《台灣個表妹嚟咗我屋企住》【完】: (四十八)FF得太多

「喂呀！做咩咁大聲嚇人喎！」

小南聽到我嘅震撼性嘅聲音，都大吃一驚，退後咗幾步。

「你⋯你⋯你想點呀？」我問。

「我想⋯」小南奸笑一下，然後又行前幾步，將佢身後嘅嘢慢慢咁拎出嚟。「我想去呢個地方呀！」

「吓⋯」





「吓咩呀？你睇下先啦，望住我做咩啫？」

「咦⋯」

睇嚟我嘅FF病又發作啦。

見到小南手上揸住嘅係佢部電話，而唔係一把菜刀，眼見電話上嘅畫面係一個商場，一個有好多小食鋪頭嘅商場。

「我想去呢個地方呀！個討論區話呢個地方有好多嘢食㗎！表哥你快啲帶我去啦！」





自從嗰次教咗小南上討論區之後，就順便教埋佢用部電話上網，只係估唔到佢咁快就上手。

「呢度係邊度嚟㗎？」我將佢部電話拎過嚟一睇。「哦⋯⋯」

而根據我腦海嘅記憶，一眼就睇得出呢個商場就係葵涌廣場，各方美食雲集之地。

竟然畀饞食嘅小南搵到如此聖地⋯⋯

「難唔難去㗎呢度？討論區啲人話好多好多嘢食㗎喎，係咪真㗎？我好想好想去呀！」小南好興奮咁話。





「你表哥我梗係識去啦，去食嘢㗎喎，你咁食法驚唔驚肥呀？」望住身材苗條嘅表妹，我又產生咗個疑問。

點解小南好似食極都唔肥咁嘅⋯⋯

「我不嬲都食好多嘢㗎喇！唔得咩？」小南話。

「得⋯食肥啲可愛啲。」我笑住咁話。

「哼！我先唔會似你細個咁肥呀！」

「你仲記得嘅⋯⋯」

「點會唔記得呀？大肥仔！」

咁樣畀小南串一串，我先發覺自己細個比起依家嘅表妹更加饞食。遙想起細個嗰陣嘅我，長期被姑媽同埋屋企人嘅餵食攻擊，變成一個無肉不歡，一日幾餐嘅大肥仔，甚至直到小學都係咁鍾意食嘢，只係直至中學嘅時候，屋企再冇住家飯食，加上有做開運動，先至慢慢瘦落嚟。





講到鍾意食嘢，依家嘅小南確實係幾有我童年嘅影子。

「我依家都唔係肥仔啦⋯⋯」我將部電話交返畀小南。

「喂，咁你係咪帶我去㗎？」小南問。

「當然啦！表妹你叫到，我實帶你去嘅。」

「咁就行啦！」

小南迫不急待咁拉住我隻手，想拉我起身。

「嗯嗯⋯但去之前，我想帶你一個地方。」我話。





「咩⋯地方呀？」

忽然好想帶表妹去一去嗰個地方，原本頭先都諗住帶佢去㗎喇，點知佢依家先起身，又要畀貴啲錢了。

又係一個回憶之地⋯⋯

「戲院。」