笑口答:「咁你記唔記得佢同你講過啲乜野?」
 
        鬍子問:「邊句先?」
 
        老侯答:「佢話,佢有兩個朋友,一男一女。」
 
        「係呀,有咩問題。咦,等陣,一男一女?」鬍子好似諗到啲乜野。
 
        「係囉,一男一女,男架呢,叫寧風,就好似識得用空間魔法,女架呢,叫雷米,就識火系同光系魔法。」老侯講。
 
        鬍子聽完笑左出黎:「哈哈,老侯真係犀利,我果陣又諗唔到,原來方小弟並唔係方小弟。」
 
        「所以呢,為左入城果陣唔會比守衛檢查到,令大小姐佢起疑,我地都係再三確認身份證明果邊冇問題好啲。」
 
        「係既係既,我即刻再去問。」鬍子講,然後離開左老侯既帳篷。
 
        ……
 
        我攤左係床上面,冇辦法訓得著。
 
        依幾日發生左太多事,太多我唔清楚既事、我好想去了解既事。
 
        但係,我又唔想雷米擔心我,只好扮有休息。
 
        雷米係床邊訓著左,個頭挨左係我大腿上面。
 
        我輕摸佢既頭髮,銀白色既頭髮好柔順,而且發出淡淡芳香。
 
        依個時候,詠雯行左入帳篷。
 
        「咦…」可能係見我仲未訓,詠雯有啲奇怪。
 
        「做咩,以為岩岩我真係訓左?」我細細聲咁講,免得嘈醒雷米。
 
        「嗯…」
 
        「你又未訓既,都就黎天光。」
 
        「發生左啲咁既事,好難訓得著…」
 
        「岩既,謎團仲有好多。」我望住詠雯,佢企左係度,個樣都好迷茫。
 
        我於是再講:「係喎,岩喇,既然你黎左,順便講埋岩岩未答我果啲野。」
 
        「唔?問咩,問喇。」詠雯恢復返少少精神,坐左係床邊既凳上。
 
        「哇你金魚記憶呀?兩個鐘前先問完你咋喎。」
 
        「咩呀我岩岩都聽唔到你想問咩!」
 
        「喂喂細聲啲講野,廢事嘈醒佢。」我將食指放係口唇邊,示意安靜。
 
        「哼,我講事實咋嘛。」佢擰轉頭,冇直視我,細細聲咁講。
 
        「係,係,係我錯。」如果你嘗試同女人爭拗我敢肯定係冇好結果。
 
        「哼,知就好。」見我隔左一陣都冇答佢,佢續問:「咁,你想知啲咩呀?」
 
        「係咪我問咩你都講先?」我調戲佢。
 
        「你…你…」佢塊臉染上左少許嫣紅,成個人突然可愛左好多。「你再係咁我走架喇。」
 
        我笑一笑,問:「岩岩呀,我咪問過元素同魔法之間有咩關係囉。」
 
        「哦,咁呀。」詠雯諗一諗,答:「想學一門魔法呢…」
 
        我望住詠雯,聽住一啲我本來唔需要知既事。
 
        一啲我原本既世界完全用唔著既知識。
 
        詠雯一路講,我就係心入面默默記低。
 
        既然依個世界,仲有好多我唔知既事,我就只可以一步一步咁,將佢逐少逐少變成我認識既事。
 
        一切都係為左,係依個世界生存落去、為左幫寧風完成佢想做既事、為左去果個可能搵得到答案既地方。
 
        為左搵返我既記憶。
 
        為左搵返自己。
 
        我默默咁凝望帳篷外,迎接新一日既到來。
 
        早晨,Gladys。


 第一部,完。
 
已有 0 人追稿