《台灣個表妹嚟咗我屋企住》【完】: (三十二)燒嘢食

應承咗軒少今日帶埋表妹去佢屋企度燒嘢食，可能因為尋晚嘅事，小南由今朝開始就已經怕怕醜醜咁對住我，喺屋企嘅時候係咁，去軒少屋企嘅途中都係咁。

同佢講唔夠兩句嘢，佢就已經閃閃縮縮，紅都面埋。

搞得到我好似成個變態佬咁⋯⋯

雖然又真係幾似⋯⋯

冇幾遠嘅路程，我哋到達咗眼前一幢三層樓高嘅豪宅。





「喂，到啦小南。」我話。

「哦⋯」小南佢目光呆滯，心中似乎有好多疑問。

「喂！」

「⋯⋯」

「喂！小南。」





「吓⋯⋯做咩事？」佢睇落仲係呆下呆下。

「你今日做咩呀？成日都神不守舍嘅？」我問。

「咁⋯咁嘅，我想問表哥你知唔知尋晚⋯嘅嘢？」小南想查證佢心中嘅答案。

「尋晚發生咩事？」我扮到咩都唔知咁。

「哦⋯」聽到我咁問返佢，佢鬆咗一口氣放下咗心頭大石。「冇呀，我想問下你尋晚啲餸好唔好食啫。」





「梗係好食啦。」我笑住咁答。「快啲入去喇，我班朋友等緊啦。」

「嗯！好呀。」小南終於都笑返。

如果小南知道咗我呃緊佢會點呢？因為人每做一件事或者講一句說話都唔會知道個後果，所以有時都寧願講一啲自己覺得“善意”嘅大話去避重就輕。

跟住我哋行緊大門，見到有個對講機喺度，要通知佢哋先有人開門。

豪宅不愧為豪宅！

因為我已經唔係第一次呢度，所以都好熟悉呢個地方⋯⋯

我靠近對講機然後話：「唔該，我係阿軒嘅朋友，唔該開門呀。」

好快就有個幾廿歲嘅阿嬸過咗嚟開門，一睇就知佢係工人，可能我以前嚟過，所以個阿嬸一眼就認得出我。





「咦，係你呀？嚟燒嘢食呀？入嚟喇。」

「嗯，唔該哂。」我微笑住話。

「唔⋯該。」小南跟住我話。

緊貼喺我背後嘅小南又變得好怕醜咁，然後匿喺我背脊行入去軒少屋企。

呢個傻傻地嘅表妹又搞乜⋯⋯

步入大堂經過客廳，所望見嘅景像，如果要形容嘅話就只有四個字—冠冕堂皇。而見識少嘅小南見到咁華麗嘅地方又忍唔住O曬嘴。

「嘩⋯⋯間屋好大呀。」





我哋行到去花園，就見到有一大班人已經喺度，當中有軒少同阿yo，仲有好多我以前嘅中學同學⋯⋯

「喂！星爺帶埋條女嚟喎！」帶頭起哄嘅係肥冼，一個鍾意講人是非嘅死肥仔。

「你條毒撚咁都有女？」屌我嘅係豪哥，正宗仆街一個。

「叻仔喎，終於有女。」以前嘅女班長阿雯講。

「有女喎星爺！」其他人都一齊跟住起哄。

喺我身後嘅小南好大力咁樣拉實我件衫，死啦⋯畀人哋誤會咗我哋添。

我立即急忙澄清：「唔⋯唔係呀，佢係我表妹嚟咋。」

但好似冇人相信⋯⋯





不過都冇所謂啦，我帶住小南去到軒少嗰邊坐低。

「估唔到你真係有女喎。」連軒少呢個死黨都要抽下我水。

「咪玩啦軒爺。」

「又話係豬排，唔靚嘅？」

「吓⋯⋯差唔多啦⋯⋯」

聽到軒少咁講小南都唔知好嬲定好笑，但只係見佢臉上嘅紅暈越嚟越紅，好似覺得好尷尬咁樣⋯咁又係嘅，呢度嘅人對佢嚟講咁陌生。

於是我逐一向佢介紹⋯⋯





「嗱！小南，依個把口咁臭嘅就係軒少啦，就係佢請我哋嚟燒嘢食㗎喇。」

「頂你！我把口不知幾香，你把口就臭！」軒少反擊我咁講。

「嗱！仲有嗰個肥婆就係阿yo啦。」

阿yo聽到我咁形容佢，就行過嚟我嘅身後，然後一個重拳打落我個頭度。

「屌呀⋯」痛到我連啲鼻涕都飛哂出嚟。

「你頭先講乜嘢話？」阿yo身上散發住一種恐怖嘅氣息。

「我話靚女！靚女呀！」我馬上跪地求饒。

「咁就差唔多，放過你啦。」

所以幾時都話女人係永遠都惹唔過，尤其係身型佔優嘅大肥婆。

得罪肥婆，必遭折磨。

我仲同小南介紹埋MK男班長、肥冼、女班長、仆街豪、班花、死基佬⋯⋯一班我嘅中學同學。

如果唔計埋嗰一個人，今日應該全班同學都嚟齊哂。

咁耐冇見，同佢哋吹水真係多過燒嘢食，講返起以前中學嘅生活，真係充滿好多回憶，好多事一講起就捧腹大笑，例如點樣整蠱阿sir啦，邊個同學上堂賴屎，仲有邊個上堂搞基。

對我嚟講，嗰陣返學校並唔係為咗讀書，而係為咗認識呢班朋友，雖然同佢哋稱唔上死黨，唔會個個都深交，但係佢哋每一個人都已經成為咗我中學嘅一份回憶，永世難忘。

終於，可以再次聚首一堂。