《台灣個表妹嚟咗我屋企住》【完】: (四十九)戲院

我都唔記得有幾耐冇去過戲院。

以前，放假會同朋友睇戲，後來同阿琪拍拖嗰陣就成日陪佢去睇。

一直以嚟，睇戲對我嚟講都冇咩特別嘅意思，只不過我純粹想睇就去睇，喺戲院裏面嘅兩個鐘，令我可以進入到電影世界入面，喺另一個時空享受屬於自己嘅寧靜，暫時逃離呢個咁荒謬嘅社會。

好似已經冇嚟過兩年⋯⋯

喺呢個地方，感覺上所有嘢都冇變過，同樣要去售票處買飛，同樣要買一兜爆谷，同樣要查過張飛先可以入場。





唔同嘅係，依家一齊睇戲坐喺我隔離嘅人，再唔係以前徘徊喺身邊嗰班朋友，亦唔係我曾經好鍾意嘅人，只係我一個蠢蠢地嘅表妹。

「表哥！做咩無啦啦帶我嚟睇戲呀？」

「冇⋯⋯咁啱想睇咪睇囉。」

「但係你唔好唔記得頭先嗰樣嘢喎。」

「得啦，我記得㗎喇，你個饞食貓⋯」





「你真係記得？」小南依然唔放心，驚我會唔帶佢去。

「好多嘢食嗰個商場呀嘛！」

「哼⋯我一陣會再提你㗎！」

小南咁固執都有㗎⋯我都冇話唔去，睇埋場戲先去唔得咩？

我左手拎住一兜爆谷，右手拎住張戲飛，同小南搵一搵個座位。





「J4⋯J5⋯應該係呢度。」

搵好座位之後，我就同小南坐低喺張舒舒服服嘅凳上面，靜候套電影播放。

等等下，小南就伸手去攞我放喺隔離嗰兜爆谷嚟食。

小南一邊咀嚼，一邊問：「呢啲係爆米花？」

「爆米花？」我突然聽唔明表妹講嘅嘢。

爆米花⋯係乜嘢花嘅品種嚟㗎？第一次聽嗰陣我真係咁諗。

「我食緊嗰啲呀。」小南指住自己個口話。

「哦⋯爆谷呀。」





「嗯嗯！叫爆谷，我記得㗎！」

原來表妹有時都會唔記得咗一啲廣東話獨有嘅詞彙。

「係咪好好食呢？」我問。

「嗯！甜甜地。」

食完一粒之後，小南好快手就伸手去攞第二第三粒，食都食得好快。

「喂呀⋯唔使食得咁快呀？你再食法，一陣開始播場戲就已經冇得食啦。」

「哈哈⋯」小南微笑住咁咀嚼緊。「你自己唔食咋嘛⋯」





「咩嘢話？」見到小南咁囂張想獨食兜爆谷，我都決定唔畀佢得逞，開始唔執輸咁食埋一份。「睇住嚟啦！」

放入口嘅，係一粒一粒嘅爆谷，唔太硬唔太軟，哎起嚟又幾爽口，雖然係甜甜地，但有並非每一粒都係咁甜。

總有幾粒係淡而無味，就好似回憶一樣⋯⋯

逝去嘅回憶，會有一些甜味，亦有時會無味，食唔出苦味，係因為我哋想忘記，但記得起，我哋就只需要回味，回味唔會再出現嘅苦，反正都唔會再出現。

「喂喂！你又食？」

「唔通畀你食哂咩？」

「唔得呀！依嚿甜啲係我㗎！」

「有寫你名咩？睬你都傻呀。」





「喂喂！衰人表哥！」

如是者，我同小南鬥食爆谷之下，一份大份嘅爆谷，喺開始播電影前，就已經輕鬆咁畀我哋食咗三分之一。

忽然，戲院裏全部燈熄哂，我同小南進入咗一個黑色空間，只見大螢幕上明顯地發光，開始播出一套我隨心而揀嘅電影。

哎呀⋯我揀咗呢套電影⋯