【大學故】《上到大學，原來真係會咩都唔同曬》: 十八
(十八)
*呀朗視覺
呀賢望住小熙wtsapp上面既對話，個樣慢慢變嬲。
「屌你老未！」下一秒呀賢一下踢落啲櫈度，嘉浩見狀即刻上前拉住佢。
「冷靜啲啦你！」
「點冷靜啊，你自己睇下條八婆點樣分化小熙先啦！」佢一手將部電話碇俾嘉浩
嘉浩望住啲對話，然後條眉皺得越黎越犀利。「點解呢個yuki要咁樣同小熙講啊？」佢抬起頭問程雪琪
「佢鍾意陳俊賢啊嘛，上次俾我踢爆左佢想姣呀賢就係度做埋曬啲小動作」雪琪一臉不爽咁講
「仲有啊，ocamp個班友又係on9，講撚左幾十萬次我同呀賢係fd唔係情侶，成班好似聾耳柒咁唔撚聽，屌」雪琪一路講又開始燥
「嗯... 嘉浩...？」
「小熙？」聽到背住病床既嘉浩身後傳黎既聲音，我地四個即刻回神將焦點放左係小熙身上。
「小熙！」呀賢第一個急不及待行埋去
「... 小熙佢真係好鍾意你，佢完全唔想同你分手」我拉住佢「佢依家係度都走唔到住，依家最緊要係要同佢解釋番」
我見到呀賢望住我呆左一下，然後好肯定咁點左下頭
只要妳開心，就已經足夠
「陳俊賢... 我唔想見到你...」小熙將頭另埋一邊
「妳聽我解釋下啦，好無？」我好溫柔咁講
「我... 唔想聽...」
「我同雪琪真係無野，妳唔好聽條yuki講好無啊？」呀賢攬實小熙「個yuki之前ocamp個陣係雪琪面前老屈我搞佢啊」
我見小熙個樣呆左一呆「yuki佢... 唔似係啲咁既人，佢已經話曬你地啲野我知啦！」小熙既眼角又開始湧出淚水
「點解... 你信佢都唔信我地啊？李穎熙，我同你識左幾耐，你同佢識左幾耐啊？就算你唔信我呢個好朋友，你都應該信呀賢啊！佢係你男朋友黎架！點解你咁蠢蠢到連人地昆緊你想你同呀賢分手你都唔知呀？！」企係嘉浩隔離既雪琪突然爆發
「係，係我錯，當初啲人誤會我地個陣我應該大大聲屌鳩佢地，當初條yuki搞呀賢個陣我應該打鳩佢，當初我唔應該叫陳俊賢上黎我hall幫佢整份三週年禮物俾你」雪琪一路講把聲越黎越顫抖
「你可以嬲我憎我同我絕交，但呀賢係你男朋友，你地三年既感情，你地經歷過既一切，如果因為嗰個yuki而搞到到就咁玩完，一啲都唔值得啊！」
可能雪琪既聲音太大，引黎外面走廊經過既人既目光。佢講完之後，就另轉身然後跑左出去。
雖然我唔識雪琪，但佢岩岩激動既反應同埋隨住聲線而變紅既眼眶話俾我知佢真係好心痛小熙同呀賢搞成咁。
「... 小熙，呀賢同我咁多年兄弟，佢份人係點我最清楚，條死仔要專一個陣仲專一過我。佢對妳係點... 妳無理由唔知架」嘉浩對住小熙講，同時俾番部電話小熙。
我見到小熙一路喊一路望住床尾
「... 係啊，你男朋友對妳咁好，妳唔好意氣用事啦。」
呢句... 係我講既。
我對妳... 唔好咩？
不過... 幸福係唔應該用搶。
小熙望住電話同呀賢既合照wallpaper，再慢慢撳入wtsapp yuki個欄，然後撳左撥出。
「yuki啊... 我係急症室... 我好幸苦... 你可唔可以過黎啊... 我... 搵唔到人陪我」
「藍嘉浩... 幫我call雪琪番黎...」小熙收左線之後，對住嘉浩講
嘉浩仲未反應得黎，雪琪已經係門口行番入黎
「我又點捨得真係走左去啊」
*呀賢視覺
「吱吱～」無幾耐之後，小熙電話響起
「yuki？你到啦？」
我下意識望一望雪琪，而雪琪個樣明顯想即刻打人
「我係急症病房啊... 」小熙岩岩講完，就見到yuki係門口行左入黎
yuki一見到全村人等緊佢，即刻成個窒曬機。唔難想像佢依家既心情係點。
嬲爆爆既雪琪首先想行前去yuki度，但俾身旁既嘉浩拉住左。
「點解啊」小熙首先打破僵局，但無人出聲
「我問你點解要咁做啊！」小熙開始提高聲浪。係病房裡面成個氣氛都令人好唔舒服
「佢兩個... 唔係一齊左咩」yuki顯得有啲心虛咁講，同時仲要死頂
「阿yuki姐」雪琪忍唔住話，跟住佢拉左嘉浩一下「你要玩啊嘛，好啊。依家我男朋友成個企左係度，你有膽離間啊賢佢地，唔爭在依家離間埋我地啊！」
「我... 」yuki個樣真係淆曬
「講啦，我同呀賢唔否認啊嘛，我同呀賢係度嘴啊嘛，你唔係『親眼』見到架咩？」雪琪好激動咁講，旁邊既嘉浩一路捉住佢。
「對唔住啊，我... 我真係唔知架，我真係以為你地係情侶黎架」yuki喊住咁講「係我衰，未搞清楚就同小熙講，我知錯架啦」
八婆，妳真係好撚假啊！
「你扮夠未啊八婆！」我都忍唔住爆計「你唔好以為你咁樣就可以分化到我地啦，我同佢行左三年啦，雪琪同佢fd左三年呀！你以為自己乜料啊？」我一邊行前一邊對住yuki講「妳以後同我醒醒定定啊」
「... 對唔住」yuki細細聲咁講
企係隔離既雪琪呢個時候諗住一巴摑落yuki度，但嘉浩一手捉住左佢「冷靜啲，呢度醫院黎架」
雪琪好不爽咁啤住yuki。
「妳都係走啦」呢個時候企係我身後既呀朗出聲「唔好再做埋啲仆街野啦」
yuki咬牙切齒咁轉身離開左病房。
「一天都光曬啦，係個yuki從中搞咁多野！」雪琪轉身對住我地講
「對唔住啊雪琪」病床上面既小熙態度終於軟化落黎
「傻啦，俾著我係你啊可能藍嘉浩都已經玩完啦。」
呢個時候我見到嘉浩窒左一窒。
「總之依家無事就得啦」雪琪笑住咁行番埋床邊「以後唔好再亂諗啦知唔知啊」
「嗯」
「喂我地出去先啦，俾啲空間陳俊賢同小熙啦」嘉浩笑左一笑，然後望左呀朗一眼
「係囉，咁我地出去先」呀朗都笑左一笑
嘉浩就同雪琪呀朗行左出去
「sorry啊bb，我以後唔會再俾任何機會妳誤會架啦」我攬實小熙「妳啊，以後幾忙都好都要抽時間俾我啊知唔知」
諗起前排令小熙有誤會既個個好密既schedule，我認我係有私心
「知啦，我都有唔岩既，又唔聽你地解釋，仲要唔信你同雪琪...」小熙越講越細聲「我以後唔會架啦，你地係我李穎熙最重要既人。」
我緊緊咁攬實小熙。
以後，唔可以再話分開。
*雪琪視覺
「呼！終於都無事啦」我一行出急症室就即刻鬆左一口氣「真係唔該曬你啊呀朗」
「唔洗客氣」佢笑左一笑「呢排上親堂都見到小熙無曬心情咁，作為朋友既見到都會唔開心既。」
「總之唔該曬啦，仲要咁夜都送小熙黎... 」我望一望部電話，原來已經四點。同時我見到原來我有三個未接來電
「弊啦！原來小熙呀哥打過過黎！」我呆左一呆，然後即刻打番俾佢呀哥
「唔洗啦，我岩岩叫我個女仔fd幫手同左小熙屋企人講啦」呀朗話
我用疑惑既眼神示意我唔明
「岩岩小熙話佢一定要番屋企，咁我醒起佢同過我講佢屋企人好嚴，而且好信妳。咁我咪叫左個住我隔離樓既中學同學過黎陪我送小熙去醫院，途中佢呀哥真係打俾小熙，我個fd就扮係妳話小熙唔舒服係妳屋企訓左。」呀朗同我地解釋
哪一刻我好興幸岩岩聽唔到小熙呀哥既電話，如果唔係可能穿左煲了。
「咁我都番去先啦，我聽日番八半」
我望住呀朗，然後點左下頭「唔該曬你啊」
呀朗走左之後，我同嘉浩就離開醫院，行左出一個連接住醫院好似公園既地方。
一出到去嘉浩即刻攬住我。
「嗯？」我俾佢呢個突如其來既舉動嚇左一嚇，然後先攬番住佢。
「我好掛住妳」佢講完之後，就將我攬得更實。
雖然依家凌晨，呢度雖然無人，但我都係好唔自然。
「喂... 做咩呀你」雖然嘉浩平時係街都會不時攬下我鍚下我，但係呢排我真係覺得佢好唔妥。
啲人話，一個男人心虛個陣就會對你特別好，希望可以彌補自己既過錯，令自己好過啲。
諗到呢度，我個心驚左一驚。
藍嘉浩，你唔係做左啲咩對我唔住既事啊？
「雪琪啊，唔好離開我」佢係我耳邊講。
「你做咩呀，呢排咁怪既」我有少少抗拒佢個擁抱「我點會離開你喎」但嘉浩無放開，反而攬得更加實，我直頭郁唔到。
「應承我，得唔得」
我點左下頭，嘉浩就一下鍚左落黎。
「嗯...」
嘉浩一路鍚我，隻手開始唔安分咁係我身上遊走。佢一手攬住我，一手伸入我件衫係咁亂摸。
「喂... 呢度醫院黎架，番去先啦」我輕輕推開佢
「雪琪，我真係好愛妳」佢講完，又再次攬實我「我唔會俾妳走架」佢好溫柔咁講
藍嘉浩，我咁愛你，點會離開你...
只係... 我怕最終離開個個會係你。
*呀賢視覺
「喂你聽日得唔得閒啊」我打左俾嘉浩。
今日係星期六，前兩日小熙既肺炎已經好番出左院。醫生話小熙唔可以再咁操勞，要多啲休息唔好咁搏。
「聽日得啊，做咩啊掛住我？」嘉浩懶認真咁問我。
「死開啦」我頂佢唔順「小熙想約埋你地一齊出黎玩啊，佢話想好似中學個陣四條友低低能能咁玩番日喎」
自從開左學之後，已經好耐無好似中學咁無憂無慮咁去玩去hea啦。
成日聽人講，入到U就唔洗讀可以日日走堂日日玩，不知幾輕鬆。但我話俾你知，真係唔好信呢班粉腸，除非你係天才，又或者你唔打算畢業，如果唔係我勸你都係唔好hea得太犀利。
「我ok啊」嘉浩話「雪琪依家上緊黎我度，等陣我問下佢」
「小熙神早問左雪琪啦，等你咩」
「聽日見啦死仔」嘉浩講完呢句，就收左線
約完藍嘉浩，我就沖涼洗頭準備出去。
之前三週年搞成咁，我同小熙都無好好咁慶祝到。今日我約左小熙，諗住補祝番。
我望住枱頭雪琪幫我整個份禮物，然後我再將一封我寫左成千幾字仲長過論文既信塞埋入個袋入面。
我art唔好，但係我願意花時間花心機係妳身上。
一點半，我係朗豪坊個地鐵站出口等緊小熙，離遠見到佢一路撳緊電話一路行緊埋黎。
我向前行，一野攬住佢。
「呀！」一路無望前面既小熙俾我呢個突如其來既舉動嚇左一嚇「嚇死我咩你」佢拍左我一下
「嘩妳係咪約親人出街都咁低警覺性架」我一手搭住佢膊頭「如果岩岩攬妳個個唔係我咪蝕撚曬」我扮嬲
「點會呀」佢見到我扮嬲個樣即刻笑左一笑
「咩唔會啊！我女朋友咁可愛！」
「我啲腦電波可以感應到，如果唔係你既話呢，會自動彈開」佢笑住咁講
「腦電波都出埋黎咁勁？」
「緊係啦，我男朋友咁charm，行係附近都會刺激到啲磁場」
「妳真係好白痴」
「咩呀，你無份白痴既」佢批我肘
「不過我鍾意」我係電梯位攬住佢
我寧願好似依家咁白白痴痴，都唔想有咁多野煩。
我唔會再俾妳有任何機會去誤會。
我同小熙係朗豪坊行左一轉，就諗住去食左野先。呢個時候我見到yuki，同埋佢隔離一個高佢一個頭既男仔。
個男仔... 好熟面口。