《台灣個表妹嚟咗我屋企住》【完】: (七十三)偷襲

趁住小南冇防備先食到粒魚蛋咋，真係幾有成功感。

「嘻⋯魚蛋我買㗎喎。」我話。

「唔制呀！你偷食就係唔啱！」小南好嬲咁揸住支竹籤喺我面前亂咁揮舞。

會唔會嬲起上嚟一嘢捅我㗎⋯⋯

雖然對自己嘅生命有些擔憂，但見小南嬲得嚟又有幾分可愛喎，望住依家嘅佢，儼如有種魔力牽動我嘅嘴角向上揚。





表妹佢真係好有趣⋯⋯

「我邊有偷食喎，光明正大㗎！」咀嚼完後，我就吞咗落肚。

「你畀返粒魚蛋我呀！」小南繼續揮動佢嘅竹籤。

「吓？吞埋落肚啦喎。」我話。

「唔理你呀！吞咗嘅話咁我就打到你嘔返出嚟呀！」小南左手緊握拳頭，右手緊握竹籤，然後踏步上前作勢要攻擊我。





只見佢一籤一拳，雖看似柔弱無力，但卻隱藏住巨大嘅殺傷力。

呢個時候⋯⋯

我決定⋯⋯

「契弟走得摩！」

我知道硬碰硬對我毫無益處，所以轉身就跑，跑向人群之中，而小南就繼續揸實佢支竹籤追住我，佢就好似癲佬正傳嘅秦沛一樣，死都要追住我，爭在未講有殺冇賠。





而係大聲嗌住我：「咪走呀！黃家星！喂呀！」

我一路跑，一路忍唔住笑出聲，第一次覺得逃亡並唔係心驚膽顫，而係好搞笑。

我穿梭於人來人往嘅路上，喺耳邊聽到小南嘅聲音好快就被身旁好多嘅雜聲覆蓋。

跑跑下，好快就發覺擺脫咗表妹嘅追捕。

我身邊少咗佢，有啲唔係咁習慣⋯⋯

「咦⋯⋯但係小南冇咗我，會唔會蕩失路呢？」

突然間我又好擔心小南，咁樣掉低佢令自己好唔安心，於是我就向住相反方向跑返過去。

跑到差唔多唔見佢嗰陣嘅附近，我好憂心咁周圍望嚟望去都搵唔到佢。





我係咪玩大咗呢？

小南去咗邊呀？

一幻想到表妹會因為唔見咗我而哭哭啼啼嘅低能樣子，我就開始方寸大亂，心急起上嚟。

「程小南！」

我咁樣一嗌，途人都對我投放怪異嘅目光，但唔理得咁多㗎喇，搵返表妹要緊，再柒啲都唔重要。

忽然覺得背後一涼⋯⋯

「嘻⋯仲偷襲你唔到？」





伴隨住聲音落下嘅，係施加喺我頭頂上嘅痛楚。

「哎！」我立即撳住自己頭。

「屌！好撚痛⋯⋯」

我轉身一望，眼前原來係一個揸住支裝水樽嘅表妹。