《台灣個表妹嚟咗我屋企住》【完】: (六十)發怐愗

「表哥！你做咩望住部電視機發怐愗嘅？哈哈⋯」

「吓⋯」

我擰轉頭一望，見到小南啱啱沖完涼出嚟，一邊拎住條毛巾抹頭髮，一邊行去露台將啲污糟衫褲放入洗衣籃。

次次同親小南出街都總係見佢紥住馬尾，但其實我覺得好似依家咁樣係屋企將啲頭髮放哂落嚟，長髮飄逸咁仲好睇啦。

「邊有喎，喺度等緊你沖涼咋。」我話。





「咁你依家仲唔快啲去沖？我未熄爐㗎。」小南慢慢行返入間房拎風筒吹乾個頭。

「係！表哥遵命！」

我沖完靚涼之後，成個身原來黐納納嘅感覺冇哂，真係好爽，然後就返入房開下部電腦嚟上網、睇下啲網絡文學。

睇睇下開始覺得攰攰地嘅時候，我就熄咗電腦，再拎咗自己本藍色嘅日記出嚟，揸住支筆寫低咗今日嘅事。

今日咁充實嘅一日，我記得以前同阿琪每逢放假拍拖嗰陣都係咁樣⋯⋯





一齊去睇戲，一齊拖住手去行街，一齊食埋晚飯。

最後會靜靜咁行多陣，行到去嗰間糖水舖食埋糖水，我就送佢去搭車。

只係呢啲情景冇可能再發生，嗰種初戀嘅感覺亦都再冇可能搵得返。