《台灣個表妹嚟咗我屋企住》【完】: (五十九)好驚

由朝早去睇戲，晏晝去行街食嘢，到夜晚就一齊食譚仔，真係好似一對小情侶一日嘅活動流程，雖然係一件好攰嘅事，但係又會好享受箇中嘅滋味。

好耐都冇試過呢種拍拖嘅感覺，可惜嗰個係我嘅表妹啦。

返到屋企後，阿爸仲未返嚟，我就叫小南沖涼先，而我就打開Whatsapp睇下阿琪有冇再覆我。

「咁你聽晚得唔得閑？」

見到佢最新嘅訊息仲停留緊係今朝早，隔咗成差唔多半日先覆返佢，我好似有啲衰。





但係都要覆下㗎啦⋯⋯

「得閑。」

冇諗到唔夠一分鐘，阿琪佢竟然秒回我。@_@

「十點鐘老地方？」

老地方？乜撚嘢老地方，拍戲咩？講清楚啲好喎。





「即係邊度？」

望住佢嘅輸入中慢慢變成眼前嘅訊息⋯⋯又勾起咗我嘅回憶。

「糖水舖呀。」

原來阿琪仲記得嗰啲甜蜜往事，我仲以為得我一個會記得，而佢口中嘅老地方，估唔到係講緊我哋以前成日去嘅糖水舖。

其實你嗰陣到底係咪有啲咩苦衷先至同我分手？





我只係簡單咁覆咗：「ok。」

聽日同你見面時候，究竟我會點面對你呢⋯⋯

我坐喺梳化上，睇住部冇開嘅電視機，個腦又自動又諗返呢個曾經帶畀我好多快樂嘅初戀情人。

我好驚⋯好驚又會拎返起對佢嘅感覺。