《契爺》

謎底︰

一開始阿明就已經知道錯
仲揸住耳仔跪左響地下度足足一日一夜
原因係因為太驚 驚契爺會殺左佢
「你而家知道錯未呀?」呢句出現
代表之前阿明同契爺仲有其他對話



所謂「事件經過」 其實係阿明跪左響地認錯之後既回想
其實個故事到尾阿明都冇真真正正100%確定
全部都只係阿明根據「事件經過」推敲出黎
不過上面講到既「其他對話」
必定係可以令阿明響某程度上確認到佢所想既係岩既資訊

根據「事件經過」 阿明一步一步推敲出…
契爺當日係將自己父母「被失蹤」
所有「保護右手」「飲牛奶」「到廿一歲」「字謎」
一切一切都係有背後既原因



而阿明最後係因為同朋友玩完「拼字遊戲」而有靈感
返到契爺書房之後 再睇返個字謎係將…
「艮木東合或異麥巴哈止人弓」諗成…
「眼相陳郃國冀麵把嗱趾促躬」
意思係咩 不如由契爺自己講啦

契爺說︰

明仔佢估岩晒 冇錯 我就係將佢父母「被失蹤」既人


無他既 佢父母外表都好好睇 而且我係個完美主義者
我想將人世間最靚既野砌埋一切 變成一個最完美既人

不過好唔好彩 當年我唔小心整壞左明仔阿爸隻右手
但係又好彩 我發現佢地有個仔
個仔無論形格同外表都好似佢爸爸細個果陣
所以為左呢個最完美既作品 我決定養大佢
因為我要佢隻右手 所以我無時無刻都好照顧佢右手
至於要佢養成飲奶訓既習慣 原因係方便我落安眠藥
有時我搵到「素材」返黎整「完美作品」果陣
我唔想俾明仔知 所以要先整到佢訓到林一林

我頭先都講過啦 我唔想俾明仔知 所以我個「工場」
即係書房 我每次出門都會鎖到實一實
仲會嚴正警告明仔唔好入去 否則後果自負



響佢十五歲生日果日 我咁岩睇中左個目標
所以我失左約 但係估唔到既係
我返到屋企諗住「製作」果陣 發現「工場」被爆開左
我好嬲 於是乎準備定等明仔返黎…

「你返黎喇?」
「Eee…eee…」
「我叫過你幾多次唔好入呢個房呀?」
「我…我…我…」
「驚咩姐?你唔係好叻架咩?發現左D咩呀?」
「冇…冇…冇…」
「我D記錄你睇得明咩?」
「唔…唔…唔明…」
「即係明啦!咁…你想唔想睇下我個櫃有咩呀?」


「唔…唔想。」
「咁…你而家知道錯未呀?」
「我…我知道喇…唔敢…我唔敢喇…我以後都唔敢喇。」
「咁呀…你就跪響度反醒下啦。」
「…」
「丫!我講多一次!我講既野你要聽!唔係,後!果!自!負!」

明仔驚到咁樣都好合理 因為我個「作品」就放響櫃入面個夾萬度
我個「作品」係點樣?哈哈哈 好靚嫁囉!
順便提一提丫 明仔佢唔敢反抗我都好簡單直接
因為我係欖球運動員 我隻手瓜仲粗過佢大脾 佢夠膽反抗咩?
至於大家都想知既「字謎」 其實係我既一個記錄黎
我成日都會覺得我「作品」有野未完美
所以只要我搵到好既「素材」 我就會用黎替代舊既
呢個就係點解我成日打交叉又打圈既原因


圈既意思係呢次要呢個目標 交叉意思係舊既果個唔岩用
「艮木東合或異麥巴哈止人弓」既意思就係
冇左眼既「眼」冇右眼既「相」
冇左耳既「陳」冇右耳既「郃」
冇口既「國」 冇鼻既「冀」 因為我覺得個「北」似鼻形
冇面既「麵」 冇左手既「把」
冇右手既「嗱」 冇左腳既「趾」
冇右腳既「促」 冇身既「躬」
睇到呢度 我諗你地都明點解 個哈字特別乾淨啦
因為我一早就等緊明仔隻手
「眼相陳郃國冀麵把嗱趾促躬」
(完)