《台灣個表妹嚟咗我屋企住》【完】: (三十一)咩感覺

「喂，星爺，你估我哋會唔會永遠都咁friend呢？」

「阿星，我好驚你有一日會唔要我⋯⋯」

「星仔，記得第日養阿爸呀！靠你大佬就死得㗎喇。」

有好多人同往事深深烙印咗喺我腦海裏，佢哋曾經講過嘅一言一語都喺我嘅腦袋入面，代表著開心嘅又有，傷害嘅我都有。

呢一切⋯⋯





「並唔係唔願意忘記，而係忘記唔到。」

呢句說話係我阿哥臨走前同我講嘅最後一句說話，佢毅然決定離開呢個屋企最大原因可能係因為好憎我，好憎我喺嗰陣時破壞咗佢嘅幸福。

話說兩年前，阿哥有一個女朋友，而佢就成日都帶女朋友返嚟屋企過夜所以我嗰個所謂嘅“大嫂”就逐漸成為屋企嘅一份子，經常都會住喺度。

但係有一日，畀我咁啱見到阿哥嘅女朋友喺條街到拖住另一個男仔嘅手，所以我就將呢件事話畀當時帶住綠帽依然懵然不知嘅阿哥。

結果佢知道咗之後就立即同佢女朋友分手，然後變得自暴自棄，仲變成一個廢青。





喺嗰陣時我都未知道原來一句說話對人嘅影響係可以好大。

連我自己都分唔清楚，講個真相畀阿哥知道，到底係善意定係惡意？

或者當時我唔應該將嗰件事話畀阿哥聽，或者當時我應該將呢個秘密收埋。

其實係咪我害咗佢呢？明明我係幫緊佢⋯⋯

「阿哥，你振作啲啦！忘記咗嗰條女就得㗎喇！」





「我⋯⋯」當時嘅阿哥一面無助咁樣講。

「並唔係唔願意忘記，而係忘記唔到。」

當時我唔明白阿哥係有咩感覺⋯⋯

但後來嘅我先至明白呢句說話嘅含意，原來有啲事情要親身經歷過先可以感受得到箇中嘅滋味。

到咗第二日，阿哥就粒聲唔出離開咗屋企，只係喺枱面度寫咗一張紙仔簡單講咗句“我去咗work hoilday”就連人影都唔見埋。

而佢空置咗嘅嗰間房，依家用緊嗰個就瞓咗喺我隔離⋯⋯

望落瞓得好甜⋯⋯

睡姿就改變咗，佢用雙手攬住我瞓，好似當我一棵樹咁，而佢自己就係一隻肥嘟嘟嘅樹熊。





佢流嘅口水，仲整濕咗我張床。

頂！證明靚女都可以瞓得好樣衰。

天光了，房門仍然打開住，呢一刻我先驚一陣如果畀阿爸睇到小南攬住我瞓，到時就真係水洗都唔清。

冇事嘅！

我又冇對小南做出任何不軌嘅行為，只係佢無啦啦衝咗入嚟啫。

嗯！一定係咁。

但係依家點收科好呢？又唔可以畀阿爸知，我又唔可以早醒過小南，而等到佢自然醒，阿爸都起咗身喇。





諗深一層，小南應該知道自己有夢遊症⋯⋯

一定要佢醒先！

於是我就借住轉身嘅時候輕輕咁推咗佢一下。

然後合埋自己雙眼，扮哂瞓緊覺咁。

跟住就聽到小南移動嘅聲音⋯⋯睇嚟佢一瞓醒發現自己因為夢遊而入咗嚟，我估佢應該會好覺得驚訝，但係我喺呢一刻因為合埋咗眼所以咩都睇唔到。

慢慢閂門嘅聲音⋯⋯

令我可以肯定到小南已經走咗。

諗返起尋晚⋯⋯我輕輕咁拍一拍自己嘅額頭。





我做咗啲咩嚟？點解尋晚唔叫醒表妹呢？

我好似有啲鍾意咗佢⋯⋯

嗰種感覺係依賴，定係好感？

我都唔清楚⋯⋯