我們怎麼了？: 39

「簡仁…？係喎，佢今日唔嚟嘅？」謝宣諾故作無事的問 

祖立：「佢唔得閒，佢接手咗老豆生意，宜家係大生意人。」 

建倫：「係呀，好難約呀佢，呢幾年就算有時係約好咗佢都會臨時甩底，有時又食飯途中收到電話就走咗去。」 

我：「佢接收哂生意？佢儍下儍下點做生意？佢有三兄弟架？」 

肥文：「我地都唔係好清楚，十幾年喇，仲有幾多老死可以成日見，唔使搵食咩諾仔。」 





祖立：「建倫你都有約過簡仁？我有時約佢佢都係咁，好似好忙，問佢佢又神神秘秘話只係有事忙。」 

「咁……咁多年嚟，佢有冇同你地講起我嘅事？」謝宣諾問，因為他很想找出簡仁那個惡言訊息的原因。 

奇怪的事此時出現，在這個歡愉的氣氛中，因為謝宣諾的這一個問題，而變得突然沉寂起來。他等了兩秒也沒有人回答他，大家只是傻眼看著儍眼的不發聲。正確點說，應該是他們在等其中一個人願意代表大家來發聲。 

這個人，往往都是群體中的領袖；所以，建倫來解話了。 

建倫：「有……但係………」 





「但係乜嘢？」謝宣諾看見建倫的反應，再把那惡言短訊拼湊在一起，知道真的內有別情，所以立即追問。 

「我都唔知點講……」建倫不知從何說起。 

「你地睇睇。」謝宣諾拿出自己的手提電話，把簡仁那個訊息呈現在各人面前。 

大家看了，面上有點驚訝，但並不奇怪。 

「到底發生乜嘢事？」謝宣諾再一次問。 





「講俾諾仔知啦。」祖立說 

「老公，你抱住阿女，我去一去廁所。」秋凝此時突然出來，轉身就往洗手間去。 

「喂，你地傾住先，我都去一去廁所。」祖立也跟著站起來，抱著端麗就沿著秋凝的那條路跟去。

「講啦阿哥，祖立都特登俾機會你。」建偉說 

「好喇好喇…唉…當年，諾仔你走咗之後，最大反應果個，就係簡仁。」建倫說 

謝宣諾：「點解？」 

建倫：「佢話你想搶走秋凝，話你連兄弟女人都…搞，我仲記得你唔見咗一星期果晚，我地成班出旺角商量點幫你媽咪搵你，佢仲係好勞氣咁鬧你。」 

「我明白，就算係我我都可能會咁。但……因為呢個原因，佢嬲我憎我到宜家？」謝宣諾不解，接著問。 





建偉：「呢樣我都覺得奇怪，起初我都覺得佢嬲你呢樣嘢冇錯，但時間一路過，我發覺佢對你嘅怨念好似有增無減。」 

祖正：「其實我阿哥阿嫂都已經唔介意，阿哥仲私下同簡仁傾過，話諾仔你都唔見咗咁耐，生死未卜，做乜仲要咁介懷？」 

謝宣諾：「咁簡仁點答？」 

祖正：「佢一句「你唔知咁多！」就冇再理阿哥。」 

肥文：「咁都有，當時人都冇嘢佢仲嬲乜，都咁多年。」 

建偉：「咁又係，半年前我地成班一齊食飯，唔知邊個提起諾仔，簡仁就好似好唔高興咁。」 

謝宣諾：「我明喇，我會搵佢問清楚。」 





建倫：「你搵佢同我講，我同你一齊去。」 

「唔使啦，我自己去。」謝宣諾拍拍建倫說 

建倫：「唔係呀，我陪你啦，你唔明。」 

「好…好。」謝宣諾唯唯諾諾的說 

祖立和秋凝回來後，他們所有人再沒有說這個話題，轉為閒話家常，每個人都說了自己的近況，快快樂樂的吃完這頓重逢飯局。晚飯之後，所有人都站在酒家門外，還是不肯離開。每個人都逐一上前跟謝宣諾道別，個別的還會耳語幾句。 

秋凝抱著端麗走到謝宣諾面前，將端麗交到謝宣諾的手上：「喂，謝宣諾，你仲未抱過我個女喎，端麗，叫諾叔叔啦。」 

「妳叫端麗呀？咁好聽唔似爸爸改喎，哈哈。」謝宣諾逗樂著端麗說 

端麗：「諾叔叔。」 





「乖，妳好乖，讀書未呀？」謝宣諾近距離看著祖立和秋凝的這個可人兒，心裡，泛起不少的感慨。 

端麗：「讀聖一堂幼稚園，K2班。」 

「咁叻女。」謝宣諾邊看著端麗，邊留意站在秋凝身後的祖立有什麼反應。祖立只係微笑著，一直看著他們三個在交談。 

「好喇，叔叔要走，交返俾妳媽咪先。」謝宣諾將端麗交回秋凝手上再說：「佢好似妳，靚女。」 

秋凝：「我變咗中女啦，靚乜。係喎你呢？宜家有冇女朋友？」 

「冇，肥咗咁多邊有人要。」謝宣諾搖搖頭打趣說。 

秋凝：「如果冇嘅，咪喺香港搵返個囉，得閒搵多啲舊朋友，話唔定有驚喜呢？」 





「哈哈，睇緣份啦。」謝宣諾尷尬的說 

「哈哈，哈囉。」突然，端麗指著謝宣諾的身邊大叫。 

「咦？」建倫等人此時也看著謝宣諾的身後流露出驚訝的反應。 

祖立突然走到謝宣諾的身旁，表情趣怪的說：「我老婆私人幫你，當係賀你返香港嘅禮物。不過呢場中外大戰，睇你手瓜有幾硬喇。」 

謝宣諾有如丈八金剛摸不著頭腦，正想轉身之際，端麗在他耳邊的一句說話差點將其心臟嚇得跳出來。 

「媽咪，詠莉姨姨呀。」 

謝宣諾立刻轉身，大約十米之外，有一個非常漂亮的熟悉身影向他走過來，那是他十二年前的女朋友，祈詠莉。 

但她的右手，拖著一個身高六呎，模特兒身型，貌似畢彼特的外國男子。