(新手上路)唔好收好人卡就以為自己係好人: 原來這裏有個變態(二)

科學家總是不知悔改，硬是堅持，叫人怎麼接受這種嘔心？

「其實你係咪好鍾意清雪姐？我有好嘢益你喎。」慧秋就是愛做些八八卦卦紅娘之事，也許後來我定很討厭她，不過這次我決定聽一聽先。

「是咁的，每年清雪都會煲一壼湯俾我飲，當係過吓做家庭主婦癮，咁今年我就飲淨少少俾你，等你試吓佢手勢，享受一吓，不過之後你要洗乾淨嗰壼俾返清雪架。」

「你都係想我幫你洗姐，懶鬼！」識了年幾，試問又怎不清楚她為人？

「唉，人類總係慾求不滿，講多樣嘢你知，今個週末，清雪會去賣旗，喺學校周圍架姐，你自己識做啦。」





鈴......鈴......鈴......小息的鐘聲響起，慧秋拍一下我的肩就走過去樓梯下一層回班房，頭也不回。

還不只是個留級生，裝甚麼神氣，呸！

多情的少年總自以為熱血，後果甚麼一早拋諸腦後，真教人無言。

早上五點起身，梳洗過後，擦淨我的白色寶馬牌越野單車，早餐也不吃，湊着天還未亮，身騎白馬，數過一盞又一盞的路燈，南生圍匆匆而過，紅樹林等自然景色算不上甚麼，眼中就只有命運光柱照下來的瀝青路和站在盡頭處等着我的清雪。

踏了兩小時單車，白色T-shirt濕着一處處汗跡，還發出一陣陣不自知的汗臭，然而我就一股傻氣一步一步走上前......





「乜咁啱呀？」

「嗯......」清雪就是微微低着頭，雙眼閃縮。

「你賣旗呀？」

「嗯......」清雪的身體開始慢慢的後移。

我見氣氛尷尬也不好意思久留此地，於是快快入下兩元，自己從清雪手中拿去一支旗便急急離去......





唉，真是拙態畢露！

至於那湯壼，我一口也不敢喝，只重復擦洗三遍，在星期一早上趁清雪行開才偷偷放到她桌上。

還記得那天阿俊知道這事以後是這樣說的

「人哋揸住個旗袋梗係賣旗啦，唔通買餸咩？智障！係喎，咁買完旗之後你仲有冇揾人？」

「有呀，梗係有慰問一下佢啦，你當我傻架咩？」

「你點講？」

「我whatapp 被佢封鎖咗，於是咪SMS佢問佢『賣旗苦耶？』」