一場十年的夢。: 第一封情信

我承認我係個多情嘅人，所以好快我就忘記咗呀倩，甚至有一段時間我忘記咗我嘅生命裡面曾經有呢個人。
因為機緣巧合，我同一個我由中一開始就有好感嘅女仔同桌。
中學時期嘅同枱，造就多幾多戀情嘅開情。
而我對呢個女仔有好感嘅起因，同我後來同佢嘅發展一樣：離奇。
用｢離奇｣嚟形容，對我嚟講好恰當，但可能對好多人嚟講係｢挑！咁咋！｣
我只想要段簡單嘅愛情。
 
話說中一至中二我同呢個女仔幾乎毫無交流，
頂多都係一般嘅發語：唔該、唔該借借、唔該哂……之類。
佢叫鄧橦桐，一個細細粒、皮膚極白、眼大大、有對虎牙嘅女仔。


如果要形容嘅話，係可愛鬼馬型。
可能有人會話：嘩！正喎！
的確佢外表上係好GFABLE，但人類總要重覆犯錯，
外表不代表一切。
 
喺中一嘅某個朝早，我發咗個咁嘅夢：
我係屋企附近路行人路行緊，
突然佢從後面抱住我，然後錫我。
就咁醒左，發完個夢。
而明明，我其實當時係唔多識佢。


 
 
初初同佢同桌，都無乜特別。
但一D好普通嘅話題將我地慢慢拉近。
｢喂！你D中文好似幾得喎，教教我呀，我唔識作文呀～｣
佢擠眉弄眼咁講，個樣好鬼搞笑。
我就求其寫咗個垃圾大綱比佢，叫佢自己試試，點知佢竟然話：
｢又得喎，我都無諗過咁寫喎！掂！｣
自此我地就多左話題：學業上。
｢我D數咁，應該讀理科。｣


｢喂，你中文掂喎，係咪揀文科呀！｣
｢妖！你咁廢架，呢條數都唔識！｣
｢嗱！咪話呀姐唔醒你，你呢度咁計咪快囉豬標！｣
明明我無問佢數，佢就係都要教我，仲要痴到鬼死咁埋。
好快我同佢嘅緋聞就傳到成個班房都係，好快傳埋去教員室。
 
｢CYRIS，你係咪同人拍拖呀，係都唔好咪揚啦，低調少少啦，你叫我點做呀！｣
CYRIS係我洋名，呢句野係我班主任講。
其實我同橦桐都無一齊，只係FD咁解啫。
 
每日小息橦桐都同即刻衝出去，係一支箭咁衝出去。
聞說佢有個細佢一年，低佢兩級嘅男朋友。
喺十零歲呢個階段，好難想像女仔點可以接受一個細過自己嘅男仔。
 
由於同橦桐慢慢熟絡，我同佢嘅朋友亦有幾句傾。


有一個，無啦啦一個叫呀晞嘅女仔走埋嚟同我講：
｢呀持，其實橦桐好似鍾意你喎～｣
吓……又嚟？唔好啦掛。
上次先損手爛腳，我唔想又嚟多次。
但呀晞講嘅野可信程度好多，因為佢同橦桐好FD。
 
如果可以，我都唔介意同佢拍拖，
畢竟佢外表唔錯，似乎性格都幾好。
 
係仲未有WTSAPP嘅年代
係仲會寫信交流嘅年代，
我同佢耐唔耐都會寫下信，襯對方行開咗就塞封信入櫃桶。
終於係十一月尾，我膽粗粗同信示愛。

無錯，寫情信。